Faatasi ai ma le fesoasoani, ua ou salamoina ai agasala faifai pea. Ae ou te fefe ne’i ou toe solo i tua. E faapefea ona ou tetee atu i faaosoosoga ma tumau pea i le fiafia?
Ia suia lou fefe i le faatuatua ia Iesu Keriso ma Lana Togiola, i Lona mana e siiae ma suia ai oe, ma i Lona alofa ma le alofa mutimutivale. Ia manatua le Tama Faalelagi ma Iesu Keriso ma lo Laua agalelei ia te oe. Ia lotomaualalo, tatalo, suesue i tusitusiga paia, ma ia faamaoni. (Tagai i le Mosaea 4:11–12.) Ona mafai lea ona e maua le olioli, “o le meaalofa lea e sau mai le taumafai ma le loto i ai e ola i se olaga amiotonu, e pei ona sa aoao mai e Iesu Keriso.”1
O le salamo atoatoa e mafai ona luitauina. E masani ona manaomia ai se taimi umi, aemaise lava pe afai na e agasala pea lava pea. Aloese mai tulaga e aumaia ai faaosoosoga. Atonu e manaomia ona suia au faiga masani, tulaga o siomia ai oe, ma au uo. Afai e te sasi, ia manatua e mafai lava ona e salamo ma suia. Taumafai pea. O le a le fiu lava lou Tama Faalelagi ma lou Faaola ia te oe. “O le Togiola … e mafai ona fufulu mamaina ai soo se pisia e tusa lava po o le a le faigata, po o le a le umi, po o le a foi le tele o taimi na fai soo ai.”2