Bwebwenato ko an Ijo Jokwe ie
Inaaj Ilo̧k Ijo Kwoj Kōņaan Bwe N̄ain Ilo̧k
Ekkatak n̄an kile ainikien eo edik an Jetōb.
Ittinņo eo n̄an jerbal in mijenede ej jetōb. N̄e ewōr ippam̧ jetōb eo, aolep men rej jerbal weeppān ilo jem̧ļo̧kin, jekdo̧o̧n eļan̄n̄e ilo iien ko iaļ eo jab meļeļe kake.
Ij juon rioktak n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Baam̧le eo aō kar kobatok ke iaar jon̄ouljuon iiō detta im iaar lakar pen wōt ilo kabun̄ in jān tōre eo. Ikar kijooror in jerbale juon mijen ilo lo 2014 eo kar kūr n̄an jerbal ilo Mississippi Jackson Mijen eo. Erom juon eo ej jerbal aolep raan ilo jerbal eo an Irooj eaar juon iien ekabwilōn̄lōn̄ im iaar iakwe aolep kajjojo raan bōtaab, enan̄in 5 allōn̄ ko m̧okta jān an jem̧ļo̧k mijen eo aō, iaar lukkuun in nan̄inmej.
Taktō ro raar jab maron̄ in lo ta eo eaar jorrāān ippa. Iaar jab maron̄ meme ak kōddelep im kar ilo̧k ilo jab m̧ōn̄ā ium̧win elōn̄ raan ko. Jet iien ikōn maron̄ kan̄ jidik m̧ōn̄ā kijen nin̄nin̄ ak m̧ōn̄ā ko jet repidodo bōtaab ekar ede ko. Barāinwōt menin eaar wōr m̧ōļan̄ļōn̄, metak bar im metak bōro. Ejjeļo̧k iaan uno ko kar kōmālimi kar jipan̄ im iaar luuji eļap baun ko jon̄an mijen būreejtōn eo aō eaar mijak bwe eaar wōr juon men enana emaron̄ kar waļo̧k n̄an n̄a. Kar jokāālet bwe iaar aikuj in jepļaak n̄an ijo jikū.
Kōn lukkuun in nan̄inmej eaar lukkuun in apan̄ eļap tata kōnke eaar ejjeļo̧k jabdewōt un ak uwaak in nan̄inmej eo. Kōn aolepeān būruwō, iaar kōņaan kadedeļo̧k mijen eo aō. Iaar akweļap ippān Irooj n̄an kemour eō. Iaar lukkuun in riit jān kōjeraam̧m̧an in petriak eo aō ke iaar kajjieon̄ in meļeļe ta eo Anij ekar kōņaan n̄an n̄a. Iaar jokāālet n̄an kajjitōk kōn juon kōjeraam̧m̧an an priesthood jān mijen būreejtōn eo aō. Ilo iien kōjeraam̧m̧an in iaar en̄jake juon kam̧ool em̧m̧an bwe Jema Ilan̄ eaar jeļā kajjiō, Nejin jiron̄. Eaar jeļā bwe ikdeelel eo aō em̧ool n̄an jerbal n̄an E ekar meļeļe in bwe inaaj kar m̧ōņōņō in ilo̧k jekdo̧o̧n ia eo Eaar kajjitōk ippa n̄an ilo̧k im bwe kōnke kōn menin, jar eo aō em̧ool n̄an kadedeļo̧k mijen eo aō eaar uwaak.
Juon allōn̄ ālkin aō jepļaak n̄an Vanuatu, eaar bwe an em̧m̧anļo̧k aō pād n̄an jerbal bar juon alen im kadedeļo̧k allōn̄ ko aō 18 ilo jikin eo aō. Iaar em̧m̧akūtļo̧k n̄an juon eria ekāāl me eaar wōr elder ro ie m̧oktaļo̧k. Eo m̧ōtta eaar kāāltok jān MTC kōn menin kōmro jim̧or kar kāāl n̄an eria eo. Ekar lōn̄ jerbal ko n̄an kōm̧m̧ani.