O Le Upu Mulimuli
Atoatoa ia Keriso
Saunia e Elder Gerrit W. Gong
O Le Korama a Aposetolo e Toasefululua
Mai se lauga o le konafesi aoao ia Oketopa 2018.
O le malamalama ma le ola faaleagaga e oo mai pe a toso atu e le tausia o tapuaiga masani i tatou e faalatalata atili atu ai i lo tatou Tama Faalelagi ma lo tatou Faaola, o Iesu Keriso. Faatasi ai ma le usiusitai i aso uma, tatou te maua tali, faatuatua, ma le malosi e faafetaia’ia ai luitau ma avanoa i aso uma i le onosai o le talalelei, vaaiga mamao, ma le olioli.
A o tatou sailia auala fou ma paia atu e alolofa ai i le Atua ma fesoasoani ia i tatou ma isi ia saunia e fetaiai ma Ia, tatou te manatua o le faaatoatoaina e ia Keriso lea, ae le ia i tatou lava po o le faafiaatoatoa o le lalolagi.
O le valaaulia a le Atua e tumu i le alofa ma avanoa aua o Iesu Keriso o “le ala, ma le upu moni, ma le ola” (Ioane 14: 6). Mo i latou o e lagona le mamafatu, ua Ia valaaulia e, “O mai ia te a’u,” ma ia i latou o e o mai ia te Ia, ua Ia folafola mai, “O a’u foi e malolo ai outou” (Mataio 11:28). “O mai ia Keriso, ma faaatoatoaina ia te ia, … alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso” (Moronae 10:32).
I lenei faamautinoaga “o lona alofa tunoa e mafai ai ona outou atoatoa ia Keriso” o le faamafanafanaga foi, filemu, ma le tautinoga lea e mafai ona tatou faaauau pea i luma ma le faatuatua ma le lototele i le Alii e tusa pe le tutupu ni mea e pei ona tatou faamoemoe i ai, mananao i ai, pe atonu e talafeagai, e ala i le leai o ni a tatou lava mea sese, pe a mavae foi ona tatou faia o le mea silisili.
I taimi ma auala eseese, tatou te lagona uma lava le lē atoatoa, lē mautinoa, ma atonu o le lē agavaa. Ae i a tatou taumafaiga ina ia alofa i le Atua ma auauna atu i o tatou tuaoi, e mafai ona tatou lagona le alofa o le Atua ma le musumusuga e manaomia mo o latou olaga ma o tatou olaga.
Faatasi ai ma le agaalofa, ua uunaia ma folafola mai lo tatou Faaola e mafai ona tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20). O le aoaoga faavae o Keriso, le Togiola a lo tatou Faaola, ma lo tatou mulimuli ma o tatou loto atoa i Lana ala o feagaiga, e mafai ona fesoasoani tatou te iloa ai Ana upumoni ma faasaoloto ai i tatou (tagai Ioane 8:32).
Ou te molimau atu o Lana ala o feagaiga e tau atu i le meaalofa silisili ua folafola mai e lo tatou Tama Faalelagi alofa: “O le a outou maua le ola e faavavau” (2 Nifae 31:20).