E Faapefea, o Afea, ma Aisea: Talanoa i Lau Fanau e uiga i Tulaga Feusuai
Ina ia fesoasoani i a tatou fanau ia saunia ma olioli i tulaga feusuai i lona matagofie ma le ofoofogia i totonu o le faaipoipoga, e manaomia ona tatou taialaina i latou a o latou galulue agai i le puleaina o o latou lagona na tuuina mai e le Atua.
Ata mai le Getty Images, faatinoina e tagata e faataitaia
Afai e te fesili i le autalavou, “O le a le tulafono o le ola mama?” atonu e te maua se pupula to’a, pe atonu o le a i ai se tulaga lē mautonu ma vave ona sii mai se faamatalaga faapea, “o lona uiga e le faia ni sootaga faalefeusuaiga a o lei faaipoipo.” O lo matou aafiaga, o le toatele o tupulaga talavou e lei oo lava i ni faiga feusuaiga a o lei faaipoipo ae matua le malamalama lava i le uiga atoa ma le faamoemoega o le tulafono o le ola mama po o tulaga feusuai—o feeseeseaiga e masani ona tele, o le faanoanoa, e taunuu i tauiviga faale-faaipoipoga i le lumanai. O la tatou sini o ni matua ma taitai e tatau ona fesoasoani ia tatou fanau ia mama ma saunia i latou lava i tulaga feusuai uma.
Mafaufau i Itu Uma o le Tulafono
O vaega faaletino o le tulafono o le ola mama (mo se faataitaiga, ia le faia ni feusuaiga a o lei faaipoipo ma le faamaoni aiai pe a uma ona faaipoipoina) e totonugalemu ma taua. Ae peitai, o le le faia o ni feusuaiga i nisi o taimi e tele lava ina talanoaina soo, nai lo vaega faalelagona ma faaleagaga o le olioli ma le matagofie o le sootaga vavalalata faalefeusuaiga i le faaipoipoga, faapea foi ma le filemu lea e sau mai le ola ai i se olaga o le amiomama ma le mama aiai a o lei faaipoipo ma pe a maea ona faaipoipo.
E le gata i le foafoaina o fanau, o le sootaga vavalalata i tulaga feusuai i le faaipoipoga e i ai se isi faamoemoega taua. Sa faamalamalama mai e Elder David A. Bednar: “O na sootaga [o feusuaiga] … ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimataia ma le manatu faapito. E le o se osigātoilalo e ausiaina pe ua na o se taga e faatino. Ae, ua latou i ai i le olaga faitino o se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava.”1
Ina ia mafai ona fesoasoani i a tatou fanau ia saunia e olioli i le sootaga vavalalata faalefeusuaiga i lona matagofie ma le ofoofogia i totonu o le faaipoipoga, e manaomia ona tatou fesoasoani ia i latou ia malamalama i lo latou atinaega faalefeusuaiga ma taialaina i latou a o latou galulue i le puleaina o o latou lagona ma faalogona na tuuina mai e le Atua.
Afai e te popole e te lei talanoa vave ma lau fanau e uiga i le tulaga faalefeusuai po o i ni auala sao, e le o tuua na o oe. E tele mafuaaga e mafai ai ona avea nei talanoaga ma luitau. Peitai, e le o tuai lava ona amata aoao atu. O loo i lalo ni motugaafa se tolu e fesoasoani ia te oe e amata ai:
1. E Faapefea ona Talanoa atu e uiga i Tulaga Feusuai
O se tasi o elemene taua o talanoaga maloloina a matua ma fanau e uiga i tulaga feusuai o le faamalosia faalauaitele lea o se amio o le talanoa saoloto. Ua fautuaina e suesuega, o le autalavou e tele ina maua mai a latou faamatalaga e uiga i tulaga feusuai mai ala o faasalalauga po o a latou uo ae peitai latou te mananao e maua ni faamatalaga mai o latou matua.
Na saunoa Peresitene M. Russell Ballard, o le Sui Peresitene o le Korama a Aposetolo e Toasefululua: “A o ola ae a tatou fanau, latou te manaomia faamatalaga e aoaoina mai e o latou matua e sili ona tuusao ma manino ai e uiga i mea e talafeagai ma lē talafeagai. E manaomia e matua … ia talanoa manino atu i [a latou fanau] e uiga i feusuaiga ma le aoaoga o le talalelei e faatatau i le ola mama. Ia avea lenei faamatalaga e sau mai matua i le fale i se auala talafeagai.”2
Ina ia faia se fesootaiga e le taotaomia, e mafai ona e:
-
Amata pe a laiti lau fanau e ala i le valaauina o vaega o le tino e ala i o latou igoa sao. E aoaoina e lenei mea tamaiti e uiga i o latou tino ofoofogia ma tuuina atu ia i latou le gagana latou te manaomia ona maloloina ma logoina ai.
