នរណាក៏បាន លើកលែងតែគាត់ម្នាក់នោះ !
រចនារូបភាពដោយ ហ្វីល i2i អ៊ីលូស្ត្រេសិន
ពេលខ្ញុំឮពីកម្មវិធីបុណ្យគ្រីស្ទម៉ាស់របស់សាសនាចក្រអំពី « បំភ្លឺពិភពលោក » និងថ្ងៃនៃការបម្រើទូទាំងពិភពលោក ខ្ញុំបានគិតថា « នោះជាគំនិតល្អអ្វីម៉្លេះ ។ ខ្ញុំនឹងធ្វើវា » ។
ពីរថ្ងៃពីមុនថ្ងៃនៃការបម្រើទូទាំងពិភពលោកនៅថ្ងៃទី ១ ខែ ធ្នូ គំនិតមួយបានផុសក្នុងចិត្តខ្ញុំពីបុគ្គលដែលខ្ញុំត្រូវជួយ ។ រំពេចនោះ ខ្ញុំបានគិតថា « នរណាក៏បាន លើកលែងតែគាត់ម្នាក់នោះ ! » បុគ្គលនេះបានធ្វើឲ្យខ្ញុំឈឺចាប់យ៉ាងខ្លាំងអស់ពេលជាច្រើនឆ្នាំមកហើយ តែកាលណាខ្ញុំគិតពីឈ្មោះគាត់ នោះខ្ញុំកាន់តែដឹងថា គំនិតនោះគឺកើតមកពីព្រះវិញ្ញាណ ។
ខ្ញុំបានប្រាប់ស្វាមីខ្ញុំពីអ្វីដែលខ្ញុំកំពុងគិត ហើយគាត់បាននិយាយថា ការបម្រើបុរសនោះគឺជារឿងល្អសម្រាប់ខ្ញុំ ។ ខ្ញុំនៅតែមានអារម្មណ៍ស្ទាក់ស្ទើរខ្លាំងដើម្បីជួយគាត់ ។ ខ្ញុំបានដឹងថា ខ្ញុំពុំអាចធ្វើកិច្ចការនោះតែឯងបានទេ ដូច្នេះខ្ញុំបានអធិស្ឋានទូលសូមកម្លាំង និងបុគ្គលណាម្នាក់ដើម្បីទៅជាមួយខ្ញុំ ។ ទីបំផុត ខ្ញុំបានទូរសព្ទទៅពួកអ្នកផ្សព្វផ្សាយសាសនាស៊ីស្ទើរ ហើយពួកគេបានយល់ព្រមទៅជាមួយខ្ញុំ ។
ថ្ងៃទី ១ ខែ ធ្នូ បានមកដល់ ហើយខ្ញុំមានអារម្មណ៍ភ័យ ដែលធ្វើឲ្យខ្ញុំញ័រពេលខ្ញុំបើកឡាន ។ យើងបានអធិស្ឋានជាមួយគ្នាពេលយើងទៅដល់ផ្ទះនោះ ។ ខ្ញុំបានដកដង្ហើមជ្រៅៗពីរបីដង ហើយបានគោះទ្វារ ។ បុរសនោះបានបើកទ្វារ តែគាត់ហាក់ដូចជាពុំចាំខ្ញុំទេ ។ ខ្ញុំបានសួរប្រសិនបើគាត់ស្គាល់ខ្ញុំ ។ គាត់បានគិតថា ខ្ញុំគ្រាន់តែជាពួកអ្នកផ្សព្វផ្សាយសាសនាស៊ីស្ទើរម្នាក់ប៉ុណ្ណោះ ។ ពេលខ្ញុំបានប្រាប់គាត់អំពីខ្លួនខ្ញុំ គាត់មានការភ្ញាក់ផ្អើលណាស់ ប៉ុន្តែគាត់សប្បាយចិត្ត ដែលខ្ញុំបានមកលេងគាត់ ។ គ្រាដ៏ចម្លែកមួយបានកើតឡើង ពេលខ្ញុំបានប្រាប់គាត់ថា វាគឺជាថ្ងៃនៃការបម្រើទូទាំងពិភពលោក ហើយយើងចង់ជួយលោកតាមវិធីដែលយើងអាចជួយបាន ។
ខ្ញុំបានបែងចែកការងារឲ្យពួកអ្នកផ្សព្វផ្សាយសាសនា ហើយយើងបានទៅធ្វើការសម្អាតផ្ទះរបស់គាត់ ។ ពីរម៉ោងបន្ទាប់មក យើងបានចប់ការសម្អាត ហើយចាកចេញទៅ ។ ខ្ញុំពុំដឹងទាល់តែសោះរហូតពេលខ្ញុំកំពុងបើកឡានថា ខ្ញុំបានដឹងថា ខ្ញុំកំពុងតែសើច និងរីករាយ ។ ក្រោយមកខ្ញុំបានដឹងច្បាស់ថា ៖ ព្រះវរបិតាសួគ៌បានដកយកការឈឺចាប់ ភាពល្វីងជូរចត់ និងការកើតទុក្ខទាំងអស់ចេញពីខ្ញុំ ។ វារលាយបាត់អស់ហើយ ! ហើយខ្ញុំបានរួចផុតពីក្តីឈឺចាប់ទាំងពួងដែលខ្ញុំបានមានអស់រយៈពេលជាច្រើនឆ្នាំ ។ ព្រះវរបិតាសួគ៌បានប្រទានពរខ្ញុំឲ្យមានកម្លាំងដើម្បីអភ័យទោសឲ្យបុគ្គលនេះនៅទីបំផុត ។ វាជារឿងអស្ចារ្យណាស់ដែលចិត្តខ្ញុំបានទទួលភាពធូរស្បើយ ។
ខ្ញុំមានអំណរគុណណាស់ដែលខ្ញុំបានធ្វើតាមការបំផុសគំនិតដើម្បីជួយបុរសនេះ ។ ព្រះវរបិតាសួគ៌ពេញដោយក្តីស្រឡាញ់របស់ខ្ញុំបានដឹងថា ខ្ញុំត្រូវមានបទពិសោធន៍នេះ ដើម្បីខ្ញុំអាចរីកចម្រើន ហើយប្រែកាន់តែដូចបុគ្គលម្នាក់ដែលគាប់នឹងព្រះទ័យរបស់ទ្រង់ ។