Ngaahi ʻAta ʻo e Tuí
Tēuleni mo Siteisi Lea
Senē, ʻAositelēlia
ʻOku fiefia ʻa Tēuleni mo Siteisi Lea ke feohi mo ʻena kiʻi taʻahine ko Tuí, ʻi ha matātahi ofi ki honau ʻapí. Kimuʻa pea toki fāʻeleʻi ‘a Tuí, naʻe fehangahangai e fāmili Leá mo ha ngaahi faingataʻa lalahi. Naʻe pehē ʻe Tēujleni ʻi he ʻikai ke ne ʻilo e meʻa ke faí, “Ne ma huʻu atu ki he taʻeʻiloá. Naʻe ʻikai ke ma ʻiloʻi e meʻa ne toka mei muʻá.”
Naʻe ʻilo ʻe Teuleni mo Siteisi ʻi heʻena fehangahangai mo ha kahaʻu taʻepaú, naʻe tokoniʻi kinaua ʻe heʻena tui kia Sīsū Kalaisí, ʻi hona ngaahi faingataʻaʻiá. ʻOku pehē ʻe Siteisi, “ʻOku ʻi ai ha nonga mo ha fiefia moʻoni ʻi he muimui kia Sīsuú mo e fai e meʻa totonú.”
ʻOku ou houngaʻia e fāmili Leá ʻi he laumālie ʻoku nau maʻu ʻi honau ʻapí. ʻOku pehē ʻe Siteisi, “ʻOku maʻu ʻe he ongoongoleleí ʻa e meʻa kotoa pē.” “ʻOkú ne tuku ke mau fiefia ʻi he moʻuí ni.”
ʻOku hoko ʻa Tui ko ha fakamanatu kia Teuleni mo Siteisi ʻo e ngaahi tāpuaki kotoa pē kuó na maʻú. “ʻOkú ne hoko ko ha huelo ʻo e ʻamanaki lelei mo e tui mo e fiefia!” Ko e lau ia ʻa Teulení.
Naʻe fakatau atu ʻe Teuleni mo Siteisi e meʻa kotoa ke tulia e ngāue naʻe fakaʻānaua ki aí, ke hoko ko e leʻo ʻi ha fale hiki heleʻuhila ʻi Lonitoni, ʻIngilani. Ka ʻi heʻena ʻiloʻi ne ʻamanaki ke ʻi ai haʻana pēpeé, hili ha ngaahi taʻu lahi ʻo ʻena feingá, naʻá na fakatokangaʻi leva he ʻikai ke na lava ʻo nofo ai ʻi he paʻanga hū mai pē ʻa Teulení.
Tokotaha faitaá, Christina Smith
Siteisi: Naʻá ma kamata talanoa leva ke ma foki mai ki ʻAositelēliá. Naʻe ʻikai ke ʻi ai ha ngaahi fale hiki heleʻuhila ia ʻi Pilisipeini. Kuo pau ke aʻu ʻo tukuange ʻe Teuleni ʻa ʻene ngāué.
Teuleni: Ne ma huʻu atu ki ha taʻeʻiloa. Naʻe ʻikai ke ma ʻiloʻi e meʻa ne hanga mai mei muʻá.
Siteisi: ʻI he māhina hono nima ʻeku feitamá, ne ʻomi fakatuʻupakē ha meʻa ke u fai, ke lea ʻi he houalotu sākalamēnití. Ko e tefitó ko e tui kia Sīsū Kalaisi he lolotonga ʻo e ngaahi faingataʻá. ʻI he aʻu mai ki he taimi ko iá, ne teʻeki ke ma fili ha hingoa ki heʻema kiʻi pēpē fefiné. Naʻá ku lau e Tikisinali ʻo e Tohitapú mo e Fakahinohino ki he Ngaahi Folofolá fekauʻaki mo e “Tuí” ʻi heʻeku teuteu ke leá. Naʻá ku toutou fakatokangaʻi e foʻi lea tui, tui, tui, peá u ʻiloʻi peseti ʻe 100 leva e meʻa ke fakahingoaʻaki ʻema kiʻi taʻahiné. Ne u sio pē kia Teuleni mo pehē ange, “Tui. Ko hono hingoá ia. Ko e meʻa ia ʻoku ou fie fakahingoaʻaki ʻeta kiʻi taʻahiné.
Teuleni: Naʻá ma fakatou ongoʻi lelei moʻoni fekauʻaki mo e hingoa ko e Tuí. Ne hangē naʻá ne fālute kotoa e aʻusia naʻá ma fouá.
Siteisi: Naʻe pau ke ma maʻu ha tui lahi ke tukuange e ngāue ʻa Tēulení, toe foki pē ki he masivá ʻo ʻikai toe ʻi ai ha meʻa, pea toe kamata, taʻe ʻi ai ha ngāue pau.
Teuleni: Ne pau pē ke ma laka ki muʻa ʻi he tui mo ʻamanaki pē ʻe lelei e meʻa kotoa. Naʻá ma foki mai leva peá u ngāue fakafaiako ʻi ha malaʻe tatau ʻi ha ʻunivēsiti. Pea uesia hoku tuʻá ʻo pau ai ke u nofo mei he ngāue fakafaiakó.
