Itulau i le lotoifale
Koro—O Se Toa mo Foai
Afai o le faaupuga faasalalau faatosinaina “Foa’i lou toto, o le a faasaoina ola” o se mea e tatou te mulimuli ai, o Koroniria (Koro) Amai, o se tagata o le uarota a Hamilton i Sasa’e, o se tagata e tupuga mai ia Nga Tuhoe ma Ngati Kahungunu Ki Wairoa, o se tagata toa mo foa’i mo le faasaoina o ola i taimi uma. I le vaiaso na te’a na fai ai lana foa’i lona 244 o paina toto. O lana sini o le limaselau. I le 51 ai nei o ona tausaga, na ia ofoina atu le afa o lona olaga e faia ai lenei galuega alofa, ma e le’i misi lava lana malaga atu i vaiaso ta’ilua uma i le Nofoaga Autu o le Falemai a Waikato mo E e Foai atu le Toto. E nofo mo se itula e faapipi’i i ai le masini tui toto ma taumafa fiafia ana masi ma vaiinu e foa’i fua i ai.
“To’atele ua masani i le foa’i atu o le toto ae toaitiiti e masani i le foa’i atu o le sua pa’epa’e o le toto e leai sona lanu (plasma),” o le faamatalaga lea a Koro. “E mafai e le sua pa’epa’e lenei o le toto ona gaosia i ni vaega se valu e faasaoina ai se soifua.” Ma ua maitauina, o lenei sua pa’epa’e o le toto mai tane, e tele ni mea e maua mai ai nai lo le tama’ita’i. “E toatele nisi alii o lo’o tausaili ona o le tele o mea aoga e maua mai ai i sua pa’epa’e o o latou toto,” o le tala lea a Koro. “O se tasi o mea aoga taua e maua ai o le Factor 8 mo le toto e lē mafai ona poloka ona e fesoasoani i le toto e poloka.”
O tagata e lē mafai ona poloka le toto o tagata ia e aoga i ai le sua pa’epa’e o le toto lea e foa’i, faapea ai ma gasegase kanesa ma i latou e lavevea i taavale. O lena manaoga faaauau, o lona uiga o le sua pa’epa’e lenei o toto ua matua sili ona mana’omia mai mea uma e maua mai le toto e ofoina atu. E mafai ona foa’i atu e faalua i le masina, e pei lava o le toto, e vave ona toe faatumulia e le tino. O le foai atu o le toto, i se tasi itu, e mafai ona faia ta’i tolu masina.
I le i ai o lona valaauga i le au peresitene o le Aoga Sa i lana uarota, o se tāmā i se fanau e to’alima (to’atolu o lo’o i ai pea i le fale faatasi ai ma sē e i ai manaoga faapitoa e lima tausaga), ma galue o se faufautua mo tamaiti aoga i le Wintec, o le ali’i pisi lenei o Koro e tu’uina atu ma le lē aunoa le 60 minute e avanoa i vaiaso ta’ilua mo le foa’iina atu o le sua pa’epa’e o lona toto. E na te faaaogaina le taimi lea e faitau ai ana tusitusiga paia, faalogologo ai i ana musika o le 80 po o le talatalanoa fo’i i le aufaigaluega a le falema’i.
E matuā fiafia lava Koro e saili mai isi tagata e foa’i. “Se’iloga lava e mana’omia e oe po o lou aiga se toto, e lē mafai lava ona e mafaufau i le manaoga mo vaega nei e maua mai i le toto, ma o le mea lena ou te mana’o ai ina ia faailoa i tagata le tāua o le toatele o nisi e faia lea foa’i.”
Ina ua maliu lo’u atalii i se faalavelave tau taavale i le fa tausaga ua te’a, e ui lava sa lē mafai e le toto ona faasaoina lona ola, ae na avea lena ma mea na toe tomanatu ai Koro i le mana faaola o le foa’i atu o le toto. “O le mafua’aga lena ua ou faia ai lenei mea. O le faaaogaina o le toto e i ai a’afiaga tonu i le taua o le ola ma le sefeina o ola.”
I le Mosaea 2:17 a’o ia faamatala, “O se tasi o ala o le auaunaga i tagata lautele.” Sa ia faamautu mai o se tasi o faamanuiaga o le foa’i atu o le lagona malosi lea o le fesoasoani atu i isi. “Afai e i ai se osigataulaga, o le taimi ma se pū itiiti i le lima.”
E i ai lava i taimi uma le manaoga mo nisi tagata e foa’i ma na faapea mai Koro, o le faamanuiaga e fo’i mai e matuā faatauaina ai le taimi na faatino ai le foa’i. Na te le’i faalogoina lava ni lagona faaletonu mai le foa’i atu o lona toto i taimi uma ma e na te faafetaia ai le upu o le poto mo lona lava soifua maloloina lelei. Na faapea mai Koro, o i latou e foa’i atu le toto e tatau ona soifua maloloina lelei ma tatau ona faamalieina ni aiaiga o le soifua maloloina ma e mafai ona siaki i nofoaga o le toto faalotoifale mo le agava’a e foa’i lona toto.