ការរីកចម្រើន ជាមួយគ្នា
បងប្អូនប្រុសក្នុងគ្រួសារក្លាកសុនបានទទួលពរ តាមរយៈការបម្រើនៅក្នុងកូរ៉ុមបព្វជិតភាពរបស់ពួកគេ និងការអានព្រះគម្ពីរមរមន ។
រូបថតដោយ រីឆាត អិម. រ៉មនី
មានការផ្លាស់ប្តូរដ៏គួរឲ្យរំភើបជាច្រើនបានកើតឡើងចំពោះសាសនាចក្រ សូមអំណរគុណដល់ការបំផុសគំនិតដែលប្រធាន រ័សុល អិម ណិលសុន បានទទួល ។ ការផ្លាស់ប្តូរទាំងពីរនេះបានជះឥទ្ធិពលដោយផ្ទាល់លើបងប្អូនប្រុសក្នុងគ្រួសារក្លាកសុនដែលនៅរដ្ឋកាលីហ្វូញ៉ា ស.រ.អា. ។
-
ឥឡូវនេះ យុវជនអាចទទួលបានការតែងតាំងទៅកាន់តំណែងបព្វជិតភាពនៅខែមករានៃឆ្នាំដែលពួកគេឈានចូលអាយុ ១២, ១៤ និង ១៦ ឆ្នាំ ។
-
យុវវ័យមានសិទ្ធិទទួលបានប័ណ្ណចូលព្រះវិហារបរិសុទ្ធដែលមានកំណត់ការប្រើប្រាស់ដោយចាប់ផ្ដើមនៅក្នុងខែមករានៃឆ្នាំដែលពួកគេឈានចូលអាយុ ១២ ឆ្នាំ ។
សម្រាប់បងប្អូនប្រុសម៉ាធ្យូ (១៥), អែនដ្រូ (១៣) និង អ៊ីសាក (១១) ការផ្លាស់ប្តូរនេះបាននាំឱកាសថ្មីមួយដើម្បីបម្រើ និងរីកចម្រើនក្នុងដំណឹងល្អនៃព្រះយេស៊ូវគ្រីស្ទ—ពុំគ្រាន់តែសម្រាប់ម្នាក់ៗទេគឺ ទាំងអស់គ្នា ។
ថ្ងៃនៃគ្រាដំបូង
នៅខែមករាឆ្នាំ ២០១៩ ម៉ាធ្យូ, អែនដ្រូ និង អ៊ីសាក បានទទួលបទពិសោធន៍ថ្ងៃនៃគ្រាដំបូងរបស់ពួកគេ ។ អែនដ្រូនិយាយថា ៖ « ម៉ាធ្យូបានក្លាយជាសង្ឃ ខ្ញុំបានក្លាយជាគ្រូ ហើយអ៊ីសាកបានក្លាយជាឌីកុនក្នុងពេលដំណាលគ្នា ។ គ្មានពួកយើងណាម្នាក់ដល់អាយុមួយដែលអាចនឹងត្រូវតម្លើងបព្វជិតភាពទេ កាលពីមុននោះ » ។
ម៉ាធ្យូនិយាយថា « នៅថ្ងៃដំបូងរបស់ខ្ញុំធ្វើជាសង្ឃ ខ្ញុំបានកាច់នំបុ័ងជាដុំសម្រាប់ពិធីសាក្រាម៉ង់ ហើយខ្ញុំបានប្រសិទ្ធពរវា ។ ខ្ញុំហាក់ដូចជាមានអារម្មណ៍ភ័យ ។ ដៃខ្ញុំរាងញ័របន្តិច ពេលខ្ញុំបានអានការអធិស្ឋាន ប៉ុន្តែវាពិតជាអស្ចារ្យណាស់ » ។
អ៊ីសាកទើបតែកាន់បព្វជិតភាពអើរ៉ុន ហើយឥឡូវនេះគាត់មានឱកាសរៀនពីបងៗរបស់គាត់ ។ អ៊ីសាកនិយាយថា « វាអស្ចារ្យណាស់ ដោយសារខ្ញុំនៅជាមួយបងប្រុសខ្ញុំ និងមិត្តភក្តិមួយចំនួនទៀតរបស់ពួកគេ ។ ខ្ញុំទទួលអារម្មណ៍ពីព្រះវិញ្ញាណ ពេលខ្ញុំចែកសាក្រាម៉ង់ជាលើកដំបូង ។
ខ្ញុំបានធ្វើបុណ្យជ្រមុជទឹកឲ្យប្អូនប្រុសខ្ញុំ ! »
ជាមួយនឹងការទទួលបព្វជិតភាពអើរ៉ុន និងការចែកសាក្រាម៉ង់ នោះអ៊ីសាកក៏បានចូលរួមព្រះវិហារបរិសុទ្ធដើម្បីធ្វើបុណ្យជ្រមុជទឹកផងដែរ ។ ឪពុករបស់គាត់បានជ្រមុជទឹកឲ្យគាត់មុន ប៉ុន្តែក្រោយមកមានរឿងដ៏អស្ចារ្យមួយកើតឡើង ៖
