Auaunaga e ala i le Ola Tutoatasi

O le fesoasoani atu i isi ia ola tutoatasi o le saunia ma le auauna atu lea i le ala a le Alii.

Ata

woman cutting stained glass pieces

O le toatele o tagata o o tatou aiga, uo, ma tuaoi ua fiafia tele e avea ma tagata ola tutoatasi. O le faaaogaina o fuafuaga mo le ola tutoatasi a le Ekalesia, ua sailia ai e tagata o le Ekalesia ni avanoa e auauna atu ai, tausia, ma auauna atu ai a o latou faamanuiaina isi i mataupu faavae lea e aumaia ai le “faamoemoe sili atu, filemu, ma le alualu i luma.”¹

“Sa Ou I Ai i le Aiga”

Saunia e Chrissy Kepler, Arisona, ISA

Sa ou tauivi ma tulaga tautupe i le mae’a ai o se teteaga, i le taumafai ai e toe foi atu e faigaluega i le mavae ai o le valu tausaga o avea ma se tina e nofo i le fale. Sa ou tauivi foi faaleagaga, sailia o le upumoni ma le faatuatua, e ui ou te lei tuvae i totonu o se falesa talu mai lo’u talavou.

I se tasi Aso Sa, sa faia ai lau tagamea i le fale o lo’u uso matua, o Pisila, o se tagata toaga o le Ekalesia. A o ou i ai iina, na valaaulia au e Pisila ou te auai i le lotu ma lona aiga—o la’u valaaulia muamua lea i le silia ma le 15 tausaga.

Sa ou musu muamua, ae o le po na muamua atu, sa ou aioi ai i le Atua e faaali mai ia te au le ala ou te latalata atili atu ai ia te Ia. Ina ua uma ona ou lagonaina se uunaiga mai totonu, sa ou faaiuina ai, “Aisea e te le alu atu ai e faalogo ma vaai mo oe lava, o se tagata matua faatasi ma lou loto ma ou mata?”

A o matou i ai i le sauniga faamanatuga, sa ou matauina se faasalalauga i le puletini o le Aso Sa o le faasilasilaina o se kosi o le ola tutoatasi i tupe patino. Sa ou le saunia e toe foi i le lotu, ae sa ou tosina atu i le kosi e 12-vaiaso. Faatasi ai ma se faamalosiauga mai lo’u uso ma lo’u tuagane faaletulafono, sa ou lesitala loa, ma le faamoemoe e aoao na o le auala e fai ai se paketi ma totogi ai le aitalafu. Peitai, o vasega na suia ai au faaleagaga.

Sa ou maofa i savali faaleagaga i le lua vaiaso muamua o le vasega, ae i le taimi o le vasega lona tolu, sa lofituina au i se lagona o le faamautinoaga e faapea, sa ou i ai i le aiga ma faalogologo i ni upumoni fou ae [ou te] masani ai. Sa ou tuua le vasega ma alu atu sa’o loa e vaai Pisila. I loimata, sa ou fesili atu ia te ia, “E faapefea ona ou maua atili nei lagona i lo’u olaga?” Sa ia faatulagaina loa faifeautalai e amata ona aoaoina au.

Na o mai tagata o la’u vasega o le ola tutoatasi i au lesona ma faifeautalai ma lagolagoina au. Sa latou faia se aafiaga tumau i lo’u faaleagaga ma fesoasoani ai ia te au e atiina a’e se molimau i le talalelei ma perofeta o aso nei.

I le taimi na ou faamaeaina ai le kosi, sa ou faia ai ni suiga faaletino ma faaleagaga. Sa ou amataina se matātā fou ma se kamupani lelei, ma sa ou totogiina uma ni nai nonogatupe.

Ae o faamanuiaga loloto, ma sili ona suamalie na aumai e le kosi, na aofia ai le fatuina o faauoga matagofie, atiina a’e o se mafutaga lelei ma se epikopo faamalosiau, mauaina o se molimau e uiga i le sefuluai, mauaina o lo’u pepa faataga o le malumalu, mauaina le faaeega paia, ma le vaaia o la’u fanau matutua e toalua ua papatiso.

O lo’u auala i le ola tutoatasi o loo faaalia pea lava, ae mo le vaega o totoe o la’u malaga, o le a ou faatauaina lesona na ou aoaoina ma faauoga na ou faia.

Valaaulia, Auai, Faamalosia

Ina ia fesoasoani i Au Paia o Aso e Gata Ai ia ausia le ola tutoatasi—i mea tautupe ma le faaleagaga—na amata ai e le Ekalesia ia galuega taulamua mo le ola tutoatasi i le 2014. A mae’a se faigalotu tomua, ona filifili lea o tagata auai mai i kosi eseese e fa e 12-vaiaso.

