Mataupu Faavae o le Auaunaga

Faasoaina Atu o le Malamalama o le Faaola i le Kerisimasi

Mafaufau ia i latou e te auauna atu i ai. E mafai faapefea ona e fesoasoani ia i latou ia latalata atili ia Keriso i lenei Kerisimasi?

porcelain Nativity set

Ata pue o le soifua mai o le Faaola na saunia e Niltza Beatriz Santillan Castillo

A o tatou manatua ai le Faaola o Iesu Keriso i le tausaga atoa, o le Kerisimasi o le vaitau lea tatou te faamanatuina ai le meaalofa silisili ua tuuina mai: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi” (Ioane 3:16). A o tatou auauna atu i le Kerisimasi, e mafai foi ona tatou avatu meaalofa ia e fesoasoani ai i isi ia faalatalata atili atu i le Faaola. E matagofie le mafaufau ia i tatou lava i lo tatou tuuina atu o se meaalofa e talitutusa ma le meaalofa na tuuina mai e le Tama Faalelagi.

O Loo Ou Teufatuina Pea le Meaalofa

Susan Hardy, Kalefonia, ISA

Ina ua 11 ou tausaga, sa tau mai e lo’u faiaoga o le Aoga Sa, o Brother Deets i le matou vasega e faapea, afai o le a matou taulotoina Mataupu Faavae o le Faatuatua ma faamatala atu ia te ia o latou uiga, o le a ia faatauina mai mo i matou a matou lava seti o tusitusiga paia.

O Brother ma Sister Deets o se ulugalii talavou, lea faatoa tau amata. Sa ou le mautinoa pe gafatia e Brother Deets ona faatau mai se meaalofa mo soo se tasi. Ae sa ou filifili afai na manatu o ia e taua tele le taulotoina o Mataupu Faavae o le Faatuatua, o le a ou talia le lu’i.

Ina ua maua uma la’u 13, sa faagasolo lava le taimi ma galo atu ai ia a’u lana folafolaga.

Ona oo lea i le Aso o le Kerisimasi, sa ou mauaina se afifi na i ai i luga lo’u igoa. Sa ou tatalaina ma maua ai se seti o tusitusiga paia mo au lava, ma se kata o le faamalosiauga ia ou faitau soo i ai. Na tupu lena mea i le 1972, ma e oo mai i le asō o loo i ai pea ia te au na tusitusiga paia. E taua tele ia te au.

Sa le o le tau o le meaalofa ae o le agalelei sa ia faaali mai ia te au ma le ositaulaga sa ia naunau e faia mo au, lea na tuua ai au ma se naunautaiga loloto e suesue i le afioga a le Atua. Ou te taumafai e mulimuli i faataitaiga o auaunaga a Brother Deets e ala i le tuuina atu o meaalofa anoa ia i latou o loo siomia au, ma le faamoemoe e mafai ona ou faamanuiaina olaga o isi e pei ona ia faamanuiaina au.

O Se Valaaulia e Faia se Vaega

Richard M. Romney, Iuta, ISA

Ina ua fai mai i latou na fuafuaina le gaoioiga o le Kerisimasi a le matou uarota ou te asiasi atu i se tagata e le toaga i le lotu ma valaaulia o ia e auai i le polokalama, ou te fia ta’u atu sa ou popole. Sa na o le faatasi na ou feiloai ia Darren, ina ua auai mai i se gaoioiga na muamua atu a le uarota. Sa fusi lona muaulu i se fusiulu [a le tagata tietie] pasika. O lona lauulu sinā uumi sa faaponi, sa i ai sana ‘ava e paepae atoa, ma sa soo ona lima i pe’a.

O lea, faatasi ai ma se sui o le komiti, sa ou tu ai i le faitotoa a Darren, ma mafaufau pe o le a sana tala o le a fai mai. Sa fai mai o ia ma te o atu i totonu, ma sa ma tau atu ia te ia le mafuaaga o le ma i ai iina. Sa ia fai mai, “Oi, o le a ou fiafia e fai lena mea!”

Sa ia faia se galuega maoae, i le fesoasoani lea ina ia anoa le gaoioiga mo le toatele. I se taimi puupuu mulimuli ane, na talosagaina ai ma’ua ma la’u soa o auaunaga ina ia ma asiasi e le aunoa ia Darren. E foliga mai sa fiafia o ia i taimi uma e vaai mai ia i ma’ua, ma sa i ai ni a matou talanoaga fiafia. Ou te faafetai i le musumusuga e valaaulia o ia e auai i le polokalama o se gaoioiga a le uarota na taitai atu ai i se mafutaga faapelepele.

Auauna Atu i Isi i le Kerisimasi

O nisi nei o mea e mafai ona e faia ina ia mautinoa ai o le a iloa e i latou e te auauna atu i ai o loo e mafaufau atu ia i latou, aemaise lava i le taimi lenei o le tausaga.

1. O nisi taimi e faia ai e se vili i le telefoni po o se feau tusitusia ni mea ofoofogia. O le amataina o se talanoaga faigofie i se “Talofa, o a mai oe?” e mafai ona faia se eseesega.

2. Auai faatasi i a latou aso faamanatu pe a talafeagai ai. O le Kerisimasi e mafai ona avea ma se taimi maoae e aoao ai e uiga i talitonuga tatou te tutusa ai. Pe a e faasoa atu talitonuga ma faalogo atu i isi, ua e tatalaina le faitotoa i se malamalama sili atu.

