Ijjab Kōņaan Bwe In Oktak!
Rijeje eo ej jokwe ilo Utah, USA.
“Aorōk in jetōb ko ekanooj ļap ilo mejān Anij” (Katak im Bujen ko 18:10).
Mika ej iien otemjej reim̧aanļo̧k n̄an kūlaaj in eeb eo. Liin eaar iakwe ron̄jake al. Liin eaar iakwe kamineneik eeb eo an me ej eļļo̧ke pein āinwōt n̄e ej keļo̧k im kōm̧m̧an bwe jetjet. Im eļaptata liin eaar iakwe n̄e aolepān kūlaaj eo ej em̧akūtkūt ippān doon. Ke raar kōm̧m̧ane men jab in, eaar āinwōt rieeb ro raar aolep juon wōt. Eaar āinwōt liin eaar jab e wōt juon ewōr an nan̄inmej (Down syndrome).
Rainin raar ekkatak juon bun̄tōn eeb kāāl. Mika eaar alooje an rūkaki eo an kelōn̄ļo̧k imejatoto. Liin eaar alooje an leddik ro jet kajjieon̄. Jet raar pukōt kilen ilo iien eo em̧ōkaj tata. Jet eaar bōk jet kajjieon̄ ko. Mika eaar kajjieon̄ im bar kajjieon̄, bōtaab liin ekar jab jetjet an kōm̧m̧ane.
“Komaron̄ ke jipan̄ eō, rūkaki?” Mika eaar kajjitōk.
Leddik eo turin eaar kalimjōk Mika. Innām eaar m̧al m̧aanļo̧k n̄an eo m̧ōttan. “Etke liin ej kōnono āindein?” liin eaar unojdikdik. Leddik ro jim̧or raar oktakļo̧k im kalimjōk Mika.
Ilo iaļ eo aer n̄an m̧weo jān kūlaaj, Mika eaar ikōn̄ ilo aolepān iaļ eo ļo̧k.
Ke raar tōpar m̧weo, Jinen eaar lale pilawe eo ilo jikin kōmat eo. Liin eaar wōr pilawe ilo jepen. Jet iien men jab in ear kōm̧m̧an an Mika ettōn̄. Bōtaab rainin liin eaar kotlo̧k pāāk eo an ioon būļoor eo im nokjōkļo̧k ioon jea eo ilo tebōl eo.
“Ejiet kar eeb eo?” Jinen eaar kajjitōk.
“Nana,” Mika eaar ba. “Iaar kajjitōk kōn jipan̄, im juon leddik eaar ba ekōjak aō ekōnono. Innām eaar kalijmōk eō.” Mika eaar reilaļļo̧k. “Ijjab kōņaan etal n̄an iien eeb eo n̄an jidik.”
“O, Mika!” Jinen eaar ba. “Ilukkuun in būrom̧ōj. Kōmro jemam̧ iakwe alooje am̧ eeb. Kōmij kanooj bun̄ būruwōm kōn ewi jon̄an am̧ buuļ jerbal!”
Mika eaar en̄jake dān in kōmejaaļaļ jino to̧o̧r. “Ijjab kōņaan Down syndrome eo ilo n̄a. Ijjab kōņaan bwe turin meja en oktak. Iakwe ke en kar jab kanooj pen n̄an n̄a n̄an ekkatak men ko rekāāl. Jon̄an ij aikuj in bar kaminene ekōnono!”
Jemen eaar jijet turin Mika im likūt pein ipeļaakin. “Mika, kōmij iakwe eok lukkuun in ļap. Kōmij jab kōņan ukōt juon men kōn kwe.
Bōtaab Mika eaar kōjōboulul bōran im kalibubuik turin mejān kōn pein. “Ijjab kōņaan bwe in oktak. Ikōņaan bwe Down Syndrome eo aō en jako jān n̄a!”
Jinen im Jemen raar ikōn̄ ium̧win jidik iien.
“Ewōr juon aō ļōmņak,” Jinen eaar ba. Mika eaar alimōmō ioon pein. “Etke kom̧ro ejjab jar im kajjitōk ippān Jemedwōj Ilan̄ ekōjkan An en̄jake kōn n̄a?”
Mika eaar ļōmņak kake men jab eo. Liin eaar kōņan jar. Jidik kōn jidik, liin eaar em̧ajidjid. “Komaron̄ ke je kajjitōk eo bwe inaaj keememej ta eo n̄an kajjitōk?”
Jinen eaar je kajjitōk eo. Innām Mika eaar bōk peba eo im etal n̄an ruum̧ eo an n̄an jar.
Ke liin eaar itok n̄an jikin kōmat eo jejjo minit tok ālik, turin mejān Mika eaar romaak āinwōt juon tōm̧a. “Jemedwōj Ilan̄ eaar uwaak!” liin eaar ba.
“Ta eo Eaar ba?” Jinen eaar kajjitōk.
“Eaar ba, ‘Mika, Ij iakwe eok ilo jekjek eo kwoj pād ie,’” liin eaar ba. “Im Eaar ba kōn juon ainikien EĻAAJ!”
Wiik eo tok juon ilo eeb eo, Mika eaar jab inepata kōn ta eo leddik ro jet raar ļōmņak kōn Down syndrome eo an. Ijello̧kin, eaar kile bar juon leddik, Sara, eo eaar āinwōt ebūrom̧ōj. Sara eaar wōr an iien epen ekkatak jet iaan kōl ko rekāāl barāinwōt.
Ke Mika eaar tōpar m̧weo, eaar kāālet n̄an je juon leta n̄an Sara. Liin eaar jin̄aik elōn̄ annan̄in menono ko. Jinen eaar jipan̄ e kōn jipeeļ.
“Iakwe Sara,” Mika eaar je. “Kwoj juon rieeb em̧m̧an. Ikōņaan erom juon m̧ōttam̧. Ij m̧ōņōņō kwoj pād ilo kūlaaj in eeb eo aō.”
Mika eaar jab maron̄ kōttar n̄an leļo̧k leta eo n̄an Sara. Liin eaar kōņan bwe Sara en en̄jake m̧ōņōņō im iakwe ilo eeb eo barāinwōt.