Ona o vaega o le ola tutoatasi e faagaoioia o se aufono, latou te ofoina atu se avanoa lelei e auauna atu ai i manaoga tau tupe, aoaoga, tomai faapitoa, ma manaoga faaleagaga. O tagata o le vaega e aoao mai, fetufaai ma, ma lagolago e le tasi le isi. Latou te faasoa atu foi manatu ma e tali atu le tasi mo le isi.

Tatalo po o ai tagata o le aiga, uo, po o tuaoi e mafai ona e valaaulia i se kosi o le ola tutoatasi, ma auai faatasi ma i latou. Ia manatua o aoaoga faavae o le ola tutoatasi e mafai ona faamanuiaina ai fanau uma a le Atua, e tusa lava pe o i latou o ni tagata o le Ekalesia pe leai.

Ata

people sitting in meetings

“Na Ou Tuua Vasega Taitasi ma Lagona o le Alofagia”

Ina ua asiasi atu o ia i le Lotoa o le Malumalu i le Aai o Sate Leki, Iuta, faatasi ai ma lona atalii e 10 tausaga le matua, o Vincent, ia Tesema 2016, sa manatu Katie Funk o ia o se tagata ua “mautonu lona iloa.” Sa ia tuua le Ekalesia i le 16 o ona tausaga, avea ma se tina nofo toatasi i le 17, na amata ona tatā pe’a, ma amata ona fiafia i le kofe. Ae i le taimi o lena asiasiga i le Lotoa o le Malumalu, na lagona ai e Vincent le Agaga Paia ma fesili atu ai i lona tina pe mafai ona fai ana lesona e faifeautalai.

E ui i ana galuega e lua, e 80-itula faigaluega i le vaiaso, sa suesue faatasi e Katie le talalelei ma Vincent, ma sailia tali i ana fesili i le va o asiasiga a faifeautalai. E oo ane i le taumafanafana o le 2017, sa amata ona ia auai i sauniga Lotu, lea na ia aoao ai e uiga i le kosi o le ola tutoatasi a le Ekalesia.

“Sa ou iloaina sa avea i latou ma se mea e mafai ona fesoasoani ia te au,” o lana tala lea. “Atonu e le manaomia ona ou faigaluega i ni galuega se lua po o le faalagolago i ou matua mo le taimi o totoe o lo’u olaga.”

Na ta’ua e Katie lana kosi o le “matuai faamalosia faaletino ma le faaleagaga,” e le na o mea sa ia aoaoina ae ona o le auala na taliaina ma auauna atu ai lana vaega o le ola tutoatasi ia te ia.

Auala e Mafai ona E Fesoasoani Ai

Ata

man in workshop

O nisi nei o manatu mai ia Katie i auala e mafai ona tatou faia ai fuafuaga mo le taulamua a le Ekalesia mo le ola tutoatasi, o se avanoa e auauna atu ai faaleagaga ma faaletino:

“Ou te iloa ua ta’ua soo, ae aua le faamasinoina se tusi i lona faavaa. O le mea moni na mafai ona ou alu i lena kosi ma lē lagonaina le faamasinoina e isi o se aafiaga tele lava.”
“Tuu atu le lagolago ma le faamalosiauga. Sa lagolagoina au e la’u vaega i se auala sa ou tuua ai vasega taitasi ma le lagonaina o le alofagia.”
“Faasoa atu lou aafiaga. O le faamaoni ma le manatu tatala sa ia i matou mo tagata taitoatasi na lelei atili ai le faalogona o o matou loto. E te le iloa lava po o ai o le a faamanuiaina mai mea e te faasoaina atu.”
“Ia faaleo. “Ou te faaleo a’u i le auala e sili atu ai ona lelei lo’u olaga aua ou te totogiina la’u sefuluai ma alu i le lotu. Ou te aveina la’u tusi o le Tupe Patino mo le Ola-Tutoatasi i la’u galuega o se fomai o le amio. Pe a talafeagai ai, ou te faasoa atu ni ona mataupu faavae i isi.”
“Alu i se vasega o le ola tutoatasi mo oe lava, ae vaavaai mo i latou o e atonu o loo manaomia lau fesoasoani. Sa tatau ona ou misia le toeitiiti afa o vasega ona o se suiga i la’u galuega atofaina, ae sa fesootai mai pea tagata o la’u vaega ma faamalosiau mai ia te au. Sa maoae le lagona e faapea, o loo ou auai pea e tusa lava pe ou te le i ai iina.”

Mamanu i tua atu mai le Getty Images

Tupe Patino mo le ola-tutoatasi

Aoaoga mo se Galuega Lelei mo le ola-tutoatasi

Saili se Galuega e Sili Atu mo le ola-tutoatasi

Amataina ma le Faaolaina o la’u Pisinisi mo le ola-tutoatasi

O nei tusi lesona e mo kosi e fa o le ola tutoatasi a le Ekalesia. Mo nisi faamatalaga, fesili i lou epikopo pe asiasi i le srs.ChurchofJesusChrist.org.