Kappukōt Kraist ijello̧kin Jelet Nana an Pija Nana

Pija

couple on a beach

Pija jān Getty Images, kar kōjerbale n̄an jibadbad ko an kōmeļeļe, kar kwarļo̧k jān waanjon̄ak

Ilo ļōmņake bwebwenato ko n̄an rūm̧m̧an ded ro, kōm kar joļo̧k eļap iien ko ļōmņak kōn unin kōnono ko rej jelm̧ai kiiō. Ekanooj in lōn̄. Bōtaab ke kōm kar dipdiki meļeļe ko n̄an Liaona eo an allōn̄ in, kōm kar tōl n̄an juon unin kōnono me ekar wōr kilaan n̄an kōm make, ro m̧ōttam, im ro rellōn̄ jet: jerā im pija nana. Kōm kar jeļā bwe karōke jekjōn in enaaj kar pen. Ālkin men otemjej, pija nana ekanooj in ļap an jelet elōn̄ armej ro ilo wāween ko rōkarub bōro, jet iien ej kakkure mour an armej. Im n̄an rūm̧m̧an ded ro ejjeļo̧k rejtaer, emaron̄ in kōm̧m̧an an ilju jekļaj āinwōt em̧ool ļapļo̧k an jab jeļa kake jān āinwōt an waļo̧k kadede, eļap tata ilo kōppopo n̄an m̧are.

Kōm kar ilo m̧ool lo pein Jemedwōj Ilan̄ ej tōl jerbal eo am ilo am kar jino bōk bwebwenato ko jān rūm̧m̧an ded ro me jem̧jerā ko aer raar ļanootot jān pija nana. Im kōmij lo bwe elōn̄ļo̧k jān baj jidik kōjatdikdik n̄an m̧ōņōņō, ejjeļo̧k-an̄ūrlep an m̧are ko indeeo. Etke? Kōnke aolep kajjojo bwebwenato rej kam̧ool kōn ukōt-mour, leļo̧k kōjatdikdik, kajoor in kōmour eo an Jisōs Kraist im Pinmuur eo An.

Kōn menin eļan̄n̄e kwoj lok eok make ilo juon jem̧jerā me kar jelete jān pija nana, kōmij kūr eok n̄an riiti jekjōn eo an liaona eo an allōn̄ in, ippān bwebwenato ko kar kwaļo̧k rekōmettak jān ro jet me rekanooj jeļā bwe apan̄ eo ņae pija nana ej m̧ool in. Bwebwenato kein rekitbuuj unin kōnono ko āinwōt ekōjkan jino ekōnono kōn pija nana n̄e kwoj jerā im ekōjkan ņa mejļan (peij 44), ekōjkan uwaake n̄e juon ej kwaļo̧k bwe ej lokjak kōn pija nana (digital only), ekōjkan an jeorļo̧k bōd im kōmour maron̄ in n̄an jim̧or armej ro (digital only), im ekōjkan an Jetōb eo maron̄ tōl eok n̄an jeļā ewi wāween wōnm̧aanļo̧k ilo jemjerā eo am̧ (digital only).

Jejeļā bwe eļan̄n̄e kwoj pedped ioon Rilo̧mo̧o̧r eo im karuwaineneiktok Jetōb eo n̄an mour eo am̧ ilo am̧ kappukōt uwaak ko, Jemedwōj Ilan̄ enaaj tōl eok ilo iaļ eo ejim̧we n̄an jekjek eo āinjuon am̧. Jelet eo enana an pija nana emaron̄ in bun̄bun̄ ilo laļ in, bōtaab meram in kōmour eo an Rilo̧mo̧o̧r eo ej kajoorļo̧k ilo jabdewōt jelet nana ko. Men eo deo eo jej aikuj kōm̧m̧ane ej kappukōt E.

