O Tatou Aiga, O Tatou Auaiga
O Auala e Pulea ai Masini Tekinolosi ma Toe Aumai ai Lou Aiga
O motugaafa nei e fitu e faamautinoa ai o masini tekinolosi o a tatou auauna ae le o o tatou matai.
Atapue mai le Getty Images
Vaai faalemafaufau i ata faataitai nei:
-
O se aiga o loo saofafa’i i se faleaiga, o loo faatalitali mo a latou meaai, ae nai lo le talanoa i le tasi ma le isi, o loo siōa uma i a latou telefoni.
-
E lagona e se talavou le le atoatoa ma le tuuatoatasi a o ia vaavaai atu i faatinoga e faatautaia lelei ma le faaeteete a lana tupulaga i luga o ala o faasalalauga faaagafesootai.
-
O se teineitiiti i le paka o loo taumafai e aumai lona tamā ia tilotilo atu mai lana telefoni ma gauai atu ia te ia.
-
O se tane na te siakiina pea faailoilo o taaloga i luga o lana uati poto a o talanoa atu lona toalua ia te ia.
-
O se alii talavou o loo ia siakiina pea feau tusitusia i le taimi atoa o le lesona faaleaiga.
O nei faataitaiga taitasi—ma le tele o isi e le masalomia na e oo i ai—o ni mala laiti. O telefoni poto ma isi masini tekinolosi o ni faamanuiaga ma se fetuu. Latou te faafesootaia i tatou i se lalolagi maoae o faamatalaga. Latou te fesoasoani ia i tatou e fai talafaasolopito o aiga, suesue i tusitusiga paia, ma talanoa ma aiga i mea mamao e tele. Ae a le puleaina lelei, e mafai foi e masini tekinolosi ona faasalaveia sootaga faaleaiga ma aafia ai lo tatou soifua maloloina faalemafaufau, faaleagaga, ma le faaletino.
O Tulaga Faalata o Tekinolosi
I le avea ai ma se fomai o faaipoipoga ma aiga, ou te molimauina luitau tuputupu pea o tagata faamaoni o loo faatautava i lau mo le tosina atu o e pele ia i latou. O se faalata maoae. O masini tonu lava sa tatau ona fesoasoani e fesootai ai ma faaleleia atili ai a tatou sootaga, i nisi o tulaga, ua faia ai ni mafutaga papa’u ma tuua ai tagata i le lagonaina o le le mautonu. O le mea moni, o le toatele o tagata sailiili o loo iloaina le faatupulaia o lipoti o le atuatuvale, popolevale, saua, ma le pule i le ola, e i ai se sootaga ma le faamai pipisi o le tuuatoatasi, e aumaia i totonu, i se vaega tele, i le faateleina o le faaaogaina o masini faaeletonika patino.1
I o tatou aiga, e ui lava atonu e faatasitasi tagata uma i le tino, pe a leai ni masini, e vave lava ona latou maua lagona o le tuuatoatasi ma le faaesea. Afai e tatau ona tatou fausia se tasi ma se sootaga i a tatou sootaga faaleaiga, e tatau ona tatou iloa le vaevaeina o le mafaufau lea e tupu pe a osofa’i e masini a tatou faatasiga faaleaiga.
Tatou te le manaomia ona soona tali atu ma aveesea atoa ai le tekinolosi mai o tatou olaga. Nai lo lena, e manaomia ona tatou tuuina tekinolosi i lona tulaga tatau ai ina ia tautuaina ai a tatou sootaga nai lo le soloia ai.
O Mailei a se Lalolagi Komepiuta
O le faatofuina o i tatou lava i a tatou masini ua tuuitiitia ai le lalolagi faaletino o loo siomia ai i tatou—ma ona leo uma, faitino, vaaiga, ma le anoanoai o isi faalogona—ma fefaatauai nei mea mo se lalolagi faafoliga lea e le faafesootaia i tatou i o tatou tino ma lo tatou siosiomaga. O se taunuuga, atonu tatou te misia ni faailo faaletino taua lea e tau mai ai ia i tatou mea tatou te manaomia ina ia maloloina ai. Mo se faataitaiga, o le taimi soona faaalu i masini e mafai ona taofia ai i tatou mai le matauina o loo tatou vaivai, fiaaai, po o le atuatuvale.
