Pedped in Katak ko an Jerbal in Karejar

Ejako Ke Ippam̧ Mōttan Jerbal in Karejar in Eaorōk?

Jerbal in karejar ej n̄an “m̧ōņōņō ippān ro rej m̧ōņōņō” barāinwōt “jan̄ ippān ro rej jan̄” (Rom 12:15).

man at a party holding a tray with people dancing on it

Kōmeļeļe ko jen Augusto Zambonato

N̄e jej ļōmņak kōn jerbal in karejar, epidodo n̄an ļōmņak in jipan̄ ro rej pād ilo aikuj. Jej kōnono kōn ekkat jikin kallib n̄an eo emej pāleen, bōkļo̧k m̧ōn̄ā n̄an eo enan̄inmej, ak leļo̧k n̄an ro rej apan̄. Jen keememej kapilōk eo an Paul “jan̄ ippān ro rej jan̄,” ak jej ke lukkuun mije m̧ōttan jinoin eoon in—n̄an “lan̄lōn̄ ippān ro rej lan̄lōn̄”? (Rom 12:15 Lan̄lōn̄ ippān ro jej jerbal in karejar ippāer—men̄e meļeļein kōjeraam̧m̧an er ilo aer tōprak ak jipan̄ er pukot lan̄lōn̄ ilo iien ko reppen—ej m̧ōttan jerbal karejar eo eaorōk āinwōt an kar Rilo̧mo̧o̧r kōm̧m̧ane.

Erkein jilu ļōmņak ko me remaron̄ jipan̄ (im juon n̄an kōjekdo̧o̧ne) ilo ad mije Anij eo em̧m̧an eaar likūti ilo mour ko ad.

1. Kom̧in Ekkōl

Bonnie H. Cordon, Būreejtōn eo Eutiej an Doulul eo an Jiron̄ ro, ej jipan̄ kōj meļeļe bwe jej aikuj in lale ro jej jerbal in karejar ippāer—jab baj lale wōt eddodo im apan̄ ko aer ak barāinwōt kajoor ko aer, taļōn ko, im tōprak ko. Liin eaar ba jej aikuj in erom̧ “juon riwiin kōn juon lōke—juon eo ej leke jekjek ko aer n̄an jipan̄ er ilo kōjatdikdik im kōtmene ko aer.”¹

Ilo būrabōļ in siip im koot ko, Rilo̧mo̧o̧r eaar ba ro renaaj lo ilo tuanbwijmaron̄ in Pein renaaj ba: “Irooj, n̄āāt kōm̧ ar lo Am̧ kwōle, im naajdik Eok? Ak maro, im kidaak Eok?

“Nāāt kōm̧ ar lo Am ruwamāejet, im kadeļo̧n̄ Eok?” Matu 25:37–38).

“Ro jeiu im jatu, naan eo aorōk ej lo,” Sister Cordon eaar ba. “Ro rōwānōk rekar lo ro rej aikuj kōnke rej lukkuun lale im kile. Kōj jemaron̄ bar mejmej karuo n̄an jipan̄ im kaenōm̧m̧an, n̄an kōjeraam̧m̧an im barāinwōt etōņak.”²

2. Pukot Un ko n̄an Kōjeraam̧m̧an

Kōjeraam̧m̧an ebōk jikin ļap ak dik. Emaron̄ waļo̧k ilo kāānjōr ak ilo jepel, pukot juon jerbal kāāl ak pukot juuj eo ejako, mour ālkin an juon eo ejitenbōro mej ak mour ilowaan juon wiik jen juka.

Kool ļo̧k n̄an kōjeraam̧m̧an, likūt juon kaat, ak etal im m̧ōn̄ā in rālep. N̄an leļo̧k kōjeraam̧m̧an ko ad n̄an doon, mour kōn kam̧m̧oolol, im kōjeraam̧m̧an kōn kōjeraam̧m̧an ko kōn tōprak ko an ro jet, jej “maron̄ lan̄lōn̄ ilo m̧ōņōņō eo an ro jeiū im jatūm̧” (Alma 30:34).

woman clapping while people dance

3. Lo Pein Irooj

Jet iien lan̄lōn̄ ippān ro jet meļeļein jipan̄ er lo un ko n̄an lan̄lōn̄—jekdo̧o̧n ta apan̄ im m̧ōņōņō ko rej itok n̄an mour ko ad. Mool eo in bwe Jemedwōj Ilan̄ ej ļōmņak kōn kōj im pojak n̄an lōn̄aj kōj emaron̄ in juon wāween kabwilōn̄lōn̄ eo an m̧ōņōņō.