ម៉ាធ្យូនិយាយថា « ខ្ញុំត្រូវជ្រមុជទឹកឲ្យប្អូនប្រុសខ្ញុំ ! » ។
អ៊ីសាកនិយាយថា « ខ្ញុំពុំធ្លាប់រំពឹងថា ម៉ាធ្យូជ្រមុជទឹកឲ្យខ្ញុំទេ ។ ប៉ុន្តែឥឡូវនេះគាត់គឺជាសង្ឃហើយ ដូច្នេះគាត់អាចជ្រមុជទឹកឲ្យខ្ញុំបាន ។ វាជាបទពិសោធន៍មួយដ៏អស្ចារ្យណាស់ ។ ខ្ញុំអាចទទួលអារម្មណ៍ពីព្រះវិញ្ញាណបរិសុទ្ធ » ។
រៀងរាល់ព្រឹកពីមុនថ្នាក់សិក្ខាសាលា
ម៉ាធ្យូ, អែនដ្រូ និង អ៊ីសាក ពុំមែនគ្រាន់តែជាបងប្អូនប្រុសនៅក្នុងគ្រួសារក្លាកសុនទេ ។ មានបួននាក់ទៀត ៖ លេវី (៩), អេលី (៧), សាំ (៤), និង ទីតុស (២) និងទារកមួយទៀតដែលនឹងកើត ។
ពេលប្រធានណិលសុនបានអញ្ជើញស្ត្រីនៃសាសនាចក្រនៅក្នុងសន្និសីទទូទៅខែតុលាឆ្នាំ ២០១៨ ឲ្យអានព្រះគម្ពីរមរមន ពីមុនដំណាច់ឆ្នាំ នោះម៉ាធ្យូ, អែនដ្រូ និង អ៊ីសាក ជាមួយនឹងឪពុករបស់ពួកគេ ព្រមទាំងប្អូនប្រុសពួកគេ បានសម្រេចចិត្តផ្តល់ការគាំទ្រដល់ម្តាយរបស់ពួកគេ ។ ពួកគេបាននិយាយថា « ពួកកូននឹងអានវាជាមួយម៉ាក់ » ។ រៀងរាល់ព្រឹកពីមុនថ្នាក់សិក្ខាសាលា ពួកគេភ្ញាក់ឡើងដើម្បីអានព្រះគម្ពីរជាមួយគ្នា ។
ការអញ្ជើញដែលផ្លាស់ប្តូរជីវិតថ្មី
អែនដ្រូនិយាយថា « ពេលយើងទទួលយកការអញ្ជើញនេះ ខ្ញុំបានគិតថា វានឹងចំណាយពេលច្រើនណាស់ ។ ខ្ញុំព្រួយបារម្ភថា ខ្ញុំគ្មានពេលគ្រប់គ្រាន់ធ្វើអ្វីគ្រប់យ៉ាងដែលខ្ញុំចង់ធ្វើទេ ដូចជាលេងហ្គីតា ឬដើរលេងជាមួយមិត្តភក្តិខ្ញុំ ។ ប៉ុន្តែខ្ញុំបានដឹងថា វាពុំដំណើរការដូច្នោះទេ ។ កាលណាខ្ញុំអានព្រះគម្ពីរមរមនកាន់តែច្រើន នោះខ្ញុំកាន់តែមានពេលច្រើន ។ ខ្ញុំបានដឹងថា ប្រសិនបើខ្ញុំបន្តអានព្រះគម្ពីរឲ្យបានច្រើនតាមដែលខ្ញុំអាចធ្វើបាន នោះជីវិតខ្ញុំនឹងមានលំនឹង ។ ខ្ញុំនឹងមានពេលច្រើននៅក្នុងថ្ងៃនោះ » ។
ម៉ាធ្យូកំពុងជួបគ្រាលំបាកមួយ ពេលគ្រួសារបានចាប់ផ្តើមអានព្រះគម្ពីររៀងរាល់ព្រឹក ។ គាត់បានពោលថា « ខ្ញុំរៀនពុំបានពិន្ទុល្អនៅសាលារៀន ។ ខ្ញុំមានការលំបាកនឹងការសិក្សាព្រះគម្ពីរផ្ទាល់ខ្លួនខ្ញុំ និងទំនាក់ទំនងរបស់ខ្ញុំជាមួយព្រះវរបិតាសួគ៌ ហើយខ្ញុំបានទុកវាទាំងអស់ក្នុងចិត្តខ្ញុំ ។ ខ្ញុំមិនបាននិយាយរឿងនេះជាមួយឪពុកម្តាយខ្ញុំទេ » ។
