Soká mo e ʻAho Sāpaté
Fai ʻe ʻEletā Jörg Klebingat
ʻO e Kau Fitungofulú
ʻOku hoko ʻa e soká ko e sipoti manakoa taha ia ʻi Siamane. Naʻe lēsisita au ʻe heʻeku tangataʻeikí ki ha kalapu soka ʻi he taimi naʻá ku taʻu nima aí. Ne mau ako vaʻinga tuʻo tolu pe tuʻo fā he uike. Ko e lahi taha ʻo e ngaahi vaʻingá naʻe fakahoko ia ʻi he ʻaho Tokonakí pe ʻaho Sāpaté. Ko e taimi naʻe ʻikai ke u vaʻinga soka ai maʻá e timi ʻa e kalapú, naʻá ku vaʻinga soka mo hoku ngaahi kaungāmeʻá. ʻOku mau vaʻinga soka he meimei ʻaho kotoa pē kae ʻoua kuo taaitō ‘a e laʻaá.
ʻI heʻeku taʻu 15, ne u kamata vaʻinga ʻi ha timi ʻi ha kolo lahiange. Naʻe fakaaʻu ke toe fakamātoato ange ʻa e soká. Ne lahi ange ʻemau toutou ako vaʻingá. Naʻa mau fononga ki ha ngaahi feituʻu lahi ange. Naʻe lahi ange mo e ngaahi timi ne mau vaʻinga mo iá. Ne hoko ʻa e soká ko ʻeku moʻui.
Pea, ʻi he mei hoko hoku taʻu 18, naʻá ku ʻi ha koniseti. Ne u sio ai ʻi ha tamasiʻi ʻokú ma meimei taʻu tatau. Naʻe ʻasi makehe. Naʻe ʻikai ke ne inu kava mālohi, ifi tapaka, pe kapekape. Naʻá ku fie ʻiloʻi hono ʻuhingá. Ne u ʻiloʻi ko ha mēmipa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻai ʻe heʻene tā sīpingá ke u toe fie ʻilo lahi ange. Naʻá ku kau kimui ange ki he Siasí.
Naʻá ku ako e meʻa ʻe ua hili hoku papitaisó. ʻUluakí, ʻoku ʻikai totonu ke u soka ʻi he ʻaho Sāpaté. ʻOku totonu ke u ʻalu ki he lotú. Ko hono uá, naʻe finangalo e Tamai Hēvaní ke u ʻalu ʻo ngāue fakafaifekau. Ka ko ha tangata soka lelei au. Ne ʻi ai haku kaungāmeʻa ne ma vaʻinga soka ʻi heʻema tupu haké. Ne ma takitaha maʻu ha faingamālie ke vaʻinga ʻi ha timi palofesinale. Naʻe tali ʻe hoku kaungāmeʻá ʻa e faingamālié. Naʻá ku fili au ke tuku e soká ka u ʻalu ʻo ngāue fakafaifekau. Naʻe ʻikai ko ha fili faingataʻa he naʻá ku ʻiloʻi ʻoku moʻoni ʻa e Siasí.
Ka naʻe faingataʻa ʻeku filí ki hoku fāmilí mo e ngaahi kaungāmeʻá. Naʻe ʻikai mahino kiate kinautolu ʻa e meʻa naʻá ku faí. Ne meili mai ʻe heʻeku ongo mātuʻá ha konga nusipepa ʻoku hā ai ʻa e vaʻinga soka hoku kaungāmeʻá. Naʻe ʻikai faingofua ia kiate au. Ka naʻe ʻikai ke u fakaʻiseʻisa ʻi heʻeku ngāue fakafaifekaú.
Kuo tāpuekina au ʻe he Tamai Hēvaní ʻi he ʻaho kotoa pē koeʻuhi ko ʻeku fili ke u ʻalu ʻo ngāue fakafaifekaú. Kuó Ne faitāpuekina au ʻaki ha nonga. Naʻá ku ongoʻi ʻa e ongo lelei ko ia ʻoku maʻu ʻi he fai ʻo e fili totonú.