Savali a Faiaoga Asiasi
Ua Tasi le Loto
Ia suesue ma le agaga tatalo lenei savali ma saili ia iloa mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?
Ina Ia Tasi I Tatou, saunia e J. Kirk Richards
“Ma sa taʼua e le Alii lona nuu o Siona, ona sa tasi o latou loto ma tasi le mafaufau, ma sa mau i le amiotonu; ma sa leai se mativa i totonu o i latou” (Mose 7:18). E mafai faapea ona tatou tasi?
Fai mai Elder M. Russell Ballard o le Korama a Aposetolo e Toasefululua: “I le fatu o le upu faa-Peretania togiola ua i ai le upu tasi. Afai e malamalama tagata uma i lenei mea, o le a leai lava se tasi o le a tatou le popole i ai, e tusa lava po o le a le matua, ituaiga, itupa, tapuaiga, po o tulaga i agafesootai po o le tamaoaiga. O le a tatou taumafai e faataitai i le Faaola ma o le a tatou le agaleaga, le popole, le faaaloalo, po o le lē magafagafa i isi.”1
Na aoao mai Peresitene Henry B. Eyring, Fesoasoani Muamua i le Au Peresitene Sili: “A i ai i tagata [le] Agaga e faatasi ma i latou, e mafai ona [latou] faamoemoe e i ai le lotogatasi. … E le faaosofia lava e le Agaga o le Alii ia finauga (tagai i le 3 Nifae 11:29). … E taitai atu ai i le filemu patino ma se lagona o le aufaatasi ma isi.”2
O le ta’ua ai o luitau i aiga, na saunoa mai ai Carole M. Stephens, o le sa avea ma Fesoasoani Muamua i le Au Peresitene Aoao o le Aualofa: “Ou te le’i oo lava i ni aafiaga o le tatalaina o se faaipoipoga, le tiga ma le le mautonu e sau mai le tuulafoaiina, po o le tiutetauave e fesootai ma le avea ma se tina nofotoatasi. Ou te le’i oo foi i ni aafiaga o se maliu o se tamaitiiti, le lē mauaina o ni fanau, po o le tosina atu i le itupa e tasi. Ou te le’i oo foi i le onosaia o le sauaina po o se gasegase tumau po o ni mea ua fai ma vaisu. Ou te le’i maua le avanoa e tofotofoina ai i nei mea.
“… Ae e ala i o’u tofotofoga ma luitau faaletagata lava ia …ua ou masani lelei ia te Ia o le, e malamalama i ai. … Ma le isi, ua ou oo uma i tofotofoga faaletino ia na ou ta’ua mai se vaaiga faaleafafine, faaletina, faaletinamatua, faaleuso, faaleolomatua o le aiga, ma faaleuo.
O lo tatou avanoa o ni afafine tausi feagaiga o le Atua e le na o le aoao mai i o tatou lava luitau; ae o le faatasia lea i le loto malamalama ma le agaalofa a o tatou lagolagosua i isi tagata o le aiga o le Atua i o latou faigata, e pei ona tatou osifeagaiga e fai”3.
Mau Faaopoopo ma Faamatalaga
FaatuatuaAigaToomaga