Kwomaron̄ jipan̄ ro jet lo pein Irooj ilo mour ko ad ilo am̧ kwaļo̧k ke em̧ōj am̧ loe. Kwon peran n̄an kwaļo̧k an Jemedwōj Ilan̄ kar jipan̄ kwe ilo apan̄ ko am̧. Naan in kam̧ool in emaron̄ jipan̄ ro jet kile im kam̧oolol An kar jipan̄ er. (lale Mosaia 24:14).

4. Jab Jon̄e Maron̄ eo Am̧ n̄an Lan̄lōn̄

Ejerata, jet iien jemaron̄ jon̄e maron̄ eo ad make n̄an lan̄lōn̄ ippān ro jet, eļaptata n̄e jej en̄jake jab jokne kōn ta eo jej tin leļo̧k ak jepād ia ilo mour in. Ijeļo̧kkin pukot m̧ōņōn̄ō ippān ro jet, jej wōtļo̧k ilo aujiid in keiid. Im āinwōt Elder Quentin L. Cook jen Doulul eo an Jon̄oulruo Rijilōk ro eaar kwaļo̧k: “Keiidi kōjeraam̧m̧an ko ej āinwōt n̄e ejako m̧ōņōņō. Jeban kam̧m̧oolol im m̧ōņōņō ilo juon wōt iien.”³

“Elmen ad maron̄ anjo̧ik juon oktak eo ippān aolep?”Jeffrey R. Holland jen Doulul eo an Jon̄oulruo Rijilōk ro eaar kajjitōk. “… Jemaron̄ bwini kōjeraam̧m̧an ko ad im jemaron̄ piniki jerbal ko an ro jet. Men eo em̧m̧antata, jen jerbal n̄an ro jet, jerbal in bōrokuk eo em̧m̧antata.”⁴ Ijeļo̧kin keidi, jemaron̄ lale ro jej jerbal in karejar n̄an er. Kwaļo̧k ta eo kwoj kam̧m̧oolol er kake ak ro ilo baam̧le eo aer.

Paul ej kakeememej kōj, jej aolep ra an Kraist, im n̄e “Juon ra ej aiboojoj, ra ko otemjej rej lan̄lōn̄ ippān” (1 Korint 12:26). Kōn jipan̄ an Jemedwōj Ilan̄, jemaron̄ kile en̄jake ko an ro jet, kōjeraam̧m̧an tōprak ko reļļap im reddik, jipan̄ er kile pein Irooj, im anjo̧ jen ebanban bwe jen maron̄ lukkuun lan̄lōn̄ ippān doon ilo kōjeraam̧m̧an ko, taļōn ko, im lem̧ōņōņō ippān ro jet.

Kakeememej ko

1. Bonnie H. Cordon, “Becoming a Shepherd,” Liahona, Nov. 2018, 75.

2. Bonnie H. Cordon, “Erom̧ juon Seperd” 75.

3. Quentin L. Cook, “Rejoice!” Ensign, Nov. 1996, 30.

4. Jeffrey R. Holland, “The Other Prodigal,” Liahona, May 2002, 64.

Waanjon̄ak eo an Rilo̧mo̧o̧r eo

Jisōs Kraist ekkā lan̄lōn̄ ilo lem̧ōņōņō an ro jet. Eaar kobaļo̧k ilo juon m̧are ilo Cana, ijo Ejjab wōt kōjeraam̧m̧an iien m̧ōņōņō ak kar ukōt dān n̄an wain (lale Joh 2:1–11). Jemaron̄ bar kōm̧m̧an juon kijejeto n̄an kobaļo̧kilo iien ko raorōk ilo mour ko an ro jej jerbal in karejar n̄an er.

Jej bar an Rilo̧mo̧o̧r lan̄lōn̄ kōn wānōk an ro jet. Ke Eaar kūrtok Rinipai ro, Eaar jiron̄ er, “Kom̧in m̧ōņōņō kōnke ami tōmak. Im kiiō lo, Aō lan̄lōn̄ eobrak” (3 Nipai 17:20).

Juon Kūr n̄an Jerbal

Ļōmņake ro kwoj jerbal in karejar n̄an er. Ta taļōn im kajoor ko aer? Ta jerbal im tōprak ko remaron̄ būki? Elmen am̧ lan̄lōn̄ ippāer, lale er, ak rōjan̄ er?

Kwaļo̧k En̄jake ko Am̧

Jilkintok en̄jake eo am̧ n̄an kōm ilo am̧ jerbal in karejar n̄an ro jet ak kwaar jerbal in karejar n̄an. Etal n̄an liahona.lds.org im jiped “Submit an Article ak Feedback.”