O lena ituaiga taumamao mai le lalolagi faaletino e mafai foi ona faavaivaia ai lo tatou lagona o le olioli. O loo i ai se eseesega tele, mo se faataitaiga, i le va o le mauaina o se imoti [emoji] ‘ata i luga o se lau ma le aafiaga patino i se ‘ata fiafia o se tasi e pele.
O le Manaomia o Tausimea o Tekinolosi
O masini tekinolosi e mamanuina ia faatosina ma e faigata ona tuuina i lalo. O le mea moni, o le tele o le au fai polokalama ma tagata fai telefoni e taulai atu ma le faamoemoe i lo tatou vaivai faaletagata e faatumauina ai lo tatou siakiina ma le faasolosolo o faamatalaga faifai pea.2
O lenei faalagolago i masini e matua taatele lava ma e faigofie ai ona le amanaia le aafia ai o i tatou. O le mea lea, e manaomia ai e le autalavou ia tagata matutua o e e mafai ona faia se faataitaiga o le faaaogaina tatau o nei masini ma mafai ai ona aoaoina fanau e uiga i o latou aafiaga.
E pei ona aoao mai Peresitene M. Russell Ballard, o le Sui Peresitene o le Korama a Aposetolo e Toasefululua, o masini tekinolosi “e tatau ona avea ma a tatou auauna, ae le o o tatou matai.”3
Faatasi ai ma lena mea i le mafaufau, o ni motugaafa nei e fitu e taulima ai a tatou masini tekinolosi:
1. Ia pei o le Faaola: tuuina atu le gauai atoatoa.
Sa faaali mai e le Faaola ia i tatou foliga moni e tatau ona i ai ina ia i ai faatasi ma isi e aunoa ma le faalavelaveina. I Lana galuega atoa, sa taulai atu lava o Ia i tagata taitoatasi (tagai i le Mareko 5:25–34; 35–42; Luka 19:2–8)—Na tuu atu e Keriso Lona gauai atoa ia i latou uma. Ina ua Ia faaali atu i tagata sa Nifae Ona manua, sa lei faanatinatia e Ia le faagasologa. Ae, o tagata na “o atu i luma taitoatasi seia oo ina latou o atu uma” (3 Nifae 11:15; ua faaopoopo le faamamafa).
A o tatou faataitai i lenei faiga, tatou te aoaoina a tatou fanau i le auala moni e i ai i le nofoaga e tasi i le taimi nai lo le vaevaeina o o latou mafaufau i le va o masini ma i latou o siomia ai i latou. A e talanoa ma se tasi, aemaise lava o se tamaitiiti po o le toalua, tuu atu ia i latou lou manatu atoa e ala i le tuu ese o lau telefoni.
O le mea e faanoanoa ai, ua avea ma se masani le liliu ese mai ia i latou tatou te alolofa i ai e tali atu i se tusiga ma tali atu i manaoga o se isi tagata. O lenei mea e mafai ona i ai se aafiaga le lelei i a tatou sootaga ma e ono auina mai ai se savali e lei fuafuaina e faapea, e le taua tele le tagata o loo i o tatou luma.
Fai se tautinoga ia i latou o loo i ou luma o loo faamuamua i latou nai lo o mea faalavelave mai i a outou telefoni po o masini. Tilotilo atu i o latou mata. Faalogo e pei ona faia e le Faaola. Taulai.
2. Tolopo le tuuina atu i tamaiti o telefoni poto ma faitotoa o ala o faasalalauga faaleagafesootai.
Ia faatuai ona tuuina atu ni telefoni poto ma le auai i ala o faasalalauga faaleagafesootai seia oo ina lava ni tomai tau fesootaiga e atiina ae e tamaiti ma talavou, e pei o le faalogo, faafesootai o mata, faaalia o le malamalama, ma le nofouta i isi. A o lei ulufale atu tamaiti i le lalolagi o tagatanuu o tekinolosi, e taua mo i latou le faataitai o ni tagatanuu lelei e ala i le faaaloalo ma fesootai atu i isi.
O se tasi o mafuaaga e avea ai le averesi o le matutua o le mauaina o ponokalafi i le 11 tausaga le matua4 (ma, i le tele o tulaga, e itiiti ifo) e faapea, e toatele tamaiti e tuuina atu i ai telefoni poto a o laiti lava. Ia manatua foi le mea lenei: e tusa lava pe ua lava le matutua o lau fanau mo faitotoa o ala o faasalalauga faaleagafesootai, ae e le faapena le toatele o isi tagata i luga o le initoneti o e o le a mafai ona maua ia tala faaagafesootai o lau tama.5
Atapue mai le Getty Images
3. Fausia ni tulafono faaleaiga ma faia ni tapulaa.
Fatu ni tuaoi manino i lou aiga mo le taimi e faaaoga ai telefoni ma masini ona aveese lea.
