Filifiliina o le Alāata
Ae faapefea pe a na le toe manao Brooke e avea ma uo a Kamila?
“E puipui mai le Atua; ia oe!” (Viiga, nu. 148)
“Sa ou vaaia le faaaliga sili ona malie ananafi. E tatau ona e siakiina. Atonu e mafai ona ta matamata faatasi ai i se taimi!” Na fai atu ai Brooke.
Sa fiafia lava pea Kamila e talanoa ma lana uo mamae a o la savavali faatasi atu i le fale mai le aoga. Sa ia fiafia lava i le tele o mea la te tutusa ai.
“Manaia tele!” Sa faatofa atu Kamila ma savali atu i lona faitotoa pito i luma.
Ina ua mae’a le meaaoga a Kamila, sa ia kiina le televise ma maua ai le faaaliga sao. O le a malie tele le talanoa e uiga i ai ma Brooke taeao!
O le faaaliga sa mālie. Na faia e tagata ni mea malie ma fai atu ni tala tausua. Sa tele ina ata Kamila. Ae e le o mea uma na latou fai mai ai na malie. Sa latou fai mai ni upu na mafua ai ona faalogoina e Kamila e pei o loo osooso ni lane i lona manava. E le o ni upu lelei.
O le a se mea e tatau ona ou faia? sa ia mafaufau ai. Sa iloa e Kamila o nei upu sa le lelei. Ae sa ia fia iloa pe na faapefea le faaiuga o le faaaliga. O le a sana tala e fai pe a fesili mai Brooke ia te ia i le aso a taeao?
Faatasi ai ma se mapuea, na tapē ai e Kamila le televise.
Ina ua taunuu atu tina i le fale, sa fesoasoani Kamila ia te ia e tapena le laulau mo le taumafataga o le afiafi. “Na faapefea mai le aoga?” O le fesili lea a tina.
Sa tuu atu e Kamila ia tui ma sipuni. “Sa matuai manaia lava! Vagana … Sa tau mai e Brooke ia te au se faaaliga e matamata. Sa amata ona ou matamata ai, ae na i ai upu leaga. E lei lelei ni ou lagona e uiga i ai, o lea na ou tapeina ai.”
“E foliga mai sa e faia se filifiliga lelei tele.”
“Ae o loo manao Brooke e matamata faatasi i ai. O ma’ua o se uo mamae! E tutusa musika ma te fiafia i ai, o le aisa kulimi e tasi, o tusi lava e tasi …”
Sa tuu e tina se ipu o makaroni i luga o le laulau. “E moni, ae e le faapea e tatau lava ona e faia na mea uma e tasi. Aemaise pe afai o se mea e te le o maua ai se lagona lelei. E le afaina le faia o ni filifiliga e ese mai nai lo filifiliga e faia e se uo.”
“O le a le uiga o lau tala?” Na fesili ai Kamila.
“Ia, ua tatou filifili e aloese mai upu leaga ina ia mafai ona tatou lagona ai le Agaga Paia,” na faamalamalama atu e tina. “Ae e le o tagata uma e tutusa o latou tulaga faatonuina e pei ona tatou faia. E le faia lena e avea ai i latou ma ni tagata leaga.”
Sa popole pea Kamila i le mea e ono tupu pe a fesili atu Brooke ia te ia e uiga i le faaaliga. Sa la talanoa e uiga i mea uma! Ae faapefea pe a manatu Brooke o ia o se pepe? Pe sili atu ona leaga, ae faapefea pe a le toe fia faauo o ia?
Sa fai e Kamila se tatalo a o lei alu e moe. Tama Faalelagi, faamolemole fesoasoani mai ia te au e talanoa ia Brooke taeao. Faamolemole fesoasoani mai ia ou lototele. Na a’e Kamila i lona moega ma faamoemoe o le a lelei mea uma i le aoga.
“Kamila!” Sa ee atu ai Brooke i le isi itu o le malae. Sa ia tamoe i luga o le mutia e faafetaiai ia Kamila. “O le a sou manatu i le faaaliga? Sa le malie ea?”
Sa manavanava loloa Kamila. “Sa le’i tele moni lava se vaega sa ou matamata ai.”
Sa foliga le mautonu Brooke. “Aisea?”
Sa mafaufau Kamila mo sina sekone. Pe na te fai atu ea sa ia pisi? O le a le tala a Brooke o le a fai? “Ia … ou te lei matamata i ai ona sa latou fai mai ni upu ou te lei fiafia ai. Sa le lelei ni o’u faalogona i le matamata i ai.”
“Oi,” na fai atu lemu ai Brooke. Ona ia fai mai lea, “E le afaina. Ta te le tau matamataina faatasi. E mafai ona ta sueina se faaaliga ta te fiafia uma i ai pe faia faatasi se isi mea.”
“Ua lelei.” Sa ataata Kamila. Ona savavali faatasi lea o nei uo e toalua i le vasega, ma talanoa ma talie i le taimi atoa. ●
E alala le tusitala i Iuta, ISA.