Fesili & Tali
E faapefea ona e iloa ua faamagaloina oe e le Tama Faalelagi?
Lagonaina o le Agaga
Ua ou iloa ua faamagaloina au i soo se taimi lava ou te lagona ai le Agaga. Aemaise lava i le avea ai ma se faifeautalai, e taua i taimi uma le i ai o le Agaga i o tatou olaga. Afai tatou te ola amiotonu, o le a tatou maua pea le Agaga e faatasi ma i tatou, ma o le a Ia fesoasoani ia i tatou ia iloa o tatou tulaga ma le Atua.
Elder Bakker, 23 tausaga, Misiona a Pasila Vitoria
Faamautinoaga Ua Faatasi Keriso ma A’u
I le Faatoaga o Ketesemane, sa onosaia ai e Iesu Keriso ia tiga ma agasala uma o le lalolagi ina ia mafai ona faamagaloina a tatou agasala ma i se aso o le a agavaa ai e ulu atu i le malo selesitila. Ou te lagona le faamagaloina pe a ou lagona se faamautinoaga o loo faatasi Keriso ma au ma o loo pa’i mai ia te au faaleagaga.
Alex H., 15 tausaga, Idaho, ISA
Alofa ma le Fiafia
Ou te fiafia i le meaalofa o le salamo aua e masani ona ou lagonaina se lagona lofituina o le tausalaina ma le lototiga i taimi uma lava ou te faia ai se mea sese. A ou faaaluina le taimi e tootuli ai ma ole atu i lo’u Tama Faalelagi mo le faamagaloga ma le loto faamaoni, ua lofituina au i se lagona malosi o le alofa, filemu, ma le fiafia! Ua ou le toe lagonaina le tuuatoatasi, ma o le auala lena ou te iloa ai ua faamagaloina au e le Tama Faalelagi.
Brynlee H. 17 tausaga, Iuta, ISA
Filemu i Lo’u Loto
O le lagonaina o le filemu i lo’u loto o le auala lea ua ou iloa ai ua faamagaloina au. O le a ou manatua pea sa ou faia se mea sese, ae ua fesoasoani lenei mea ia te au e aoao ai ia aua nei toe faia. Ua tuuina mai e le Alii se folafolaga ofoofogia, “Faauta, o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou” (Mataupu Faavae ma Feagaiga 58:42).
David E., 19 tausaga, Chihuahua, Mekisiko