Teuteu ki he Moʻuí
Kimuʻa Pea Uiuiʻi Koe ki he Ngāué
ʻOku fēfē ʻa e ngāue fakafaifekaú?
Kuó ke fakakaukau nai ki he ngāue fakafaifekaú? Kapau ko ia, mahalo kuó ke fifili pe ʻoku fēfē. Ko ho faingamālie ʻeni ke fehuʻi ki ha kau faifekau taimi kakato (ʻoku ʻikai ko ha kau faifekau moʻoni, ka ko e ngaahi tali angamahení ʻeni):
Ko koe: “Mālō e lelei, faifekau. ʻOku fēfē ʻa e ʻaho angamahení?”
Kau faifekau taimi kakató: “ʻOku mau ʻā pongipongia—ʻi he 6:30 a.m. ʻOku mau ako ʻa e ongoongoleleí mo e lea fakafonua homau misioná ʻi he houa ʻe ua hono hokó. ʻOku mau vakaiʻi ʻemau ngaahi taumuʻa ki he uiké mo palaniʻi homau ʻahó. ʻOku mau fakakaukauʻi foki mo ha ngaahi palani talifaki ʻo kapau ʻoku ʻikai faingamālie e kakaí he taimi ne mau alea ki aí. Hili ia pea mau hū ki tuʻa, ʻo ngāue ʻi he ʻahó kotoa, ʻo kumi ha kakai ke akoʻi, fakafekauʻaki ʻa e ngāué mo e kau mēmipá, mo maʻu ha ngaahi faingamālie ke akoʻí.”
Ko koe: “Kuó ke ʻosi ongoʻi taʻelata?”
Kau faifekau taimi kakató: “ʻIo, tautautefito ʻi he kamataʻanga ʻo ʻemau ngāue fakafaifekaú. Ka te mau lava ʻo ʻīmeili ki homau ngaahi fāmilí mo lau e ngaahi ʻīmeili meiate kinautolú tuʻo taha he uike. Kuo mau ʻiloʻi ko e founga lelei taha ke toʻo atu ai e taʻelatá ke tokanga taha ki heʻemau ngāué.”
Ko koe: “Ko e hā hoʻo ongoʻi fekauʻaki mo e talanoa mo e kakai ʻoku ʻikai te ke ʻiloʻí?”
Kau faifekau taimi kakató: “Ne mau ongoʻi loto siʻi fekauʻaki mo ia ʻi he taimi naʻa mau ʻuluaki aʻu mai ai ki hení, ka ʻokú te anga pē ki ai koeʻuhí he ʻokú te fai ia he ʻaho kotoa pē. ʻOku mau ʻiloʻi ʻe ʻikai tali ʻe he tokotaha kotoa ʻoku mau fetaulaki mo iá ke fanongo ki heʻemau pōpoakí, ka ʻe ʻi ai pē ha niʻihi te nau tokanga mai, pea ko ia kuo pau ke mau loto ke lea ʻi ha faʻahinga taimi pē. ʻOku fakaʻau pē ʻo fakalata ke te fetaulaki mo e kakaí mo fakamaheni kiate kinautolu.”
Ko koe: “ʻOku faingataʻa ke akoʻi e ongoongoleleí?”
Kau faifekau taimi kakató: “ʻIo, ʻoku fie maʻu ha taimi akoako kae lava ke fakahoko lelei, ka ne akoʻi lelei kimautolu ʻi he senitā akoʻanga fakafaifekaú. ʻOku mau feinga ke akoʻi e ngaahi lēsoní ʻi ha founga ke feau ai e ngaahi fie maʻú mo tali e ngaahi fehuʻi ʻa e kakai ʻoku mau akoʻí. ʻOku mau ako ʻa e ongoongoleleí ʻi he ʻaho kotoa koeʻuhí ke mau lava ʻo akoʻi lelei ia. Kae mahuʻinga tahá, ʻoku mau ongoʻi ʻoku tataki ʻe he Laumālié. ʻOku tokoni hono vaheʻi kimautolu ko e kau faifekaú.”
Ko koe: “ʻOku faingataʻa ʻa e ngāue fakafaifekaú?”
Kau faifekau taimi kakató: “ʻIo, ʻoku mau ngāue ʻi ha meimei houa ʻe 70 ʻi he uike, ka ʻoku fakafiefia ʻaupito. Ko e moʻoni ʻoku mau ongoʻi loto mamahi ʻi he taimi ʻoku ʻikai ke fakalakalaka ai ‘a e kakaí ʻo hangē ko ʻemau ʻamanakí, ka ko e fakakātoá, ko ha tāpuaki ke hoko ko ha meʻangāue ʻi he toʻukupu ʻo e ʻEikí ke tokoniʻi ʻa e kakaí ke nau fakalakalaka fakalaumālie. ʻOku mau feinga ke akoʻi ʻi he mālohi ʻo e Laumālie Māʻoniʻoní koeʻuhí he ʻoku mau ʻilo ko e Laumālié pē te ne lava ke tokoniʻi ‘a e kakaí ke nau maʻu ha fakamoʻoni pea uluí.”
