Auauna Atu ma Apa Pai Moa
Na fesoasoani mai au uo ia te au ia lagonaina le alofa o lo’u Tama Faalelagi ina ua matuai ou manaomia ona lagonaina.
Ata na tusia e Allen Garns
Ina ua maliu faafuasei lo’u tina i le 61 o ona tausaga, sa matuai faateia lava au. O ia o la’u punavai o le alofa, mataalofa, lagolagosua, malosi, ma le ataata. Sa ou lagonaina sa faoa mai ia te au lo’u tina, ae o la’u fanau e toatolu na faoa mai lo latou tinamatua. Sa ou lagona foi le ita i le Tama Faalelagi. E faapefea ona Ia faia lenei mea ia i matou?
Mo sina taimi, ou te ala ae i le ogatotonu o le po ma e le mafai ona toe moe. I se tasi taeao, sa ou ala ae i le 3:00 i le vaveao. O le faamoemoe e faatosina ese atu au lava mai lo’u olaga e aunoa ma lo’u tina, sa ou tilotilo ai i la’u telefoni ma ou maua ai se vitio o se kuka i luga o a’u talafou i le initoneti. O ni faataitaiga o meaai mananaia e kuka i le fale: apa pai moa. Sa ou mafaufau i le ofoofogia o le i ai o se apa pai moa, ae ou te lei lagonaina le fia saunia o ni meaai mo lo’u aiga e ese mai le sasaa o le susu i totonu o se pesini siliō. Mo le taimi nei, e tatau ona ou le faia se meaai manaia i le fale, po o le sao lea i lou mafaufau.
I se tasi aso na sosoo mai ma leisi aso, na aumai ai e au uo e toalua ia te au ni apa pai moa. Sa ou matuai tagi lava. Sa matuai o’u ootia lava i lo laua agalelei. Sa ou iloaina e le o se mea na tupu fua lenei mea. Na toe faamautinoa mai ia te au o loo manatu mai le Atua ia te au, e alofa o Ia ia te au, ma sa Ia popole i lo’u manao faatauvaa mo se apa pai moa e ui sa ou ita ia te Ia. Sa ou manaomia tele lenei faamanatu.
Ou te faafetai mo na uo na aumaia ia te au apa pai moa. Sa la auauna mai ia te au i ni auala e le mafai ona la mafaufauina. Sa la fesoasoani ia ou lagonaina le alofa o lo’u Tama Faalelagi ina ua ou matuai manaomia ona lagonaina.
O lenei aafiaga na aoaoina ai au i le taua o le iloaina ma le mulimuli i uunaiga mai le Agaga Paia. E mafai ona avea i la’ua ma tali o se tatalo a se tasi o loo tauivi.
E le tatau ona tatou faatagaina a tatou le mautonu po o masalosaloga e taofia ai ala e auauna atu ai i isi. Tau ina ia tatou taumafai e le aunoa e avea ma se meafaigaluega i aao o le Alii ma faasoa atu Lona alofa i isi.