Waanjon̄ak ko in Peran
Jerbal n̄an Irooj ilo kajin Spanish
Rijeje eo ej jokwe ilo Utah, USA.
Ļōmņak n̄e eo m̧ōttam ekar lewaj juon bok elukkuun ļap an em̧m̧an im ekar riiti. Kōppeļļo̧ke kilin bok eo … im kwoj loe ke kwoj jab maron̄ riiti bok eo. Oktak kajin eo ie! Ta eo kwonaaj kar kōm̧m̧ane?
Ilo iiō ko im̧aantata an Kabun̄ in, Bok in Mormon eo ekar jeje wōt ilo Kajin English. Būreejtōn Brigham Young ekar kūr ruo mijenede ro n̄an kwaļo̧k gospel eo ilo Mexico im ukōte Bok in Mormon eo n̄an kajin Spanish. Bōtaab rekar ļapļo̧k aer aikuj jipan̄ n̄an kōm̧m̧ane. Rekar jeļā jidik ke kijoone lo̧jet, Anij ekar kōpooje juon em̧m̧an emaron̄ in leļo̧k n̄an er lukkuun jipan̄ eo rekar aikuji.
Meliton Gonzalez Trejo ekar itok jān juon baam̧le eo em̧weie ilo Spain. Ekar kate ekatak ilo jikin jikuuļ im erom juon būlijmāān ilo army eo an Spanish. Ekar ļap an itok limoin ilo kabun̄, ak ekar ejjeļo̧k en ekar loe im en̄jake ke ejim̧we. Juon raan ekar ron̄ an juon būlijmāān kōnnaan kōn juon doulul in armej ro rej ņae etaer make “rikwojarjar ro” Rej kobaļo̧k ippān Kabun̄ eo an Jisōs Kraist im Armej ro Rekwojarjar ilo Raan-ko Āliktata, im juon rikanaan an Anij ekar tōl er n̄an Rocky Mountain ko ilo Amedka. Meliton ekar en̄jake juon ikdeleel ekajoor n̄an ioon er. Ekar kobaļo̧k ippān juon doulul an Jarin Tariņae ilo Philippines, kōjatdikdik ippān ke menin enej jipan̄ bōke n̄an Amedka tokālik. Bōtaab Meliton ekar ļap an boub ippān jerbal eo an ke loļo̧k membōr ro ekar jino dikļo̧k an aorōk.
Innām Meliton ekar jino lukkuun nan̄inmej. Ekar keememej unin an kar itok n̄an Phillipines im jar n̄an Anij kōn ta eo ej aikuji in kōm̧m̧ane. Ilo bon̄ōn̄ eo, Meliton ekar wōr juon an ettōņak eaorōk. Ekar jeļā bwe ej aikuj in kar em̧m̧akūt n̄an Rocky Mountain ko.
Ke Meliton ekar ājmour jān nan̄inmej eo an, ekar kadedeikļo̧k iaļ eo an n̄an Amedka. Ekar topar ļo̧k California ilo Juļae 4, 1874, im jibadōkļo̧k wōt Salt Lake City.
Ke Meliton ekar topar ļo̧k Salt Lake, ekar ibweebtok juon jorāān: ekar maron̄ riit ilo kajin English bōtaab ejan̄in kar kōnono kake. Ekar jab maron̄ kōm̧m̧ao ippān jabdewōt armej! Bōtaab ekar kāāļet ke eļan̄n̄e ejjab maron̄ ekōnono n̄an armej, enaaj karetok er ilo bar juon wāween. Meliton ekar kōņake iuniboom̧ in tariņae eo an Spanish army eo an im m̧aaj ioon iaļ ko ilo bukwōn eo. Āinwōt an kar kōjatdikdik, elōn̄ armej ro rekar kile e! Āliktata juon eo ej uwaan Kabun̄ in etan in Brother Blanchard ekar loe, juon rūkaki in kaļōj ko reļļap eo im ej kōnono ilo kajin Spanish. Brother Blanchard ekar jipan̄ Meliton jukjuk im amņak ilo Salt Lake im katakin e kōn gospel eo. Jidik iien tokālik Meliton ekar peptaij.
Brother Blanchard ekar bar kwaļo̧k kajeen Meltion n̄an Būreejtōn Brigham Young. Meliton ekar ba n̄an Būreejtōn Young bwe eļapļo̧k jān aolep men, ekar kōņaan ukōte Bok in Mormon eo n̄an kajin Spanish.
Būreejtōn Young ekar kajjitōk ippān Meliton n̄an jipan̄ mijenede ro im rej etal n̄an Mixico ukōte m̧ōttan ko ilo Bok in Mormon eo n̄an kajin Spanish. Meliton ekar joļo̧k elōn̄ wiik ko ukōte naan ko n̄an kajin Spanish. Kajjojo bon̄ ej etali jerbal in ukook ko an ippān mijenede ro. Rekar kōnono jejjo kajin Spanish bōtaab raar en̄jake ke jerbal in ukook in eaorōk ekar aikuj in juon eo an kajin Spanish. Rekar jela ke Meliton ekar juon uaak nan jar ko aer. Ilo 1875 jerbal in ukook eo ekar diwōjļo̧k. Kar ņae etan Trozos Selectos del Libro de Mormon (Bok ko kar Kāāleti jān Bok in Mormon eo).
Mijenede ro rekar kiiō pojak in etal n̄an Mexico. Rekar kanne 1,500 kape in jeje ko em̧ōj aer ukook ņae ioon kidia eo im jino iaļ eo aer. Ej kab juon kōttan, an ro rej kōnono ilo kajin Spanish maron̄ riiti Bok in Mormon ilo kajin eo aer make! Jekdo̧o̧n ta Meliton ekar jokwe buki m̧aeļ ko rettoļo̧k ilo Spain, Jemedwoj Ilan̄ ekar kōjebwebweik tok n̄an lukkuun ijo im ej aikuj in kar pād ie. Kōn peran im tōmak eo an Meliton, ekar jipan̄ bōktok naan eo an Anij n̄an elōn̄ ro armej ro.