-
Tuu atu i lau fanau ia iloa e mafai ona latou fesili atu ia te oe i soo se fesili, ona e taumafai lea e aua le soona tali atu pe faapipii le maasiasi i a latou fesili po o ni mea e ta’uta’u atu. Ia faamanatu atu o loo latou talanoa atu ia te oe, faaali atu ia i latou le alofa ma le lagolago, ma ia fai le mea sili e te mafaia e tausia ai laina o fesootaiga ia matala pea.
-
Aloese mai le faaaogaina o upu faafaatusa mo tulaga feusuai. E manaomia e fanau ni faamatalaga e tuuina mai i se auala manino ma faamaoni. Mo se faataitaiga, o nisi o le autalavou o loo faamatala ni lesona lea e faatusaina ai le solia o le tulafono o le ola mama i le lamu pulu po o meaai e faasolo mai lea tagata i lea tagata i le potu ma o lea ua le toe manaomia ai. E ui ina mataina lelei, o nei ituaiga o upu faafaatusa e masani ona faalauiloa mai ai le fefe i feusuaiga po o lagona o le maualalo po o le leai o se taua o le tagata lava ia, faalotovaivai ai le faamoemoe ma le filemu lea e maua mai i le salamo moni.
2. O Afea e Talanoa ai e uiga i Tulaga Feusuai
O le tele lava o matua e i ai se talanoaga e tasi ma le la fanau e uiga i tulaga feusuai. Ae ua tau mai e savali sese ua maua mai e le autalavou mai le lalolagi i aso nei—o nisi taimi i se tulaga i aso taitasi—e manaomia e fanau le sili atu ma le tasi le talanoa mai o latou matua.3 O fanau e sili ona aoga ai se auala mataala lea e mafaufau ai matua i tauiviga o le a feagai ma le fanau e uiga i tulaga feusuai ma faaauupegaina ai i latou i ni fuafuaga aoga.
I le talanoa ai e uiga i mea e ono tulai mai i ponokalafi, sa saunoa ai Sister Joy D. Jones, Peresitene Aoao o le Peraimeri e faapea: “O le vave o talanoaga ua sili atu ona lelei, ma o le a vave lava ona o mai fanau pe a latou iloa e alofaina i latou ma leai se mea latou te tautatala ai pe faia e mafai ona suia lena alofa. …
“Matua, e tatau ona tatou amataina le talanoaga ma aua nei faatali mo tamaiti e o mai ia i tatou. … Tatou te mananao i tamaiti ia lagona le saunia ma le faamalosi, ae le o le fefe. Tatou te mananao e talanoa ma i latou ae le o le ia i latou.”4
Ina ia sili atu ona faamoemoeina, e mafai ona e:
-
Fai ni lesona i afiafi faaleaiga e faatatau i autu e fesootai i tulaga feusuai ma tuu atu i lau fanau e aoao a o latou lagona ua saunia. O autu e ono aofia ai le tausaga talavou, ata o le tino, o vaaiga lelei o le tulaga feusuai, o le matautia o le faaaogaina o ponokalafi, o se mea masani le i ai o lagona feusuai, ma isi mea.
-
Fesoasoani i lau fanau e aumai ni fuafuaga faapitoa e tetee atu ai i faaosoosoga. Mo se faataitaiga, afai o loo tauivi lau tama ma ni mafaufauga po o ni amioga le mama, ia palepalealuga faatasi i le mea e fai pe a oo mai nei manatu. Mo se faataitaiga, usu se viiga, mafaufau i se mau, tatalo, auai i gaoioiga faamalosi tino, pe fai se taulima e faamanatu ia i latou e filifili le mea sao.
-
Aoao fanau i le ala e aloese ai mai tagata e lamatia ai faalefeusuaiga ma ia saogalemu. Manatua: taumafai e aua e te aoao atu e uiga i le saogalemu (lea e masani ona maua ai le fefe) i le taimi lava e tasi e te aoao atu ai e uiga i sootaga feusuai i totonu o le faaipoipoga; atonu e oo i tamaiti le fefe i vaega uma o le tulaga feusuai.
