O Ia o le Ala

O le soifuaga, faataitaiga, ma le taulaga a Iesu Keriso e totonugalemu i lo tatou faaolataga. E ala i le mulimuli ia te Ia, e mafai ai ona avea i tatou e faapei o lo tatou Tama Faalelagi ma toe foi atu ai i Lona afioaga.

Togiola

Na faasaoina e Iesu Keriso i tatou taitoatasi mai le oti ma le agasala. Sa puapuagatia o Ia ma le loto i ai mo a tatou agasala i Ketesemane ma luga o Kalevaria. Ina ua mavae le maliu ai i luga o le satauro, sa toetu mai o Ia. Na faatoilaloina e Lana Togiola le oti faaleagaga ma le faaletino. E ala i Lana Togiola, ua faaolaina ai e Iesu i latou uma o e talitonu ma “e ua i ai le loto momomo ma le agaga salamo” (2 Nifae 2:7).

Tagai foi i le Isaia 26:19; 2 Nifae 9:5–7, 10–12; Mose 5:14–15.

Faamasino

Ona o Lana Togiola, ua malamalama ai ma le atoatoa Iesu Keriso ia i tatou ma o le a avea ma o tatou faamasino. “Aua tatou te tutu atu uma lava i luma o le nofoa faamasino o Keriso e tatau ai” (2 Korinito 5:10). O le a faamasinoina i tatou i mea sa tatou faia ma mea ua avea ai i tatou.

Tagai foi i le Ioane 5:22; Faaaliga 22:11–12; 2 Nifae 9:15–16.

Fautua

O se fautua, o se tasi e tu mo se isi i le taimi o se faamasinoga. O Iesu Keriso o lo tatou Fautua. Ua Ia lagolagoina i tatou mai le amataga ma o le a talosaga mo i tatou i luma o le Tama. O le a faamalieina e Iesu “manaoga o le faamasinotonu” (Mosaea 15:9) mo i latou uma o e salamo ma talitonu ia te Ia. Talu ai o Iesu o le puluvaga i lo tatou va ma le Atua, ua tatou maua ai le avanoa e maua ai le ola e faavavau.

Tagai foi i le 1 Timoteo 2:5; Eperu 9:15; 1 Ioane 2:1; Mataupu Faavae ma Feagaiga 45:3–5; Mose 7:39.