Itulau i le lotoifale

Ua Tufatufa atu e le Au Paia o Aso e Gata Ai le Sili Atu ma le $6.3 Miliona o Foai o le Faamalamalama-le-Lalolagi i Auaunaga Alofa

Potu o Talafou

Ua taulimaina e Auaunaga Alofa i le Lalolagi le Sili Atu ma le $3.2 Miliona mai le Au Paia o Aso e Gata Ai i le NYC Distribution Event

Ua tufatufaina e le Au Paia o Aso e Gata Ai aitema ma auaunaga e sili atu lona tau ma le $6 miliona e lagolago ai le 45 o faalapotopotoga o auaunaga alofa faavaomalo ma le lotoifale.

I le sili atu ma le 54 aso, o saofaga uma na faamaopopo i le taimi o le faalauiloa o le #FaamalamalamaLeLalolagi a Le Ekalesia a Iesu Keriso o le Au Paia o Aso e Gata Ai i le vaitau o le Kerisimasi ma auina atu ai loa i faalapotopotoga eseese na auai.

“Soo se nofoaga e nofo ai se tasi o le Au Paia o Aso e Gata Ai, matou te taumafai ia avea o ni tagata lelei i o matou nuu ma siitia isi,” na saunoa ai Sharon Eubank, peresitene o Auaunaga Alofa o le Au Paia o Aso e Gata Ai, le faalapotopotoga o fesoasoani agaalofa a le Ekalesia.

I le taimi o lea fuafuaga, e 10 nofoaga eseese i le salafa o le lalolagi na faatutū ai Masini o Foai (Giving Machines).

O masini fai faatau na faatagaina ai tagata o le Ekalesia e lagolagosua i gaoioiga o auaunaga eseese faatasi ai ma le suluina o se bank card po o se tupe teu. O foai na fesoasoani i paaga auaunaga alofa e faatau ai aitema e pei o meaai, lavalava, vailaau, mea mo le faaleleia o le tumamā, mea taalo ma manu o lafu mo ituaiga eseese na latou auauna atu i ai.

“O i matou o tagata foai ma tagata e taliaina i tulaga eseese ma vaega o o Matou olaga,” na saunoa ai Sister Eubank. “O se mea faapenei e fesootai ai i matou ma le tasi.”

I le Aai o Niu Ioka, na tuuina atu ai se siaki tupe e $3,260,267 e fai ma sui o tagata foai o le Au Paia o Aso e Gata Ai mai le salafa o le lalolagi o ē na filifili e tuuina atu i faalapotopotoga faavaomalo.

O Auaunaga a le Ekalesia i le Lalolagi, o se vaega e maua ai fesoasoaniga mo le tagata lava ia, toomaga o faalavelave ma fesoasoani mo tagata sulufa’i, o se tasi lenei mai le tolu o faalapotopotoga e le maua ni tupe mama i le lalolagi e auina atu i ai tupe fesoasoani mai tagata o le Au Paia o Aso e Gata Ai i le salafa o le lalolagi.

E faafetai atu i lenei foai, ua mafai ai e le Auaunaga a le Ekalesia i le Lalolagi ona faatau iunite e 8,791 o meaai mo le ola maloloina, le 1,248 eka o pateta suamalie ma le sili atu ma le 45,000 manu o lafu i lea faalauliloa.

“E faatatau i le tuufaatasia o ou lima, faia se sootaga, faaali atu i tagata i le salafa o le lalolagi e mafai ona latou faia se mea mo se isi tagata.”

Na tuuina atu foi e tagata o le Au Paia o Aso e Gata Ai mai Big Apple (Niu Ioka) e fai ma sui o latou tagata auai i le lalolagi siaki tupe i faalapotopotoga o auaunaga alofa faaopoopo, e aofia ai WaterAID, o se faalapotopotoga e fesoasoani i tagata ina ia maua le suavai mama, ma le UNICEF ISA, o se faalapotopotoga latou te tuuina atu le lagolago mo fanau i le lalolagi.

“E ofoofogia le vaavaai atu i auala na tatai moni ai e le Ekalesia lana tautinoga e auauna atu ma musuia isi ina ia faaaofia i latou e fai se eseesega,” na saunoa ai Leslie Goldman, sui peresitene o le Global Cause Partnerships a le UNICEF ISA.

