Juon At Mouj n̄an Florence
Rijeje eo ej jokwe ilo Michigan, USA.
Jon̄oul jilu iiō dettan Florence Onyejekwe ke ekar tōpareļo̧k ijo em̧m̧an ippān ilo namōjen kōjem̧ in m̧ōn wia eo eobrak kōn armej ilo Onitsha, Nigeria. Iaļ eo ekar obrak kōn riwiakake ro rej ikkur n̄an riwia ro reboub. Kōrā ro rej likūt m̧weiūk ko ioon bōrāer ilo aer etetal. Jikuuļ ej kab jem̧ļo̧kļo̧k kōn holiday eo, im Florence ekar jeļā ro m̧ōttan rej m̧ōņōņō ium̧win iien eo ebōjrak jikuuļ. Ak Florence ekar joļo̧k iien ko an ilo holiday ko im wiakake bitterleaf ilo jikin wiakake in. Ekar ede eo wāween n̄an kōm̧m̧an jāān n̄an wōņāān an jikuuļ.
Botaab, Florence ekar jab aitwerōk. Alkin aolep men, jinen ekar joļo̧k awa ko raitok ilo jikin wiakake eo aolep raan wiakake yam ko n̄an wia m̧ōn̄ā n̄an baam̧le eo. M̧am̧a ekar ļap an kate jerbal. Jim̧or Jinen im jemān rekar kajjieon̄. Botaab eļan̄n̄e ekar jab ļap jeļāļo̧kjeņ, ekar jab ļap ijo remaron̄ kōm̧m̧ane. M̧ōttan jidik bwe Florance en kōjem̧ļo̧k eļmentōre jikuuļ. Bōlen eļan̄n̄e enaaj kadedeļo̧k an jikuuļ, emaron̄ in bōk juon jerbal eo em̧m̧an wōņāān im jipan̄ baam̧le eo an.
Ke ekar ro̧o̧l n̄an m̧weo, Florence ekar lo jinen im jemān im kar kajjitōk, “Kwoj ke ļōmņak imaron̄ in etal n̄an high jikuuļ? Im bōlen iunibōjiti?
M̧am̧a ekar kalimjōke Nnam (jema) im kajiboulul bōran. “Elukkuun ļap wōņāān iunibōjiti jān jāān eo epād ippād,” Nnam ekar ba. Florence ekar reilaļļo̧k n̄an juuj ko an. Ekar jab kōņaan bwe M̧am̧a im Nnam ren loe jon̄an an kar inepata.
Jet raan tokālik, Florence ekar bōjrakļo̧k n̄an aujipitōļ eo im bōk jet uno. Hopistal eo ekar ļap boub ie āinwōt jikin wia ko, bōtaab ejjab lukkuun kōwaron̄ron̄. Florence ekar kalimjōke nōōj ro rej kōņake at mour ko aer. Ekar pijakiļo̧k e make ilo uniboom̧ rot kein, jipan̄e rinaninmej im lale ninnin ro ilo aujipitōl ko reļļap. Bolen e maron̄ erom juon nōōj.
Florence ekar jeļā ke jinen im jemān rekar jim̧we—ekkatak n̄an bōk juon jeļāļo̧kjeņ enaaj kar pen. Botaap Florence ekar jeļā kilen kate jerbal. Ekar kāālet n̄an kajjieon̄.
Jekdo̧o̧n ta jon̄an lōn̄ in jerbal ko rekar kobrak raan eo an, Florence ekar kōm̧m̧an iien n̄an katak. Ekar pass e teej eo n̄an high jikuuļ, im Nnam ekar m̧uri jon̄an jāān eo ebwe n̄an an maron̄ etal. Tokalik ekar jeļā bwe kien eo enaaj jipan̄ kōļļāik wōņāān an jikuuļ ilo jikuuļ eo an nōōj. M̧ōttan jidik etōprak kōttōbar eo an!
Ak ke ekar itok iien ijjino jikuuļ eo an nōōj, Florence ekar en̄jake jidik pere. Ta eļan̄n̄e elukkuun pen? Ta eļan̄n̄e enaaj make iaan? Florence ekar jilo̧k bōran im jar, “Anij, jouj im letok aō kajoor n̄an etal n̄an jikuuļ eo an nōōj im buuļ jerbal.”
Ilo jikin jikuuļ eo an nōōj, Florence ekar katak wāween eleļo̧k uno im dāpij erreo eo an kein jerbal ko jān kij ko. Jet iien rinan̄inmej ro an rej em̧m̧an aer mour, botaab jet ien rejjab. Florence ekar emakijkij an jar n̄an peran. Ālkin jilu iiō ko raitok, Florence ekar kadiwōjļo̧k kōn menin leļo̧k eo n̄an rijikuuļ ro rem̧m̧antata ilo kūlaaj eo an. Ettōņak eo an em̧ōj an kūrm̧ool. Ekar maron̄ in kōņake at mouj eo an nōō, im ekar maron̄ in kōm̧m̧an jāān ko rebwe n̄an jipan̄ baam̧le eo an.
Elōn̄ iiō ko tokālik, Florence ekar loļo̧k juon branch jidikdik ilo Ghana Accra Mission. Ļeo pāleen, Christopher Chukwurak, ekar mijen būreejtōn eo ijeņ. Florence ekar ioon jet ajri ilo branch eo me rejjab maron̄ etal aolep iien n̄an jikuuļ. Rekar jab lukkuun jeļā ta eo ren kōm̧m̧ane kōn ilju im jekļaj eo aer. Rekar kakeememej Florence kōn e make ke ekar juon ajri. “Ta eo imaron̄ ba n̄an jipan̄ er?” Florence ekar jar ilo būruwōn.
Innām ekar en̄jake juon en̄jake eo e alikkar: Bwebwenato n̄an er kōn mour eo am̧.
Florence ekar ļōmņak kōn mour eo an. Ekar jerbal ilo aujipitōl ko ilo Nigeria im ilo Amedka. Ekar m̧areik juon em̧m̧aan em̧m̧an, im ippān doon erro kar loe Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ekar erom̧ juon m̧am̧a. Kiiō ej jipan̄ mijenede ro kōjparok aer ājmour im buuļ jerbal. Jemedwōj Ilan̄ ekar jipan̄ e erom̧ juon nōōj. Ekar ļap an jipan̄e jān jon̄an eo ekar kōtmāne. Emaron̄ kōm̧m̧ane ejja wāween in n̄an ajri rein.
Florence ekar kalimjōke ajri ro im ettōn̄ dikdik. “Kwojeļā at mouj kaņ nōōj rej kōņaki? Ikar loe juon at rot kan im kar kāālet n̄an erom̧ juon nōōj…”