ទោះជាយ៉ាងណាក៏ដោយ ពេលម៉ាធ្យូបានចំណាយពេលបន្ថែមទៀតអានព្រះគម្ពីរមរមន នោះដំណឹងល្អបានចាប់ផ្តើមក្លាយជាអាទិភាពមួយក្នុងជីវិតគាត់ ។ គាត់ក៏បានខិតខំរៀនបន្ថែមទៀតនៅសាលារៀន ។ គាត់បានខំរៀន ហើយបានពិន្ទុខ្ពស់ ។
« ខ្ញុំក៏បានដឹងពីសេចក្តីស្រឡាញ់ដ៏ធំធេងដែលព្រះវរបិតាសួគ៌ និងឪពុកម្តាយខ្ញុំមានដល់ខ្ញុំ និងជំនួយដ៏ធំដែលពួកគេជួយខ្ញុំ ។ ហើយខ្ញុំមានទីបន្ទាល់អស្ចារ្យអំពីព្រះយេស៊ូវគ្រីស្ទ ។ ទ្រង់បានជួយខ្ញុំឲ្យយកឈ្នះលើទម្លាប់អាក្រក់ ហើយបានជួយខ្ញុំឲ្យទទួលបានជីវិតនៅក្នុងទិសដៅត្រឹមត្រូវ ។ ខ្ញុំមានអំណរគុណដែលយើងបានទទួលយកការអញ្ជើញរបស់ប្រធានណិលសុនជាគ្រួសារ ។ វាបានផ្លាស់ប្ដូរជីវិតរបស់ខ្ញុំ » ។
« មែនហើយ វាផ្លាស់ប្តូរច្រើនណាស់ ! »
ការទទួលយកការអញ្ជើញរបស់ប្រធានណិលសុនក៏បានពង្រឹងទីបន្ទាល់របស់អ៊ីសាកផងដែរ ។ គាត់និយាយថា « យើងគូសរង្វង់លើពាក្យ ព្រះ ព្រះអម្ចាស់ ព្រះប្រោសលោះ ព្រះអង្គសង្គ្រោះ និង ព្រះគ្រីស្ទ រាល់ពេលដែលយើងឃើញវា ។ នៅពេលយើងបញ្ចប់ការអាន ខ្ញុំបានបើកមើលព្រះគម្ពីរមរមន ហើយបានឃើញពាក្យទាំងអស់ដែលខ្ញុំបានគូសរង្វង់ ។ ខ្ញុំបានគិតថា « មែនហើយ វាច្រើនណាស់ ! » ខ្ញុំពុំធ្លាប់ឃើញថា វាមានច្រើនសោះ ។ ខ្ញុំបានទទួលអារម្មណ៍ខាងវិញ្ញាណកាន់តែច្រើន ដោយការអានព្រះគម្ពីរមរមន ។ ខ្ញុំរីករាយដែលយើងបានធ្វើរឿងនោះ » ។
ជីវិតបានល្អប្រសើរច្រើនណាស់
ម៉ាធ្យូ, អែនដ្រូ និង អ៊ីសាក មានក្តីរំភើបថា គ្រួសារពួកគេបានអានចប់ព្រះគម្ពីរមរមនតែក្នុងរយៈពេលពីរខែប៉ុណ្ណោះ ។ អ៊ីសាកនិយាយថា « ជាធម្មតាយើងចំណាយពេលមួយឆ្នាំឯណោះ » ។ ពួកគេបានរកឃើញពរជ័យនៃការធ្វើតាមការអញ្ជើញរបស់ព្យាការីជាមួយគ្នា ។
អែនដ្រូនិយាយថា « ប្រសិនបើអ្នកធ្វើអ្វីដែលគួរតែធ្វើ ដូចជាបង្កើតទំនាក់ទំនងជាមួយព្រះវរបិតាសួគ៌តាមរយៈការអធិស្ឋាន ការសិក្សាព្រះគម្ពីរ និងបន្តសកម្មទាំងស្រុងនៅក្នុងសាសនាចក្រ នោះជីវិតនឹងមានល្អប្រសើរខ្លាំងណាស់ » ។
បងប្អូនប្រុសទាំងបីនាក់នេះបានជួយគ្នារីកចម្រើននៅក្នុងដំណឹងល្អ ។ ពួកគេធ្វើតាមព្យាការី ដែលបានអំពាវនាវដល់សមាជិកឲ្យ « បង្កើនសេចក្ដីជំនឿរបស់ពួកគេទៅលើព្រះអម្ចាស់យេស៊ូវគ្រីស្ទ និងដង្វាយធួនរបស់ទ្រង់ដើម្បី … [ ចុះ ] និង [ រក្សា ] សេចក្ដីសញ្ញារបស់ពួកគេជាមួយនឹងព្រះ ហើយពង្រឹង … ក្រុមគ្រួសាររបស់ពួកគេ » ។១