Ko koe: “Fēfē kapau ʻoku ʻikai ke u fakapapauʻi pē ʻoku ʻi ai haʻaku fakamoʻoni?”
Kau faifekau taimi kakató: “Sai pē ia—hokohoko atu e lotú mo hono lau e folofolá! ʻAlu ki he lotú mo e seminelí. ‘Alu ki he temipalé kapau te ke lava. Ko e lahi ange e ngaahi faingamālie ʻokú ke maʻu ke ongoʻi e Laumālié, ko e mālohi ange ia hoʻo fakamoʻoní. Ako vahevahe hoʻo tuí ʻi he efiafi fakafāmili ʻi ʻapí. Lau e Tohi ʻa Molomoná. Te ne tokoniʻi koe ke ke lava ʻo akoʻi ʻa e ongoongoleleí.”
Ko koe: “Naʻa mou teuteu fēfē ki hoʻomou ngāue fakafaifekaú?”
Kau faifekau taimi kakató: “Naʻe taʻu lahi. Ne mau ako ʻa e ngaahi folofolá, tautautefito ki he Tohi ‘a Molomoná, pea naʻa mau ō ki he lotú mo e seminelí. Ne mau ngāue mo tānaki ʻemau paʻangá. Ka ʻoku mau fakaʻamu ne mau lau ʻa e Malangaʻaki ʻEku Ongoongoleleí mo ō tuʻo lahi ange ki he ngaahi kalasi teuteu ngāue fakafaifekaú. ʻOku mau fakaʻamu foki pehē ange mai ne mau ako ke feimeʻatokoni!”
Ko koe: “ʻOkú ke pehē ʻe lava ke u hoko ko ha faifekau?”
Kau faifekau taimi kakató: “ʻAupito! ʻOku ʻi ai ha kau faifekau ʻe meimei toko 70,000 he funga māmaní. Pea ʻoku kamata kotoa pē ʻaki ʻa e holí: ‘Kapau ʻoku mou maʻu ʻa e ngaahi holi ke ngāue maʻá e ʻOtuá ʻoku ui ʻa kimoutolu ki he ngāué’ (T&F 4:3). Ka ʻe fie maʻu foki ha ngaahi teuteu—kuo pau ke ke teuteu, ʻo ʻikai ngata pē ʻi he fakalaumālié kae pehē foki ki he fakapaʻangá, fakatuʻasinó, mo e fakasōsialé.”
Ko koe: “Ko e hā mo ha toe meʻa ʻe tokoni ki heʻeku teuteú?”
Kau faifekau taimi kakató: “Fokotuʻu haʻo taumuʻa ke moʻui ʻaki ʻa e ongoongoleleí mo tauhi ʻa e ngaahi fekaú ʻi he lelei taha te ke ala lavá. ʻE tokoni ʻeni ki hono fakamālohia hoʻo fakamoʻoní pea mo fakafeʻungaʻi koe ke ke taau mo e Laumālié. ʻI hoʻo hoko ko ha faifekaú, ʻe fie maʻu ke ke fakamoʻoni ki he kakaí ʻoku moʻoni ʻa e ongoongoleleí mei haʻo aʻusia fakafoʻituitui. Ko ia, tuku hao taimi he taimí ni, ke ke ako lahi ange ki he ngaahi tefitoʻi moʻoni ʻo e ongoongoleleí mo moʻui ʻaki e ngaahi tefitoʻi moʻoni ko iá ʻi hoʻo moʻuí.”
Kau faifekau taimi kakató: “ʻOku mau fokotuʻu atu foki ke ke lau ʻa e ngaahi fehuʻi ʻi he ngaahi peesi ko ʻení. Ko e ngaahi fehuʻi ia ʻe fai atu ʻe hoʻo pīsopé pe palesiteni fakakoló ʻi hoʻo fakafonu hoʻo foomu ngāue fakafaifekaú. ʻE tokoni hoʻo ʻilo e ngaahi fehuʻi ko ʻení he taimi ní ke ke mateuteu. Aleaʻi kinautolu mo hoʻo ongo mātuʻá mo e kau taki ʻo e Siasí. ʻOku lahi e ngaahi fehuʻí, kae ʻoua te ke ongoʻi mafasia—ʻoku ʻikai hangē ia te ke lipooti ki he senitā akoʻanga fakafaifekaú ʻapongipongi! ʻAi e taimi ʻokú ke fie maʻú ke teuteu ai koeʻuhí ka aʻu ki ho ʻuluaki ʻaho ʻi he ngāue fakafaifekaú, te ke taau, fiefia, mo mateuteu ke ngāue.”