O Ia o le Malamalama
E alala le tusitala i Iuta, ISA.
I le faitau afe o maila mai le aiga, sa ou aoaoina ai se lesona mai togitogi laiti o le malamalama e faitau miliona o maila le mamao.
Ata na tusia e Gabriele Cracolici
Atonu e foliga mai o se mea e ese lava, ae sa ou fiafia i taimi uma o le Kerisimasi i lau misiona, e faitau selau pe faitau fia afe foi maila le mamao mai faafitauli masani o le aiga ma faalavefau o mea faapisinisi. O le Kerisimasi e faatatau ia Keriso, ma o le a se isi auala sili atu e patipatia ai nai lo le fesoasoani atu i isi ia o mai ia te Ia?
I se tasi afiafi ia Tesema, sa ma toe foi atu ai ma la’u soa i lo ma fale mautotogi ina ua mavae se aso o le galuega faafaifeautalai i La Paz, o se nofoaga matagofie i le faatausiusiuga o le aai o Laoag, Filipaina. Sa ou nofo i le nofoa autafa o se uila pa’u tolu ma faapupuu ai i talane la’u soa e ono futu le umi, ma sa ou fiafia lava i le olaga. Na taia i ma’ua i le ea malū, ma faamanatu mai ia te au (toeitiiti lava) e uiga i Kerisimasi kiona i le aiga—ae sa le pei lava le malulu e pei ona sa ou masani ai ia Tesema.
A o matou tietie atu i le nuu maotua, sa taulai atu ou mata i le lagi. I luga, e mamao ese lava mai moli ma le malomaloa o le aai, e faitau afe fetu na aliali mai. Ae na faasolo faaitiitia fetu na ali a o matou taulalata atu i le ogatotonu o le taulaga, seia oo lava ina nao fetu susulu malolosi na mafai ona vaaia.
Sa ou mafaufau i le malamalama mai fetu ma Iesu Keriso. Na ou mafaufau i le fetu sa faasilasilaina Lona fanau mai ma Keriso lava Ia, o le “fetu ao pupula” (Faaaliga 22:16). O Ia o le fetu mumū tele, o le faataitaiga susulu mo i tatou uma lava. Ae peitai, e pei o na fetu sa ou vaaia a o tilotilo atu i fafo mai le uila pa’u tolu, e oo lava foi ia te Ia e mafai ona punitia e le eleelea o le malamalama. O le tele o mea faalavefau, o le tele o molī faafoliga, o le faaitiitia foi lea o le vaaia o le malamalama faanatura. I tua i se itumalo o Filipaina, e mafai lava ona vaaia ni fetu mai le ogatotonu o le aai, ae i taulaga tetele e pei o Manila, e le mafai ona e vaaia se fetu se tasi i le po. O le malamalama mai faasalalauga, pisinisi, ma fale ua poloka uma ai le malamalama o fetu mamao.
O le mea lava e tasi e tupu pe a tatou siomia i tatou lava i mea faalavefau ma moli faafoliga. O le a sili atu ona faigata ai ona iloa le malamalama o Keriso.
E faapitoa lava le moni o lenei mea i le vaitaimi o le Kerisimasi. E faigofie lava ona soona fuafua gaoioiga i aso malolo ma tatou pisi ai lava e pei o le pisi o Manila i le taimi o itula pisi. O loo i ai meaalofa e sailia, o pati e fuafua, kata e tusi, ma le anoanoai o faafiafiaga ma mea e tutupu e auai ai. A tatou lagona ua leai se taimi tatou te tepa ae ai i luga, atonu o le a tatou le iloa ua punitia le malamalama o Keriso i o tatou olaga.
A o tatou faamalamalamaina o tatou fale ma laau, e le mafai ona galo ia i tatou ona faatagaina le Malamalama o Keriso i totonu o o tatou loto. Atonu tatou te mananao e taofi faafiafiaga mo sina taimi ina ia manatua ai mea o loo tatou faamanatuina. O le Kerisimasi e faatatau ia Keriso. O Ia o le malamalama, ma afai tatou te tuuitiitia mea faalavefau ma tetepa ae i luga, e mafai ona tatou iloa o Ia, e tumau pea ma e susulu pea lava i le lalolagi atoa ina ia vaai i ai.