Siteisi: Ne ma hiki leva ʻo nofo mo ʻeku ongo mātuʻá. Naʻe ʻikai haʻama paʻanga pe meʻalele.
Teuleni: Ne u ongoʻi hangē kuó u tau-takelé. Feitama hoku uaifí, ʻikai haʻaku ngāue pea ʻikai malava ʻo totongi ha feituʻu ke ma nofo ai.
Siteisi: Naʻe ʻi ai ha kiʻi taimi ne ma tūʻulutui ai ʻi he loki fō ʻi he fale ʻo ʻeku ongo mātuʻá, ʻo lotu.
Teuleni: Naʻe ʻikai ke ma lotu pē, ka naʻá ma tautapa ki ha tokoni ke ma ikunaʻi ʻeni mo lava ʻo hoko atu.
Siteisi: Mahalo ko e lotu lahi taha ia kuó ma fakahoko fakataha. Naʻe tā mai ʻeku kui fefiné ʻi he ʻaho hono hokó ʻo talamai te ne fakatau ha kā foʻou pea naʻá ne fie maʻu ke ʻomi maʻamaua ʻene kā motuʻá.
Teuleni: Naʻá ma mātuʻaki ʻohovale ʻaupito.
Siteisi: Naʻá ma ongoʻi ko ha tali fakahangatonu ia ki heʻema lotú.
Teuleni: Hili ia peá ma fanongo naʻe ʻi ai ha fale hiki foʻou ʻi Pilisipeini. Naʻá ku maʻu ha ngāue aleapau ai ʻi he animation.
Siteisi: Naʻe ʻikai haʻama teitei fakakaukau ʻe ngāue animation ʻi Pilisipeini!
Teuleni: Pea naʻe faʻa ʻeva mai hoku tokouá mo ha ngaahi meʻavaʻinga ki he pēpeé.
Siteisi: Ne foaki mai ki heʻema kiʻi taʻahine ha ngaahi meʻa lahi mei he ngaahi mahení mo e fāmilí.
Pea fāʻeleʻi leva ʻa Tui pea—ʻoku ʻikai ke u ʻiloʻi pe ʻe fakamatalaʻi fēfē—ko e meʻa lelei taha ia kuo hoko. Kuo ʻosi taʻu ua ʻeni, pea kuo mau hiki ki Senē. ʻOku kei ngāue animation pē ʻa Teuleni ki he ngaahi heleʻuhilá, ka naʻe ʻikai haʻama fakakaukau ʻe hoko. ʻOkú ma ongoʻi tāpuekina moʻoni. Kuo taki mai kimaua ki heni ʻe heʻema tuí.
Teuleni: ʻOkú ma lava ʻo mamata moʻoni ki he toʻukupu ʻo e ʻOtuá ʻi heʻema moʻuí. ʻOku ou fakaʻamu pē naʻe maʻu ʻe heʻema kiʻi pēpē ko Tuí, ha konga ʻo ʻema tuí ʻi heʻema foua homa ngaahi faingataʻá. ʻOkú ne hoko ko ha huelo moʻoni ʻo e ʻamanaki lelei mo e tui mo e fiefia!
Siteisi: Kuó ma ʻiloʻi ʻoku tatau ai pē pe ko e hā e ngaahi faingataʻa ʻokú ma foua, ko e meʻa mahuʻinga taha te ma lava ʻo maʻú, ko e tui ki he Tamai Hēvaní mo Sīsū Kalaisi.
Ko e taimi kotoa pē ne ma tafoki ai kia Sīsū Kalaisi mo tui kiate Ia, ʻoku hangē ʻoku malava e meʻa kotoa peé. ʻOku ʻi ai ha nonga mo ha fiefia moʻoni ʻi he muimui kia Sīsuú mo e fai ʻo e meʻa totonú. ʻOku maʻu ʻe he ongoongoleleí ʻa e meʻa kotoa pē. ʻOkú ne tuku ke ma fiefia ʻi he moʻui ko ʻení. ʻOku ou fiefia ʻaupito pea ʻoku ou ʻiloʻi ʻoku tuʻunga ia, he kuó u tafoki ki he ʻEikí, falala ki he ongoongoleleí, mo tui.
Teuleni: Kuó u ʻilo ʻoku ʻomi ʻe he ʻOtuá e ngaahi fekaú mo e ngaahi fonó ke tau fiefia ange ʻetau moʻuí koeʻuhí he ʻokú Ne ʻafioʻi e meʻa kotoa pē. Ko e taimi ʻoku ʻikai ke tau lava ai ʻo ʻilo ʻa e meʻa ʻoku hanga mai mei muʻá, ʻoku fie maʻu ke tau falala kiate Ia, tauhi ʻEne ngaahi fekaú, pea ʻalu kiate Ia ʻi he lotu. Te Ne tataki kitautolu ʻi hotau ngaahi faingataʻá mo tokoniʻi kitautolu ke toe lelei ange ʻetau moʻuí.