Ngaahi Founga ʻe 5 ke Maʻu ai ʻa e Fiefia ʻi he Tuʻunga Fakaefaʻeé

Fai ʻe Meredith Burt

Kuo fāifai peá u toki maʻu ʻa e founga ke u fiefia ai he nofo ʻi ʻapi mo ʻeku fānaú.

ʻĪmisi

mother and baby

ʻI he taimi ne u hoko ai ko ha faʻē foʻoú, naʻá ku ongoʻi faingataʻaʻia ʻi he tauhi fānau he ʻaho kotoá. Naʻe faingataʻa ʻeku mamata ki he tulia ʻe hoku husepānití mo ha niʻihi kehe ha ngaahi hala foʻou mo fakafiefia, ka u fihia ʻi homau kiʻi fale he ʻaho kotoa ʻi hono tokangaʻi e kiʻi fānau iiki ʻe toko ua. Naʻá ku loto ke u saiʻia heʻeku hoko ko ha faʻeé, ka naʻá ku faingataʻaʻia! Ko ia ne u fakataufolofola ki he Tamai Hēvaní ʻi he lotu. Naʻá ku kole kiate Ia ke Ne tokoniʻi au ke u ʻilo e founga ke liliu ai ʻeku fakakaukaú pea mo au. Ko e ngaahi tali naʻá ku maʻú ʻoku mahino kae mālohi:

Tānaki ho ngaahi tāpuakí. Ko e taimi ʻoku ou tokanga taha ai ki he ngaahi meʻa lelei ʻi heʻeku moʻuí kae ʻikai ko e ngaahi meʻa koví, ʻoku ou ongoʻi fiefia mo houngaʻia.
Kumi ʻa e fakaʻofoʻofa mo e fiefia ʻi he meʻa ʻoku hoko fakaʻahó. Naʻá ku fakatokangaʻi hono tuʻo lahi e kata ʻeku fānaú pea mo ʻai au ke u katá. Naʻá ku saiʻia ʻi heʻeku malava ke mamata ki heʻenau tupulaki fakaʻahó. Naʻe kamata ke u fiefia ʻi hono fakahoko ʻo e ngaahi ngāue fakaʻapí, naʻa mo ia naʻe pau ke fai tuʻo lahi he ʻahó. Ko ha tāpuaki ʻeni ʻo e laumālie naʻá ku maʻu ʻi he lotú mo e ngāué.
Vaʻinga mo hoʻo fānaú. Kuo hoko ko ha tāpuaki lahi ʻa ʻeku tuku taimi ke vaʻinga mo ʻeku fānaú. ʻOkú ne tokoniʻi au ke u fokotuʻutuʻu hoku taimí pea fakasiʻisiʻi mo ʻeku ngaahi meʻa fakahohaʻá, pea ʻokú ne fakasiʻisiʻi ai e taimi ʻeku fānaú he sio TV, pauʻú, mo fefakakina ʻakí! Ko e taimi ʻoku ou vaʻinga ai mo ʻeku fānaú, ʻoku nau fiefia, pea ko e taimi ʻoku nau fiefia aí, ʻoku ou pehē mo au. ʻOku tokoni ʻeku kau atu ki heʻenau vaʻingá ke u fakatupulaki ha feohi ʻoku mālohi ange mo kinautolu peá u lava ai ke u sio ki he māmaní hangē ko kinautolú. ʻOkú ne fakamanatu mai ʻa e ʻuhinga ʻoku ʻaonga ai ʻa e ngaahi faingataʻaʻia ʻi he tuʻunga fakaemātuʻá.
Fakakaukau ki he niʻihi kehé. Ko e taimi ʻoku ou tokanga ai ki he niʻihi kehé, ʻoku ʻikai leva ke u nofo ʻo fakakaukauʻi ʻeku ngaahi palopalemá. ʻOku fakatauʻatāinaʻi au ʻe he meʻá ni mei he ongoʻi faingataʻaʻiá, loto mamahí pe loto foʻí mo tokoni ke u fetongi e ngaahi ongo ko iá ʻaki e ʻofa haohaoa ʻa Kalaisí. ʻOku ou ʻiloʻi ʻoku moʻoni ʻeni, ka kuo pau ʻeni ke u toe ako ia. ʻOku ʻikai ke u fai e meʻa kotoa pē koeʻuhí ko au; ka ʻoku ou fai ia koeʻuhí ko e ngaahi laumālie mahuʻinga kuo tuku mai ʻe he ʻOtuá ko hoku tufakangá. ʻOku ou tupulaki ke tatau ange mo Iá ʻi heʻeku akoʻi kinautolu ke nau hoko ʻo hangē ko Iá.
Tauhi ha fakakaukau ʻoku sio lōloa. Ko e taimi ʻoku ou loto foʻi ai ʻi he ngaahi ngāue ʻoku ngali ʻe ʻikai toe ʻosí, ʻoku ou fakamanatu pē kiate au ʻa e mahuʻinga mo pelepelengesi e taimi ko ʻeni he moʻuí. ʻE taimi nounou pē ʻa ʻeku nofo mo ʻeku fānaú, pea ʻoku ou fakamahuʻingaʻi ʻa e taimi ʻoku ou maʻu ke tokoniʻi kinautolu ke nau akó, pea mo ʻeku mamata ki heʻenau tupulaki ki he kakai fakaofo ʻoku finangalo ki ai e Tamai Hēvaní.

Kuo liliu ʻeku fakakaukau ki he tuʻunga fakaefaʻeé ʻi heʻeku muimui ki he ngaahi ueʻi fakalaumālie ko ʻení. Ki muʻá, naʻá ku ongoʻi ʻo hangē naʻá ku tō ʻi he ngaahi meʻa lalahi ʻo e moʻuí. Ka ʻoku ou ʻiloʻi he taimí ni, ʻoku hoko ʻeku fānaú ko e meʻa lalahí ia. Ko e fiefia mo e taumuʻa ne u kumiá, naʻe ʻi muʻa ʻiate au he taimi kotoa pē. ʻOku ʻikai ko ha tokotaha ngāue fakaʻapi pē au; ko aú ko ha faiako, ko ha tokotaha faleʻi, ko ha tokotaha falalaʻanga. ʻOku hoko e tuʻunga fakaefaʻeé ko ha tāpuaki maʻongoʻonga pea mo ha pole lahi, pea ʻoku ou houngaʻia ʻi he ngaahi founga ʻokú ne poleʻi, akoʻi, pea mo siviʻi ai au ke u hoko ko e tokotaha ʻoku finangalo ki ai e Tamai Hēvaní.