O se tasi o fautuaga malosi: valaaulia tagata uma o le aiga ina ia fuafuaina le faia soo o ni malologa mai a latou masini. Atonu e mafai ona e filifili se nofoaga e tuu i ai, se mea o le a le faigofie ona au atu ai—o se ato i le umukuka, mo se faataitaiga.
Sa tonu i se tasi o aiga o masini e manaomia le palaka i totonu ma faataatia ese pe a uma le taumafataga o le afiafi ina ia mafai ai ona taula’i atu tagata o le aiga i le faaaluina faatasi o le taimi ma ia le faalavelaveina.
Pe a tatou faatulagaina ni tapulaa i a tatou masini, o le a amata ona lagona atili e tagata o o tatou aiga le sootaga sili atu.
4. Aua le tiumasani i feau tusitusia.
Pe a faasoa atu ni lagona loloto po o manatu taua ma isi, ia latalata i aafiaga o loo i ai i tagata e pei ona tuuina atu e lou tulaga. Afai e le mafai ona faia ni fesootaiga faafesagai, ona taumafai lea e fai se telefoni vitio ina ia mafai ai ona e vaai ma faalogo i le tagata. Afai e le o se filifiliga lena, ona fai lea o se valaau i le telefoni ina ia mafai ona e lagonaina le leo o le tagata.
5. Aloese mai i le faasolosolo ma taaloga lē ‘anoa.
E faigofie lava ona gauai ma le lē manatu i ai i a tatou masini e mapu i ai, faalavelaveina, ma mea malie. Ia tetee atu i le faatauanau. Nai lo lena, tuu i lalo lau masini ma fai se mea e faagauai mai ai ou lagona, e pei o le alu i fafo.
Ia Iuni 2018, na valaaulia ai e Peresitene Russell M. Nelson le autalavou o le Ekalesia “ia aloese mai le faalagolago faifaipea i luga o ala o faasalalauga faaleagafesootai e ala i le faia o se anapogi e fitu aso mai ala o faasalalauga faaagafesootai.”6
I le avea ai ma matua, e mafai ona e faia le valaaulia lava lea i totonu o lou aiga, o le faia o ni taimi e anapogi ai mai taaloga, ala o faasalalauga faaagafesootai, po o isi mea faatekinolosi e faalavelaveina ai.
6. Ia faamasani oe lava ia aua nei e vave tali atu.
Mafaufau pe e manaomia lou vave tali atu i savali uma ma faailoilo. O loo aoaoina i tatou e a tatou masini e talitonu o faalavefau uma e faanatinati ma taua, lea e mafai ona tata’i atu i ai o tatou mafaufau mai mea e sili ona taua. Taumafai e faifai lemu ma tolopō lou tali atu i feautusitusia ina ia mafai ai ona e auai i le tele o taimi ma nofouta i e o siomia oe. Na matauina e Elder David A. Bednar o le Korama a Aposetolo e Toasefululua o nisi i le Ekalesia “e le amanaiaina sootaga e faavavau mo mea faalavelave faatekinolosi, liua vave, ma auala alo e le umi se aoga tumau.”7
7. Fausia ni sone o le leai o ni tekinolosi.
Ia filifili avanoa paia e le faatagaina ai ni masini. Mo se faataitaiga, sa filifili se tasi o aiga afai latou te malaga faataamilo i le taulaga, e le faatagaina telefoni ma masini i totonu o le taavale ina ia mafai ai e tagata o le aiga ona talanoa atu i le tasi ma le isi. O nei ituaiga o tuaoi e mafai ona maua ai le gauai atu ma le sootaga lagolago, lea e mafai ona puipuia ai lagona tuuatoatasi i aiga.
Faapaiaina o o Tatou Aiga
O le faia o o tatou aiga o se malutaga mai le lalolagi e manaomia ai taumafaiga ma le mataala, aemaise lava i le tele o mea faatekinolosi faatosina o siomia ai i tatou. Mo le lelei o a tatou mafutaga faaleaiga ma le soifua maloloina, e aoga ai taumafaiga uma.