សំណួរ និងចម្លើយ
តើខ្ញុំសម្រេចចិត្តបម្រើបេសកកម្មដែរឬទេ ?
មានឆន្ទៈស្មោះសរដើម្បីសួរ
បេសកកម្មពិតជាពុំមែនសម្រាប់មនុស្សគ្រប់គ្នាទេ ប៉ុន្តែអ្វីដែលមានសម្រាប់មនុស្សគ្រប់គ្នានោះគឺការស្វែងយល់ដោយស្មោះស្ម័គ្រថា តើបេសកកម្មជារឿងដែលយើងត្រូវធ្វើដែរឬទេ ! ជួនកាលយើងពុំចង់ទៅបម្រើទេ ដូច្នេះយើងពុំចង់សួរ ឬយើងសួរដែរ តែមិនរក្សាទីកន្លែងទុកឲ្យព្រះវិញ្ញាណឆ្លើយតបយើង ។ យើងត្រូវសួរដោយស្មោះសរ ! ប្រសិនបើអ្នករកឃើញចម្លើយតាមរយៈការស្វែងរកដោយស្មោះសរ នោះអ្នកនឹងមានភាពសុខសាន្ត និងទំនុកចិត្តនូវអ្វីដែលព្រះអម្ចាស់ប្រាប់ឲ្យអ្នកធ្វើ—ថាទៅ ឬមិនទៅ ។
អាលី ប៊ី អាយុ ២២ ឆ្នាំ រដ្ឋយូថាហ៍ ស.រ.អា.
ប្រែចិត្ត
អ្វីមួយដែលបានជួយខ្ញុំឲ្យសម្រេចចិត្តបម្រើបេសកកម្មគឺរៀន និងដកពិសោធន៍ការប្រែចិត្តពិតប្រាកដ ។ ពេលខ្ញុំបានសិក្សាពីដង្វាយធួនរបស់ព្រះអង្គសង្គ្រោះ ហើយអនុវត្តអ្វីដែលខ្ញុំបានរៀនក្នុងជីវិតខ្ញុំ នោះខ្ញុំទទួលអារម្មណ៍នៃភាពសុខសាន្តដែលខ្ញុំពុំអាចពិពណ៌នាបាន ។ ពេលខ្ញុំទទួលអារម្មណ៍បែបនេះ ខ្ញុំចង់ឲ្យមនុស្សដទៃទទួលអារម្មណ៍សុខសាន្តដូចគ្នានោះផងដែរ ។
អែលឌើរ ប៊ើដេហូ អាយុ ២១ ឆ្នាំ ទីក្រុងអារ៉េឃ្វីប៉ា ប្រទេសប៉េរូ
សូមបន្តទាក់ទងព្រះអម្ចាស់
ព្រះវរបិតាសួគ៌អាចប្រទានចម្លើយតាមរយៈព្រះគម្ពីរ សារលិខិតរបស់ពួកអ្នកមានសិទ្ធិអំណាចទូទៅ ឬសូម្បីតែទីបន្ទាល់របស់បុគ្គលណាម្នាក់ ។ ដូច្នេះអ្នកអាចទទួលបានការបំផុសគំនិតរបស់អ្នកដោយគ្រាន់តែបន្តទាក់ទងជាមួយព្រះអម្ចាស់ប៉ុណ្ណោះ ។
សាំយូអែល អេច អាយុ ១៤ ឆ្នាំ រដ្ឋយូថាហ៍ ស.រ.អា
ចងចាំថា ទ្រង់នឹងឆ្លើយតបអ្នក
ពីមុនខ្ញុំមកបម្រើបេសកកម្ម ខ្ញុំមានការលំបាកដើម្បីដឹងថា តើខ្ញុំគួរតែមកបម្រើដែរឬអត់ ។ ទីបំផុត ខ្ញុំបានសម្រេចចិត្តទូលសួរព្រះវរបិតាសួគ៌ ដែលពិតជាជ្រាបដឹងអ្វីគ្រប់យ៉ាងដែលយើងជួបប្រទះ ហើយជ្រាបដឹងថា តើយើងត្រូវទៅបម្រើបេសកកម្មដែរឬអត់ ។ តាមរយៈការអធិស្ឋាន ខ្ញុំបានទទួលការបញ្ជាក់ថា ខ្ញុំត្រូវទៅបម្រើ ។ ខ្ញុំដឹងថាព្រះវរបិតាសួគ៌ឆ្លើយតបការអធិស្ឋាន ។ សូមទូលសួរសំណួរទៅទ្រង់ ហើយទ្រង់នឹងឆ្លើយតបដល់អ្នក តាមសេចក្តីជំនឿរបស់អ្នក និងតាមព្រះទ័យ និងពេលវេលារបស់ទ្រង់ ។
ស៊ីស្ទើរធើរប៉េន អាយុ ២១ ឆ្នាំ បេសកកម្ម ចាម៉ាយកា ឃីងស្តុន
មើលក្រុមគ្រួសាររបស់អ្នក និងអានពររបស់លោកអយ្យកោ
គ្រួសារខ្ញុំ និងពររបស់លោកអយ្យកោខ្ញុំបានជួយខ្ញុំឲ្យធ្វើការសម្រេចចិត្ត ។ បងស្រីខ្ញុំកំពុងបម្រើបេសកកម្ម ហើយគំរូ និងទីបន្ទាល់អំពីកិច្ចផ្សព្វផ្សាយសាសនារបស់គាត់បានបំផុសគំនិតដល់ខ្ញុំ ។ បំណងប្រាថ្នាដើម្បីបម្រើបេសកកម្មរបស់ខ្ញុំក៏បានមានខ្លាំងឡើង ពេលខ្ញុំបានទទួលពររបស់លោកអយ្យកោ ដែលបានចែងថា ខ្ញុំអាចចែកចាយដំណឹងល្អជាមួយមនុស្សដទៃ ។
ជូលីណា ភី អាយុ ១៦ ឆ្នាំ រដ្ឋនេវ៉ដា ស.រ.អា.