O Le Ala e Malolo ai Tagata e Faasaoina Mai [le Pule i le Ola]

Saunia e le Tautua a le AAG mo Aiga

Ata

woman kneeling at bed

A filifili se tagata e faamuta o latou tiga e ala i le pule i le ola, e faapea ona amata ai se faagasologa faigata ma tulaga ese le tiga o le faavauvau, mo e e pele ua tuua (lea e masani ona taua o tagata na faasaoina mai). E faateteleina lagona o le le mautonu, tausalaina, tuulafoaia, teenaina, ma le ita. O fesili e lei taliina o le Aisea? O le a se mea na ou misia? Aisea na ou le maua ai se uunaiga? E mafai faapefea e lenei mea ona aafia ai taui e faavavau? ma isi fesili faapena, e mafai ona mafua ai ni faigata maoae faapea foi ma ni mafaufauga atonu o i latou na mafua ai le maliu o se tagata e pele ia i latou.

O loo i ai se uiga ua matele ai tagata e sao mai, o le o ese mai ma le matamumuli mai i isi ona o le matau i tuuaiga, faamasinoga, ma le maasiasi. Atonu foi e lagona e tagata na sao mai ni lagona mafatia loloto, ae maise lava mo se tasi na tau i le tino. E mafai foi ona tutupu ae ni mafaufauga pule i le ola e tagata na sao mai ona o lo latou faavauvau.

E ui lava i na loloto o le tiga ma le le fiafia, ae o lo tatou Faaola na “afio ifo i lalo o mea uma” (tagai i le MF&F 88:6; 122:8) “ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12) ina “ia tatou … maua ai foi le alofa tunoa e fesoasoani mai i ona aso e tatau ai” (Eperu 4:16).

Ia i latou o e ua loto faavauvau:

Aua le tuuaia isi, aemaise o oe lava.
Ia tausia oe lava i le faaleagaga: Ia faalagolago i le meaalofa o le faitalia, ia faailoa atu e i ai mea e te le mailoa (tagai 1 Nifae 9:6), ma ia faalagolago i le mana o le Alii e faamalolo ma tuuina mai ai le filemu (tagai i le Filipi 4:7).
Ia tausia oe lava i le faaletino: Faatumau se faiga masani o taumafataga lelei, malolo, ma faamalositino.
Aapa atu mo le lagolago mai ia i latou e te faatuatuaina (o aiga, uo, epikopo), ma ia tuu atu i isi e fesoasoani ia te oe i lenei faalavelave.
Ia auai i gaoioiga lelei lea e maua ai mea e faalavefau.
Talanoa i se faufautua faapolofesa ma/po o le auai i se vaega e lagolago ai tagata e aafia i le pule i le ola.
Ia onosai i le faagasologa o lou faamalologa.

Ia i latou o loo tausia se tagata o loo faavauvau:

Ia agaalofa ma aua le tuuaia pe faamasino atu. Ia malamalama i ala e “tusa ai ma le finagalo o le Alii i le faatatau o ona alofa mutimutivale” (MF&F 46:15).
Aapa atu ma fai atu i le tagata na sao mai pe mafai faapefea ona e fesoasoani atu e oo lava i galuega faigofie, po o le tou o faatasi i gaoioiga.
Ia onosai, faalogo, ma talia lagona latou te faasoa mai i lo latou taimi.
Aloese mai faamatalaga e leai ni uiga ma faamautinoaga sese e pei o le, “O le a lelei mea uma,” “Semanu e sili atu le leaga,” “Ou te iloa ou lagona,” “Ou te malamalama,” “O le finagalo lea o le Atua,” “O le taimi e faamaloloina ai manua uma,” ma isi mea faapena.
Aua le taumafai e tuuina atu ni tali i a latou fesili e le mafai ona taliina.
Aua le faatusatusaina o latou faavauvau ia te oe e tusa lava pe sa faatatau i se pule i le ola.
Talanoa ia i latou e uiga i e e pele ia i latou, i auala tutusa e te ono talanoa ai i se tagata na maliu i se isi ala.
Ia faumautinoa atu i tamaiti na aafia ai, e le o i latou na mafua ai.
Ofo atu e fesoasoani ia i latou e sue ni punaoa faaopoopo mo lo latou faavauvau (fautuaga, vaega o tagata lagolago, ma isi mea faapena).