2019
Ij ke wōnm̧aanļo̧k wōt im riit?
Oktoba 2019


Ij ke wōnm̧aanļo̧k wōt im riit?

Pija
Should I Keep Reading

Iiō eo ļo̧k ikar bōke juon bok ilo ļaibrāre en kōn juon leddik ekar ijjino juon blog. Ikar ļōmņak en kar juon bok eo elimo kōnke armej eo rej bwebwenato kake ekar ejjeļo̧k oktak iiō eo an im n̄a, im jinō ekar juon blogger. Innām ikar ļōmņak enej kar juon bok imaron̄ kar epaake.

Ikar riit e wōt jejjo peij ilo bok eo ke leddik eo ekar kōjerbal etan Anij ilo pata. Ekar jab em̧m̧an aō en̄jake ibūruwō, ālkin aō kar riiti m̧ōttan eo. Bōtaab ikar wōnm̧aanļo̧k wōt im riiti, kōjatdikdik ke ekar juon men eo wōt kōttan an waļo̧k. Ikar riiti elōn̄ļo̧k jejjo peij, im ekar bar ba juon alen.

Ikar etal im ba n̄an jinō kōn ta eo ikar loe. Ikar jab jeļā eļan̄n̄e ij aikuj wōnm̧aanļo̧k wōt im riit ak jaab. Jinō ekar ba n̄an n̄a im ba ekar aō kāālet. Bōtaab ekar errā ke bōlen ejjab juon men eo em̧m̧an n̄an wōnm̧aanļo̧k wōt im riiti n̄e leddik eo ekar ba men ko jejeļā ke rebōd. Jinō ekar ba ke eļaptata ejjab em̧m̧an eļan̄n̄e leddik eo ej kōjerbal etan Irooj ilo pata.

Ikar ļōmņak in lale eļan̄n̄e enij bar lo elōn̄ kōttan an waļo̧k wāween in, kiiō ikar elōkļo̧k peij ko ilo bok eo. Ikar loe ke kōjerbal etan Irooj ilo pata kar wāween eo an leddik in kōnono iien otemjej. Ikar kāālet n̄an kōro̧o̧le bok eo n̄an ļaibrāre eo im jab bar riit.

Ikar būrom̧ōj bwe rijeje eo an bok eo ekar kōjerbale etan Irooj ilo pata. Bōtaab ālkin aō kar kōro̧o̧le bok eo n̄an ļaibrāre eo, ikar m̧ōņōņō ke ikar kōm̧m̧ane kāālet eo ejim̧we. Ikar jeļā bwe ikar ļoor “Jon̄ak ko an Gospel eo Aō” jān aō Tōmak ilo Anij bok eo me ej ba, “Inaaj riit wōt im alooje men ko rej rej kabun̄ būruwōn Jemedwōj Ilan̄.” Ijeļā ke jej aikuj wōt kōjerbale āt ko etan Jemedwoj Ilan̄ im Jisōs ilo wāween em̧m̧an im ilo kauteej.