O Leo o Le Au Paia o Aso e Gata Ai
O Le Faaola: O Le Fomai Atoatoa
Ata na tusia e Joshua Dennis
I le avea ai ma se fomai o gasegase faainuvai, sa i ai se aso sa sau ai se ma’i ia te au, ina ua oo i tua atu mai le mea e tatau ona i ai le suega masani o lona toto. I le va o aso na suesue ai lona toto ma le ma feiloaiga, sa ia fesili ai i le initoneti po o le a le uiga o taunuuga. Ina ua ma feiloai, sa le fiafia o ia ma popole. Sa ou taumafai e faamalamalama atu taunuuga, ae sa matuai popole pea lava.
“Aua e te popole po o le se mea e ono faaletonu,” na ou fai atu ai ia te ia. “O la’u galuega lena! O le mea lena ua ou i ai iinei. Sa ou suesue malosi e iloa ai le mea e fai e uiga i lenei mea. O le a ta manumalo faatasi i lenei mea, ma afai o le a e mulimuli i a’u faatonuga, o le a e iloa le ala e te toe malosi atoatoa ai. Talitonu mai ia te au ma tuu mai ou te tauaveina le avega o popolega faafomai. Ona mafai lea ona taulai uma atu lou malosi ina ia e faasolo manuia.”
Sa fesoasoani lenei mea e faatoa filemu lona fefe. Sa ma faia ni fuafuaga e toe fai nisi sailiiliga, ma sa ou folafola atu o le a ma agai faatasi i luma.
O ni masina mulimuli ane, sa tulai mai ai ni faigata i lou lava olaga. O tele o mea e fai i le galuega, o se pepe o le a fanau mai, ma le matou siitia ese na loma, sa lofituina ai au. Sa oo ina ou le fiafia, atuatuvale, ma fefe.
Sa ou tatalo faatauanau e uiga i ou popolega, agasala, ma le fiafia. A o ou tatalo, na molimau mai le Agaga i le taua o le Faaola i lo’u olaga. Sa pei na Ia fetalai mai ia te au:
“Aua e te popole i mea uma e ono tutupu. O la’u galuega lena! O le mea lena ua Ou i ai iinei. Sa ou mafatia i mea uma lava ia iloa ai le mea e fai i le mea lenei. Ia faatuatua mai ia te au, ma o le a ta manumalo faatasi i lenei mea. Afai o le a e mulimuli i a’u faatonuga, e mafai ona e toe atoatoa. Talitonu mai ia te au ma tuu mai ou te tauavea na avega faaleagaga. Ona mafai lea ona taulai atu au taumafaiga uma i le avea ma tagata sili ona lelei e mafai ona avea ai oe.”
Faatasi ai ma lenei malamalamaaga, na faapea ona aveesea ai lo’u popole, tausalaina, ma le le fiafia. O le faatuatua ia te Ia na aveesea ai lagona le manuia sa taofia ai lo’u alualu i luma. Ua mafai ona ou taulai atu i mea e mafai ona ou taulimaina. Ua mafai ona ou ola i le talalelei ma liliu atu i le Faaola i o’u luitau.
I le auala lava lea e tasi, lea e ono mafai e se fomai ona taitai atu i tatou i le malosi atoatoa faaletino, e mafai ai e le Faaola, le Fomai atoatoa, ona aveese le avega o le maasiasi, popole, tausalaina, ma e oo lava i lagona o le le fiafia ma le atuatuvale, ma faaali mai ia i tatou le ala e toe atoatoa ai faaleagaga. O Lana galuega lena, ma na te faia ma le atoatoa.