Itulau i le lotoifale
E Lē Atoatoa Ae O Lo’o Matagofie Pea
Tapua’iga o le Aso Sa i le Fale faatasi ma le Aiga o Tofa
Mo se tinā e to’alima se fanau o Jacinta Tofa, o le tapenaina o se sauniga faamanatuga e faia i le aiga mo se taimi muamua o se tulaga faapopoleina. Pau le mea na ia mana’o ai o le latou sauniga ia faatulaga lelei ma matagofie, e pei o le sauniga masani i le falesa o lo latou Uarota i Otahuhu, i le Siteki a Aukilani Otara i Niu Sila.
Mo le tufaina o le faamanatuga, sa matua sailia Jacinta i lana umukuka mo se sioki vai lelei ma ni tama’i ipu. Ae na pau le mea na ia mauaina o se fagu vai ‘aisa ma se pea iputi. Sa ia iloa e mafai ona fai ai e ui ina sa i ai si ona popolega. Ae sa ata ma faapea lana tala, “ma le tatou falaoa na’o le tālā lona tau” ma faatatau lana tala e uiga i falaoa taugofie e masani ona faatau i le faleoloa o lo’o latalata ane, “Ma e lē manaia, pe fou, pe aumai i se fale falaoa.”
Na liliu ane le vaai a Jacinta i le potu malōlō i tafatafa ane, ma ia mafaufau ai o se matuā tapenaga lava le mea e tatau ona fai ina ia vala’aulia ai le Agaga o le Ali’i i totonu o lō latou fale. Ae lē na’o ia o lo’o i ai le manatu tapenapena.
Faatasi ai ma le fesoasoani a nisi o lana fanau, sa aoao e lona to’alua o Elenesi le faiga o le tatalo o le faamanatuga ina ia mafai ona ia taulotoina. Na faapea mai Jacinta, “ou te iloa e lē mafai ona auai mai le Epikopo na te faamaonia le tatalo”. “Talu ai o le taimi muamua lea o le a ia ta’ita’ia ai le faamanatuga, sa ou iloaina foi le mamafa i lo’u to’alua o le matafaioi ina ia sa’o ma lelei mea uma”.
Peitai, sa latou mananao pea ia avea lā latou tapuaiga muamua o le Aso Sa i lō latou aiga, o se a’afiaga taua ma lelei mo i latou. E masani lava ona saunia e Jacinta lavalava mo lana fanau laiti, ae i le faailogaina o lea laasaga taua, na ia tu’uina ai le avanoa i lana fanau e filifili lava e le tamaitiiti lona lava ofu, ae ia ofu i ofu o le Aso Sa. Sa matuā fiafia tamaiti.
Na o’o i le taeao o le Aso Sa ma ua matua pisi tagata uma i le faatulagaina o le potu malolo, faata’ita’i lauga ma pese, fai lavalava o tamaiti (ae ua le popole le tina i le leai o ni se’evae o tamaiti, ma le lē fetaui o ofu, po o ni ofu foi e masani ona fiafia i ai) ma amata le latou sauniga i le taimi.
Ina ua alala faatasi uma i lalo le aiga, peita’i, na faagae’etiaina Jacinta i le mamalu o le mea o loo latou faia.
I lea lava taeao faapitoa, i se vaaiga agamaualalo o loo i ai lo latou aiga, o ia ma lana fanau, o se tama itiiti, o se tasi o lo’o sauni e fai se misiona ma le to’atele o loo i le Peraimeri ua faapotopoto faatasi i lalo o le Pule Faamalumalu o le Perisitua Paia, lea o loo agava’a lona to’alua e umia.
Sa toe tomanatu Jacinta ma faapea, “O le vaai atu i le tamā o la’u fanau o faamanuia ma tufatufaina le faamanatuga, o se vaaiga faamomoiloto”. I lena lava taimi, na lofituina o ia i se agaga faafetai loloto ma le faateleina o lona malamalama.
I taimi faigata faapenei, i le leai o ni lotu e faia i le falesa, ma le avanoa e faatino ai se faamanatuga mo lona aiga i lalo o le pule a le perisitua lava e tasi, ma lagonaina le Agaga lava e tasi lea e lagonaina i se aulotu a le Ekalesia a Iesu Keriso o le Au Paia o Aso e Gata Ai, “O se faamanuiaga moni lava,” o le tala lea a Jacinta.
“Ua i ai so’u agaga faafetai fou mo le mana o le perisitua. O se lagona loto maualalo ma matagofie le vaai atu o agava’a lo’u to’alua e faamanuia lo matou aiga e ala i lena mana. Po o le a lava le mea o loo tupu i le lalolagi i le taimi nei, ae ou te iloa ua taumasuasua lā matou ipu i lō matou fale.