O tagata mai Le Ekalesia a Iesu Keriso o le Au Paia o Aso e Gata Ai o e na auai i le faalauiloa o le #FaamalamalamaLeLalolagi na faia foi se aafiaga tuufaatasi i auaunaga alofa i le lotoifale i nofoaga eseese o Masini o Foai:

Aai o Sate Leki, Iuta

I le Aai o Sate Leki, Iuta, o auaunaga alofa na mauaina nei foai e aofia ai Utah Refugee Connection, Eye Care 4 Kids, Neighborhood House ma le Utah Food Bank.

“O outou na e i fafo atu i totonu o alalafaga na faatauina nei mea ofoofogia ina ia faia ai se eseesega mo tagata sulufai i le lotoifale, ma o le a i ai iinei i le tatou faalapotopotoga,” na saunoa ai Amy Dott Harmer, faatonu o le Utah Refugee Connection.

O auaunaga alofa i totonu o Iuta na latou tuuina i tagata sulufai oloa mo fale, meaai ma aoaoga e fesoasoani ai ia i latou i o latou suiga i totonu o latou nofoaga fou.

O le faalauiloa o le #FaamalamalamaLeLalolagi na maua ai le silia ma le $124,000. O lenei tupe faaopoopo o le a mafai ai e faalapotopotoga e leai ni tupe mamā e maua ona faatau le tele o mea e manaomia mo aoga ma mea mo le tumama mo aiga o tagata sulufai o e o manaomia.

O Zynab Adam, o se tagata na sulufai muamua mai Sudan, na faaalia lona loto faafetai mo lenei foai, “Ou te fia faafetai atu, faafetai ma faafetai. E le lava mo outou, mo tagata uma e lagolagoina tagata sulufai.”

Ua ofo fua atu nei e Adam le tele o lona taimi i vaiaso e fesoasoani ai e faavasega foai mo le Utah Refugee Connection, o se faalapotopotoga na fesoasoani muamua ia te ia.

Eye Care 4 Kids, o se faalapotopotoga o auaunaga alofa e tuuina atu tausiga faapitoa o mata mo fanau faatauvaa, na faameaalofa atu i ai le $183,450 mai foai a le Au Paia o Aso e Gata Ai.

“Ou te matuai fiafia lava e filifili ni faavaa fou,” na fai mai ai Rekha e 11 tausaga, o le na asiasi atu i le Eye Care 4 Kids ma sa vaaia o ia i le aso na tufatufa ai foai o le #FaamalamalamaLeLalolagi.

E tele taaloga e taalo ai Rekha i le aoga ma na ta’e ai lana matatioata ao taalo ai i se tasi o na taaloga.

“A aunoa ma tioata, o le a matuai le lelei lava lana aoga, ma e fiafia Rekha i le aoga,” o le tala lea a Hillarie Christle, le e tausia Rekha.

O foai o le #FaamalamalamaLeLalolagi o le a fesoasoani lea i auaunaga alofa e faatupe ai matatioata, tioata pipii i mata, suesuega o vaaiga, falema’i faapitoa o mata, taotoga o mata mo tamaiti e pei o Rekha o le na mafatia i faafitauli o le vaai.

O le Utah Food Bank na mauaina foi se foai tupe e sili atu ma le $338,000, lea e tutusa ma le 1,315,000 ‘aiga. O tagata foai o lenei faalauiloa na lagolagoina e ala i faatauga o mea fai meaai ma meaai mo tagata taitasi, aiga ma tagata matutua.

“Faafetai tele mo mea o loo e sui tulaga ai ma i latou uma ua avea ma vaega o na mea,” na saunoa ai Ginette Bott, pule sili o le Utah Food Bank.

Manila, Filipaina

Na foai e le Au Paia o Aso e Gata Ai i Manila le P 848,900 i le taimi o le faalauiloa o le #FaamalamalamaLeLalolagi.

O i latou na faamanuiaina i foai na tuuina atu i ai sikolasipi o le HERO Foundation. O le Hero Foundation o se faalapotopotoga i le lotoifale e maua ai fesoasoaniga tau sikolasipi mo fanau a fitafita tau ua maliliu. I le tuufaatasiga, na lagolagoina e tagata o le Ekalesia le tele o pili a’oga mo faalapotopotoga na faamanuiaina.

UNICEF i Filipaina ma Karita i Manila, o se polokalama mo le manuia lautele a le Katoliko, na latou mauaina foi se siaki tupe mai tagata o le Au Paia o Aso e Gata ai na auai i le faalauiloa a le #FaamalamalamaLeLalolagi e faatau ai mea mo toomaga i faalavelave ma mea manaomia mo le tumamā.