3. Tatalo mo i latou ma ta’u o latou igoa. Ole atu i le Tama Faalelagi e fesoasoani atu ia e mafaufau i ni auala e aumaia ai i latou ia latalata atili atu i Lona Alo.

4. O meaalofa faatauvaa e masani lava ona sili ona manatuaina. E le faapea e tatau lava ona mataina se meaalofa ina ia fiafia i ai. O le meaalofa o le taimi, o le meaalofa o le faalogo, o le faasoaina atu o se ata po o se manatuaga—e mafai ona avea uma ma meaalofa o le loto.

5. Tuuina atu le meaalofa o le molimau. Fai atu ia i latou e faasoa mai lo latou alofa i le Faaola ia te oe, ma ofo atu e faasoa atu lou alofa ia te Ia ma i latou.

young adult woman helping older woman in a motorized chair reach some apples at grocery store

Faaaogaina o le Faamalamalama le Lalolagi e Auauna Atu Ai

E mafai ona e faaaogaina le faalauiloa o le Faamalamalama le Lalolagi e fesoasoani ai ia te oe a o e auauna atu. O ni nai manatu nei e te amata ai. (Su’e nisi mea se tele i le ComeuntoChrist.org.)

1. Faasoa atu le vitio The Christ Child. E mafai ona e tuuina i luga, faasoa atu se sootaga, pe valaaulia isi e matamata faatasi ma oe.

2. Valaaulia isi e auai atu i se sauniga o le Kerisimasi. O nisi tagata e mananao e tapuai ae le iloa le mea e o i ai. Valaaulia i latou e o mai e tapuai faatasi ma oe.

3. Uunaia i latou e foai atu i isi. E mafai ona latou foai atu i Auaunaga Agaalofa a le Ekalesia po o auaunaga alofa i le lotoifale. Afai o loo e nofo i se aai o loo i ai se tasi o Masini Foai a le Ekalesia, e mafai ona tou o ma i latou pe a e alu e foai atu. O masini e maua ai se auala faigofie e auina atu ai se meaalofa lea e mafai ona faamanuiaina ai tagata i le lalolagi atoa.

4. Lesitala i uunaiga mo auaunaga i aso taitasi. E mafai ona e fesoasoani i isi e lesitala foi. O uunaiga e mafai ona maua ai ni avanoa tou te auauna faatasi ai.

5. Faatumulia o latou fale i le filemu. Faailoa atu ia i latou o loo i ai i faifeautalai se savali faapitoa o le Kerisimasi e mafai ona la faasoa mai, o se savali o le a aumaia ai le faamoemoe ma le alofa i o latou loto.

6. Faailoa atu i latou i le Faamalamalama le Lalolagi. Faaali atu ia i latou le auala e aoao atili ai i le ComeuntoChrist.org.

young man holding a hymnbook in church

Auauna Atu i Tagata Uma o se Faapotopotoga

O manaoga o faapotopotoga taitasi e tulaga ese. O nisi e faamanuiaina mai le faatulagaina o se gaoioiga telē. O isi faapotopotoga e mafai ona faamanuiaina mai se mea faatauvaa ma faigofie. O i latou na aafia i le fuafuaina ma le faatulagaina o gaoioiga e mafaufau ma le agaga tatalo i auala e taulima ai manaoga o loo i ai.

• O tagata o le Ekalesia mai siteki e tolu i Pale, Farani, na fesoasoani e lagolago se patī o le Faamalamalama le Lalolagi lea na aofia ai se faaaliga taleni ma se faaaliga la’ei. Sa latou saunia ni mea ia na tuuina atu i tagata sulufai ma tagata o loo aafia i le leai o ni mea e nonofo ai. (Tagai “Faamalamalamaina o le Lalolagi i Pale,” itulau 32.)

• Sa faatautaia e le Siteki Tutotonu a Charlotte Carolina i Matu se fuafuaga o le “Kerisimasi i le salafa o le Lalolagi” mo le afioaga, ma se patī e faamanatu ai Keriso e ala i meaai, faaaliga o agaifanua o le Kerisimasi faavaomalo, musika, galuega fesoasoani, ma tala faatino a tamaiti o le fanau mai o Iesu.

• Sa auai tagata o le Siteki a Vero Beach Florida i se faamanatu faalelotoifale o le pogai tatou te faamanatuina ai le Kerisimasi. Sa foai atu ni meataalo i faalapotopotoga o auaunaga alofa. Sa faafiafia se aufaipese a tamaiti o le Peraimeri, ma e tele ni ekalesia na i ai ni potu laiti e faailoa ai faamatalaga.

• Na faatinoina e le Siteki a Jacksonville Florida i Saute le faaaliga o le Faaola o le Lalolagi mo le nuu.

actors portraying Joseph and Mary holding the baby Jesus in a stable

Faalatalalata Atu i le Faaola

Elder Dale G. Renlund

“A tatou aveina faafaatusa i tatou i le fale o manu i Peteleema, ‘lea na taoto ai le Atua i vaovao i le po,’ o le a mafai ona tatou iloa lelei atu le Faaola o se meaalofa mai se Tama Faalelagi agalelei ma alofa.”

Elder Dale G. Renlund o le Korama a Aposetolo e Toasefululua, “Ina Ia Mafai Ona Ou Aumai o Tagata Uma ia te Au,” Liahona, Me 2016, 40.

Faasoa Mai Ou Aafiaga

Auina mai ia i matou a outou aafiaga o auaunaga po o auaunaga na faia mo outou. Alu i le liahona.ChurchofJesusChrist.org ma kiliki le “Submit an Article or Feedback.”