Talanoa i Ou Matua e uiga i Feusuaiga

Saunia e Derek Willis Hagey, PhD

Tautua mo Aiga

ma Denya Palmer

Auaunaga o le Uelefea ma le Ola-Tutoatasi

Ioe, e mafai ona faafaigata. Ae o ou matua o ni punaoa sili atu ona lelei nai lo le initoneti po o au uo.

E le afaina le i ai o ni fesili e uiga i tulaga feusuai. Ma e le afaina le talanoa atu i ou matua e uiga i na fesili. Atonu e te ofo i le tele e mafai ona laua fesootai atu ai ia te oe ma au fesili ma aafiaga.

Pe a oo mai i feusuaiga, o le mea o le a e fetaiai i luga o le initoneti, i ala o faasalalauga, ma mai uo ma tagata o le vasega e ono fenumiai—i tulaga o faamatalaga ma amioga mama uma. O ou matua e mafai ona avea ma punavai sili o tali faatuatuaina ma tali maumaututu e uiga i tulaga feusuai. E mananao i laua i le mea e sili mo oe. Atonu o le a la fiafia i lou fia talanoa atu ia i laua e uiga i lenei mea.¹

Afai tou te lei talanoa lava ma ou matua e uiga i feusuaiga, o nisi nei o motugaafa:

Ata

conceptual image of brain

Ata na tusia e Andrew Roberts

Sauniuniga Faaleagaga ma Faalemafaufau

Tatalo. Ole atu i le Tama Faalelagi e fesoasoani ia e iloa le mea e te fai atu ai e aumaia ai le mataupu i ou matua.
Ia toa. E tusa lava pe na e faia se sese pe leai, aua nei faatuai ona talosaga atu i ou matua e fesoasoani atu ia te oe. La te alolofa ia te oe ma mananao i le mea sili mo oe.
Ia manatua o ou matua sa talavou foi pei o oe. Sa laua fesouaina foi ao tuputupu ae. O le a mafai ona la malamalama ma fesootai atu i lou aafiaga.
Mafaufau lelei e uiga i le auala e ono tali atu ai ou matua. Mafaufau i se taimi na laua fesoasoani atu ai ia te oe i le taimi ua tuanai. Vaai faalemafaufau o loo lelei le talanoaga.

Ata

checklist and clock

Sauniuniga Faatino

Filifili po o le fea matua e te manao e talanoa i ai. E ui ina faigofie ona talanoa nisi o le autalavou i matua uma e lua, ae o nisi ua sili atu ona lagolelei le talanoa atu muamua i se tasi o matua. O se aga masani, ae maise lava i se mataupu e pei o le tulaga feusuai.
Faatulaga se taimi e talanoa ai. Fai atu i ou matua e faataatia ese se taimi e fai ai se talanoaga. O lenei mea e tuu atu ai ia oulua uma le taimi atoa e saunia ai.
Fai se lisi o mea e te manao i ou matua ia iloa ma ni au fesili o i ai. O le i ai o se lisi o mafaufauga po o atugaluga e mafai ona fesoasoani ia te oe e manatua ai le mea e te manao e talanoa i ai. Ma afai e i ai se mea e te le i talanoaina, fai atu ia i laua e fai se isi talanoaga.
Faataitai le amataina o le talanoaga. Atonu e te manao e amata i le fesili atu. Pe atonu e te manao e amata i lou fai atu i ou matua ia tau lava ina faalogo seia oo ina e saunia mo i laua e tali mai. (Tagai i le vaega “Amataga o Talanoaga”)
Talanoa ma ou matua e uiga i isi mataupu i tulaga e masani ai. Faataitai le talanoa saoloto atu e uiga i au gaoioiga masani o le olaga mai lea aso i lea aso. E mafai ona e faia lenei mea i soo se taimi tou te faatasitasi ai, e pei o taimi o taumafataga po o le taimi o le moe.

Ata

conversation

A Ua E Talanoa Loa

Talanoa e uiga i le tulafono o le ola mama. E mafai ona fesoasoani le fesili atu i ou matua e uiga i lo laua malamalamaaga i le tulafono o le ola mama. Afai ua e solia le tulafono o le ola mama, e mafai ona avea ou matua ma se punavai o le lagolagosua a o e salamo ma fesootai ma le Faaola. Fesili i ou matua e uiga i o laua aafiaga i le mauaina o le olioli e ala i le salamo.
Ia onosai ia i laua. Atonu e lagona foi e ou matua le faafaigata ona talanoa ma oe e uiga i le tulaga feusuai i le taimi muamua. Ae la te fia fesoasoani ia te oe, ma o le a faigofie atu pe a faaauau pea ona e tautala.
Aua le fefe e faia soo au talanoaga ma ou matua. A o gasolo le taimi, atonu e tele atu nisi au fesili. E le faapea o se mea e faatasi ona fai.

E Mafai ona e Faia Lenei Mea

I le taimi muamua atonu e faigata le talanoa atu i ou matua po o se isi tagata matua faatuatuaina. Ia manatua, e finagalo lou Tama Faalelagi ia e sauia e atiina ae se sootaga maloloina i le avea ai ma se tagata matua. O se vaega o au sauniuniga e aofia ai le malamalama i tulaga feusuai lelei ma le aoaoina pe faapefea ona talanoa i ai i le taimi nei. E mafai ona fesoasoani le Tama Faalelagi ia te oe e talanoa i ou matua e uiga i feusuaiga ma isi autu faigata a o e aapa atu ia te Ia.