Juon Jar Jān E
Prodi eaar mijak in bar ro̧o̧l in kiki. Ta eo eļan̄n̄e ebar wōr juon an ettōņak ekamijak?
“Jar, E epād ijo” (Children’s Songbook, 12).
Prodi eaar m̧ōkaj an jijet ioon peet eo. Menono eo an eaar m̧ōkaj an baam̧.
Wōt eaar mera an wōtlo̧k ioon bōro̧o̧j eo ke eaar jijet ilo marok. Emaron̄ kar ron̄ an dān ipilpil jān wōjke fig in Africa eo itunam̧ōj in wintō eo an, im kōto eo kar en̄jake an m̧ōļawi im māņāņ. Prodi eaar bōk kūtuwōn im kajjieon̄ in kakkije. Ekar juon baj ettōņak.
Eaar tabōļļo̧k jān peet eo im alim̧ōm̧ōik ruum̧ eo an jinen im jemen. Eaenōm̧m̧an an M̧am̧a im Baba kar kiki. Leddik eo jatin edik, Célia, eaar nokjōk ilo peet eo an barāinwōt. Aolep men kar EMMAN. Baam̧le eo an raar ineem̧m̧an.
Prodi eaar bar wallōn̄ļo̧k ioon peet eo im kar kajjieon̄ bar ro̧o̧l in kiki. Eaar ejabūlbūl im okoktak, innām ejabūlbūl im okoktak bar jidik. Eaar jeļā bwe ettōņak eo an eaar jab m̧ool, bōtaab ekar kanooj in mijak! Men̄e eaar kajjieon̄, eaar mijak n̄an an bar juon alen kikiļo̧k. Ta eo eļan̄n̄e ebar wōr juon an ettōņak ekamijak?
Prodi jedelan̄ ioon likūn im kalimjōk jiļiin̄ eo. Eaar kajjieon̄ in ļōmņak kōn ļōmņak ko rekam̧ōņōņō. “Jemedwōj Ilan̄, kwoj ke lukkuun pād ijo? Im kwoj ke ron̄jake im uwaake aolep jar an aolep ajri?” Juon en̄jake ekajoor eokmeņeņ eaar itok ioon Prodi ke eaar ļōmņak kōn naan ko n̄an al in Būraimere eo an em̧m̧an tata. Sister Kioska eaar katakin er bwe Jemedwōj Ilan̄ eaar iien otemjej mije er. Remaron̄ jar n̄an E jabdewōt iien, jabdewōt jikin.
Prodi eaar jeļā ta eo en kōm̧m̧ane. Eaar jerkak jān peet eo im kar bukwelōlō laļļo̧k n̄an jar.
“Jemedwōj Ilan̄ jitōn bōro,” eaar jar, “ij lukkuun in mijak. Jouj im kōjparok baam̧le eo am̧ ilo ineem̧m̧an. Im jouj im jipan̄ eō etal n̄an kiki im kōm̧m̧an bwe en ejjeļo̧k bar jabdewōt ettōņak nana.”
Prodi eaar kōjem̧ļo̧k jar eo an im tallōn̄ lōn̄ļo̧k n̄an ioon peet eo. Ānbwinin eaar kakkije, im ļōmņak eo an eaar en̄jake aenōm̧m̧an. Ejjab to eaar mejki.
Ke ekar jibbon̄, Prodi ekar ruj kōn an okmeņeņ in al eo eromaak jān wintō eo. Ekar maron̄ ron̄ ainikien an eļooļol ainbat ko ilo jikin m̧ōn̄ā eo im kar jerkak im lo jinen. Célia ekar pād ilo tebōļ eo m̧ōn̄ā bwe in m̧ōn̄ā kōjaba eo. Jinen eaar kōmāņeņ jet n̄an e n̄an an m̧ōn̄ā.
“Bonjour,” Jinen eaar ba. “Ejiet am̧ kar kiki?”
“Eaar wōr juon aō ettōn̄ak elukkuun in kamijak,” Prodi eaar ba. “Bōtaab innām iaar jar. Jemedwōj Ilan̄ eaar jipan̄ eō en̄jake ineem̧m̧an.”
“Joļo̧k aō bōd bwe ekar wōr am̧ ettōņak nana,” Jinen eaar ba. Liin eaar jiburi Prodi im kar jab kōtļo̧ke ium̧win juon iien aitok. “Bōtaab Ij kanooj m̧ōņōņō kwaar jar. Ej āinwōt Jemedwōj Ilan̄ eaar lukkuun jipan̄ eō.”
“Ekar,” Prodi eaar ba. “Iaar maron̄ in bar kiki, im eaar ejjeļo̧k bar jabdewōt aō ettōņak ko renana.” Prodi eaar dim an atbakwōj Jinen. Eaar m̧ōņōņō n̄an jeļā bwe jekdo̧o̧n ta ewi jon̄an an kar mijak, Jemedwōj Ilan̄ eaar wōt juon jar ettoļo̧k.