Ro Mōtta Raar Kwaļo̧k Aer Meram n̄an N̄a
Rijeje eo ej jokwe ilo Baja California, Mexico.
Iaar en̄jake mijak im ajimakeke. Innām iaar em̧m̧akūt n̄an bar juon jikin im kar ilo̧k n̄an m̧ōnjar eo ilo juon iien eaitok.
Iaar jokwe ippān jinō ilo juon bukwōn jidikdik ilo Mexico ijo aolep rejeļā kajjien doon. Iaar jeļā em̧m̧an jen nana, ak iaar pok im kar make wōt jiron̄ eo eniknik ilo bukwōn eo.
Iaar kōņaan tōt, iaar kōm̧m̧ane juon men me kar m̧otaļo̧k: jera ļaddik. Eaar juon iaan likjab ko iaar jino kōm̧m̧ani. Iaar jino iaio̧ im jeļā ke ebwe aō kekemooj n̄an ļōmņak kōn n̄a make, meļeļein jino juon jiron̄ eo ejāniknik eo ej pād ilo marok.
Iaar pād ilo marok ilowaan juon iiō, im marok ej marok ļo̧k. Jokālet ko aō raar tōl ļo̧k n̄an iakweleel ippān baam̧le eo aō, im iaar kile ijjab maron̄ in mour ipāer. Ak eaar jab to jen kar mej eo an juon eo epaak Armej ro Rekwojarjar ilo Raan-ko Āliktata me iaar kile ke ewōr men en ejako. Ejerata, iaar naruwōn Anij im gospel in. Iaar jab bar tōmak kōjeraam̧m̧an ko me raar itok jān pokake. Iaar jeļā bwe n̄e in kar jab kālet n̄an jino mour kake gospel in, in kar wōt kowaane jemdo̧o̧n eo aō ippān Kabun̄ in im mour kake men ko an laļ in.
Iaar jijet ilo peet eo aō ilo juon ruum emarok, jar im en̄jake būrom̧ōj kōn n̄a make ke iaar kile ke iaar mijak—mijak in make iaaō im jab kōnono n̄an ro jet, mijak in kajim̧we bōd ko iaar kōm̧m̧ani, mijak bwe ejjeļo̧k juon enaaj jeo̧rļo̧k aō bōd, eļaptata Anij.
Ilo m̧ool, iaar em̧m̧akūtļo̧k n̄an Minnesota, USA, ippān ro jibū im jim̧aō, ro rejjab membōr in Kabun̄ in. Ļōļļap eo riab in jemān eaar ketok ippa, im Jabōt eo aō jinointata ijo, kōm kar etal n̄an jar, ak kweilo̧k in kwojkwoj eo wōt. Ke ej jem̧ļo̧k kweilo̧k eo iaar pepe in etal jen Mōnjar eo, ak iaar ilbōk, ke kōmij etal n̄an wa eo, kōm eaar lo an bisop eo jibadōk tok kōm. Eaar kajjitōk jet kajjitōk ko ippam̧ im kar bar karuwaineneik kōm n̄an Jabōt eo tok juon—im kōm kar.
Jabōt eo tok juon, ke kweilo̧k in kwojkwoj eo ej jem̧ļo̧k, m̧okta jen aō jutak, iaar jepooļ kōn jiron̄ ro jān ward eo—jiron̄ ro raar jipan̄ eō ukōt mour eo aō.
Kōmeļeļe jān Alberto Ruggieri
Eaar m̧ōkaj aō deļo̧n̄e juon laļ eo eoktak: juon laļ ippān juon bisop im juon būreejtōn an Doulul eo an Jiron̄ ro ro raar kea kōn n̄a im, ilōn̄in men otemjej, jiron̄ ro raar kajjieon̄ in mour kōn gospel eo kajjojo raan, ro rej kajjieon̄ in mour kake jon̄ok ko im jutak kōn meram eo. Raar kanooj romaak me rekar rome aō iaļ.
En̄in ej ta iaar kōm̧m̧ane: “En romaak [aō] meram im̧aan armej, bwe ren lo [aō] jerbal ko rem̧m̧an, im nōbar [jema] ilan̄” (lale Matu 5:16). Iaar jino bar etal n̄an m̧ōnjar eo im Iaio̧ ippān doon kajjojo wiik, riiti Bok in Mormon im jar kajjojo raan, karbab ilo nuknuk, kōjerbal naan ko rem̧m̧an, etal n̄an tampeļ, im kōpooj eō make n̄an bōk aō kōjeraam̧m̧an an petriak.
Iaar lukkuun oktak, ak iaar jab kile m̧ae iien kāām eo an Doulul eo an Jiron̄ ro, iaar en̄jake Jetōb Kwojarjar im kar lo bwe ewōr juon aō naan in Kam̧ool—juon naan in kam̧ool me emaron̄ kar kakeememej n̄a bwe Anij ej iakwe eō, bwe ewōr An karōk n̄an eō, im bwe Ejjab kōņaan bwe in ajimakeke. Juon naan in kam̧ool me epen im ekajoor me eaar ukōt eō. Juon naan in kam̧ool n̄an kwaļo̧ke im jab kar kōmeram wōt aō iaļ ak ro jet. Juon naan in kam̧ool me eban mijak in romaak ilo marok.