O Samuelu ma le Fetu
I le tele o tausaga anamua ua mavae, ma i le isi itu mamao atu o le sami, sa tuuina atu ai e se tagata o le Atua e igoa ia Samuelu se valoaga.
Sa ia faamatala atu i tagata le tele o mea e uiga i le fanau mai o lo tatou Faaola. Sa ia tautala atu ia i latou e uiga ia Iesu Keriso, ma le ala o le a Ia afio mai ai i le lalolagi.
Sa lei faalogo tagata. Na tumu o latou loto i le masalosalo. O lea na latou ave ai Samuelu i le faitotoa o le aai ma togi o ia i fafo.
Ae sa lei fiu ai Samuelu. E tatau lava ona ia faailoa atu ia i latou. Na a’e o ia i luga o aupā o le aai ma valaau ifo ia i latou.
“I le toe lima tausaga ona afio mai lea o le Alii, i se po malamalama, ina ia laveai ai tagata mai a latou agasala uma, ma tuu atu Lona malamalama i le lalolagi.”
“Ma e ui lava e toe lima tausaga, ma o loo mamao pea, ae o le a goto atu le la, ma amata ona po, ae e malamalama pea e pei o le ao.”
Sa matuai feita tagata ma tatū o latou vae. Na latou fai mai o le a leai se Keriso e sau.
Sa tau’ai atu a latou maa. Sa tafana atu a latou ufanafana. Na misi uma lava.
Sa faatalitali le au faatuatua, ua tau lē manava, i le faamoemoe o le a latou vaaia—le fetu, le malamalama, o folafolaga, e sili atu lona taua nai lo o le auro.
Ona oo mai lea o le lima tausaga, i Peteleema, ua taoto Keriso i se faatanoa vao. Sa latou vaai i le malamalama ma iloa o le a afio mai o Ia, lo latou Faaola, le Alii o tagata uma.
Ma e pei ona tupu i taimi uma lava, pe a matua lototoa perofeta, e faataunuuina e le Alii Ana folafolaga, e pei ona faia e Samuelu o anamua.