Ilo kautiej,

Chakell Wardleigh im Mindy Selu

Māākjiin ko an Kabun̄ rijeje ro an jākjen eo an rūm̧man ded ro

Naan in rejan̄ eo Em̧m̧an tata …

Ijiello̧kin kajjitōk ippān rūm̧man ded ro kōn naan in rōjan̄ eo aer em̧m̧an tata kōn juon eo me ļaddik eo jeran ak leddik eo jeran ekar lokjak kōn pija nana, allōn̄ in jaar bōk kapilōk jān Būreejtōn M. Russell Ballard, Ripinej jenkwan Būreejtōn an Doulul eo an Jon̄oulruo Rijilōk ro. Eaar kapilōk:

“Aolep ro kwoj ioon er enaaj wōr aer apan̄ ko ilo mour. Pija nana ej juon iaan apan̄ ko reļļap jej jelm̧ai rainin. Mekarta, pija nana ej āinwōt e eo ewini tariņae eo ilo kakkure mour ko ad, jem̧jerā ko, im baam̧le ko.

“Jabdewōt eo me ej ļōmņak m̧are aikuj in ejjeļo̧k menin ņojak ak m̧ool eo edipio ippān eo enej pāleen lio ak ļeo. Ekōnono ippān doon im pukōt ewi būruwōn armej eo im ta eo ļeo ak lio ej kōm̧m̧ane n̄an erom ‘juon rikwōjarjar kōn pinmuur eo an Kraist Irooj’ (Mosaia 3:19). …

“Eļan̄n̄e kwoj pād ilo juon jem̧jerā me eo jeram ej m̧ool in kajjieon̄ n̄an pukōt anemkwoj eo jān iminene in kōjerbale ak aūrlep n̄an ‘uno kajoor eo ekāāl,’ kwoj maron̄ in jipan̄ ļeo ak lio. Ekanooj lōn̄ em̧m̧aan im kōrā ro rej en̄taan ilo ikōn̄ kōnke kōn jidilo̧k kaje ro me rej an̄ūrlep n̄an pija nana. Ro jinen im jemen, ro uwaan baam̧le, im ro m̧ōttad remaron̄ kōm̧m̧ane eļapļo̧k n̄an jipan̄ ro me rej pād ilo jorrāān kōn m̧ōņōņō in ron̄jake im leļo̧k rejtake im kōketak.

“Mekarta, ļaddik eo im leddik eo jeram̧ rejjab eddo n̄an ‘lo̧mo̧o̧ren’ ro m̧ōttaer jān jerawiwi, kajjojo armej epād ippān eddo eo kōn er make.

“Kwoj maron̄ wōt jokāālet, kōn jipan̄ eo an Irooj, ekōjkan wōnm̧aanļo̧k ilo juon jem̧jerā eo me pija nana ej jerbal ie ilo mour eo an eo enaaj m̧ōtta ilju jekļaj. Eļan̄n̄e kwoj kāālet n̄an pād wōt ilo jemjerā eo ippān juon eo ej lokjak kōn kape in, jipan̄ e oktakļo̧k n̄an Anij ilo jar, ilo jitlo̧k, im ilo ekkatak jeje ko rekwojarjar raan otemjej. Ilo kakobaba, kōketak loļo̧k ro jinen im jemen, ro uwaan baam̧le, ritōl ro an priesthood, im rikakpilōklōk ro retijemļo̧k n̄an bōk eļapļo̧k jipan̄ im rie.

“Ewōr jipan̄ aolep iien eļan̄n̄e rej m̧ool in kāālet n̄an tariņaeik pata in. Emaron̄ in jab pidodo, bōtaab ej ļap tokjān!”

Jān juon iien kajjitōk im uwaak kōnono kar kwaļo̧k ilo Brigham Young University ilo Nobōm̧ba 14, 2017.

Ta rōjan̄ eo em̧m̧an tata kwaar bōke kōn ļōmņake ilju jekļaj? Jilkintok n̄an kōm uwaak ko am̧ ilo liahona.ChurchofJesusChrist.org en jab rum̧wijļo̧k jān Oktoba 31, 2019.