3. Talanoa e uiga i le Aisea o le Tulaga Feusuai
E masani ona mananao fanau e iloa pe aisea ua faamoemoeina ai i latou e fai ni mea. Aisea e tatau ai ona latou tausia le tulafono o le ola mama pe afai e i ai nisi tagata o siomia i latou e le faia? Pe a latou malamalama i mafuaaga o le i ai o faamoemoega, o le a sili atu ona latou teulotoina le fefaasoaai o le talalelei ma tulaga faatauaina faaleaiga. O le autalavou o e iloa pe aisea ua latou faia ai le tausiga o le tulafono o le ola mama lea e maua ai e lenei tautinoga le “ia le avea ma avega, nai lo lena, o se olioli ma se fiafia.”5
Afai tatou te mananao ia tatou fanau e tausia le tulafono a le Atua o le ola mama, e manaomia ona tuuina atu ia i latou mafuaaga e taua ai le tausia o lenei tulafono. E ao ona aoaoina i latou o le “tulaga feusuai o se meaalofa mamana mai le Tama Faalelagi ma e tatau ona faaaogaina i totonu o tuaoi sa ia faatuina.”6 O le malamalama pe faapefea e lenei “meaalofa mamana” ona atiina ae, o le a fesoasoani i le autalavou e faia filifiliga i le va ma o latou manao e tausia le tulafono a le Atua o le ola mama.
A o e talanoaina atinaega o feusuaiga ma lau tama, mafaufau i aoaoga nei:
-
O tulaga feusuai o se vaega ua fananau mai ma fanau taitasi a le Atua. Ua foafoaina i tatou “i le faatusa o le Atua” (Kenese 1:27), o lona uiga o o tatou tino, e aofia ai o tatou totoga feusuai, o se foafoaga paia.
-
O le lagonaina o lagona feusuai ma faalogona faalefeusuaiga o se mea masani. E le manaomia e fanau ona faatino na lagona ma faalogona ae nai lo lena, ia latou faaeteete. O lona uiga o le matauina o lagona feusuai ae le o le faamasinoina sese o i latou. O suesuega ua faaalia ai o le faatinoina o le faaeteete e mafai ona fesoasoani tatou te faia ai filifiliga sili ona lelei e fesootai ma o tatou tulaga faatauaina ma sini, e pei o le tausia o le tulafono o le ola mama.
-
O le pule i le tino e masani o se aafiaga muamua o le tamaitiiti i le tulaga feusuai ma e faia i le valea. E oo lava i tamaiti laiti e matele lava i le pai atu ia i latou lava, ma pe faapefea e matua ona tali atu i nei amioga i le popofou e mafai ona faatulagaina le tulaga mo le lagona o tagata talavou e uiga ia i latou lava ma o latou tulaga feusuai. E taua mo matua ona maua se paleni i le va o le fesoasoani i tamaiti ina ia malamalama i le mafuaaga o tua atu o poloaiga a le Atua i amioga feusuai e faia i totonu o se sootaga faale-faaipoipoga, ae le o le tali atu foi i le inoino po o le ita pe a aafia fanau i le tagotago ia te ia lava pe ua tautino atu e le autalavou ia le pule i le tino.
-
Afai e malamalama tamaiti i le mafuaaga e fesootai ai tulaga faatonuina e faatatau i sootaga ma feusuaiga (e aofia ai tafaoga faamasani, tauagafau, ola mama, ma isi mea faapena), o le a sili atu ona latou vaaia le atamai i tulafono a le Atua ma maua le uunaiga e tausia i latou. A o e aoaoina atu nei tulaga faatonuina, ia manatua e taua le faia o lena mea e aunoa ma le faia i le maasiasi po o le fefe.
Atapue mai le Getty Images
Faamamafa atu le Mana o le Togiola a Iesu Keriso
E pei lava ona muai aoaoina e a tatou fanau laiti le ala e savali ai, atonu e tautevateva le autalavou a o latou aoao e malamalama ma pulea o latou lava tulaga feusuai. E taua mo i tatou le manatua e faalauiloa atu ai le tuputupu ae nai lo o le tausalaina ma aoao ai fanau e mafai e Iesu Keriso ona faamanuiaina i latou i le alofa tunoa ma le mana ma le alofa mutimutivale e faamalosia ai i latou ma fesoasoani ia i latou e tumau i le mama i tulaga feusuai ma olioli ai i se aso i faamanuiaga o le sootaga vavalalata i feusuaiga i le faaipoipoga.
O le avea ai ma se matua e le faigofie. Ma o a tatou taumafaiga i le aoaoina o a tatou fanau atonu e le atoatoa i taimi uma, ae e mafai ona tatou faia le mea sili tatou te mafaia e aoao ai a tatou fanau e uiga i le meaalofa matagofie o sootaga manaoiloto faalefeusuaiga i le faaipoipoga. Afai tatou te lagona le le atoatoa, e mafai ona sili atu lo tatou lelei faatasi ai ma le fesoasoani mai a le Alii. Sa faapea mai Elder Jeffrey R. Holland o le Korama a Aposetolo e Toasefululua, “Faatasi ai ma le meaalofa o le Togiola a Iesu Keriso ma le malosiaga o le lagi e fesoasoani ia i tatou, e mafai ona tatou faaleleia atili, ma o le mea sili e uiga i le talalelei o le tauia o i tatou mo le taumafaiga, e tusa lava pe le faamanuiaina i tatou i taimi uma.”7