Enisinia o Vaalele
E tele mea e mafai ona aoao mai e se vaalele ia te oe e uiga i le usiusitai, faaaliga, ma le taitaiga faaleagaga.
Malosiaga e Lua
A o ou faigaluega o se enisinia o vaalele, sa ou iloa ai, e manaomia e se vaalele ni malosiaga se lua ia lele ai:
-
Uunai, po o le malosi o le alu i luma, i se saoasaoa talafeagai ia mafai ai ona masii i luga [le vaalele]. O le uunai e aveese ai le totoso, lea e taofiofi ai le minoi o le vaalele.
-
Masii, lea e maua ona o le eseese o le malosi o le ea lea e alu i luga a’e o le apaau ma le ea lea e alu i lalo ifo o le apaau (lea e ta’u o le mataupu a Bernoulli). O le masii e faatoilalo ai le toso i lalo, lea e ono tosoa ifo i lalo le vaalele i le eleele.
Faasaoga o le Alavaa
Ioe, e tele isi mea e tutupu pe a lele se vaalele. Ae o le tele lava e aofia ai ni polokalama faaopoopo se lua.
-
O fesoasoaniga mo le ta’iina o le ala, e fesoasoani i le pailate e faatumau le vaalele i le alavaa. O nei mea e aofia ai fua ma ki e i totonu o le potu o le avevaalele, ae o loo aofia ai foi faailo o reita [radar] ma masini o fesootaiga i leo e fesootai ai ma olo e mataituina vaalele.
-
O faatonutonu o le vaalele e faafaigofie ai suiga o le ala. E aofia ai tapili (o apata e i luga o le siusiu o le vaalele), ma fasi aileone [ailerons] ma fasi ta [trim] (o apata laiti i luga o apaau), o apata lapopoa ma sipoila [spoilers], selati [slats], ma apaapa taofiofi [stabilizers]. O mea nei e mafai ai e le vaalele ona taavale, a’e, tifa maulu, liliu ma toe sau malie i le eleele pe a oo i le taimi e tulaueleele ai.
Mautu Lelei
E faalagolago pailate i le aufaigaluega i le laueleele. E tapena e le aufaigaluega le vaalele mo le malaga, taitai atu ma toe taitai mai i le auala e sesee ai, fai muai asiasiga a o lei tuuvaa atu ma pe a taunuu mai faigamalaga, ma faatino pe fautuaina atu mo le siakiina ma le faaleleia atoa o le vaalele. O le aufaigaluega e nafa ma le tausiga ma le saogalemu o le vaalele.
O Le Fesootaiga o Lenei Mea ia te Oe
Fai ni nai faatusatusaga faigofie, o le a e maua ai ni mea mananaia e tutusa ai mataupu faavae o le malaga a se vaalele ma mataupu faavae o le talalelei.
Masii Faaleagaga
O le usitai i tulafono ma sauniga o le talalelei e maua ai le malosiaga. Na te aumaia ai le uunaiga faaleagaga lea e maua ai le masii faaleagaga. E faatumauina ai lo tatou agai i luma. E mafai ai ona tatou tutu maualuga ae nai le lalolagi, lea e mafai ona tatou iloa manino atu ai le auala e toe foi atu ai i lo tatou Tama Faalelagi.
Faasaoga o le Alavaa
Ina ua uma ona e papatiso, sa e mauaina le Agaga Paia, o le masini aupito sili ona lelei o masini taiala uma faaleagaga. A o e faaauau pea i le usiusitai, o le a tuuina atu e le leo filemu ma le itiiti ni uunaiga faifai pea e uiga i le mea e fai, po o fea e alu i ai, ma le ala e gaoioi ai. Afai e te faalogo ma le toto’a, o le a ia taialaina oe.
Ae ua ia te oe lava le faaaogaina o mea ua tuuina mai e le Alii e faasa’o ai lou ala. O ia mea e aofia ai nofoaga mo iloiloga—o e tatalo e le aunoa, suesue i tusitusiga paia, auai i sauniga, saunia mo ma alu i le malumalu? Ma e aofia ai le salamo, lea e mafai ai ona e faia ni fetuunaiga tetele ma laiti i le mausali faaleagaga, maualuga faaleagaga, ma taunuuga.
Faamaoniga Faaleagaga
E faapei o se pailate, e tatau ona e faalagolago i lau aufaigaluega faaleagaga i le laueleele. O lau aufaigaluega e aofia ai ou matua, taitai o Alii po o Tamaitai Talavou, lou epikopo ma ona fesoasoani, faiaoga o aiga, faiaoga o le seminare, ma uo amiotonu. Mafaufau i faatalanoaga ma i latou o ni muai asiasiga a o lei alu le faigamalaga ma le foi mai o le faigamalaga. E pei lava ona siakiina se vaalele i taimi uma e malolo ai, o le a e maua ni avanoa e faamaonia ai lou nofo saunia e lele i le taimi o faatalanoaga masani ua faatulagaina. O lau aufaigaluega faaleagaga i le laueleele o le a fesoasoani ia te oe e iloilo ou gafatia, saunia lau fuafuaga o le faigamalaga, ma fautuaina oe e uiga i le saoasaoa o savili faaleagaga ma ni faafitauli e faaolioli mai. O ni gaoioiga faapitoa, e pei o le alu i le malumalu, o le a manaomia ai le faamaoniga o loo e agavaa mo le lele ese atu. O saunoaga o konafesi aoao ua pei lava o le faalogo atu i se pule o le faigamalaga o le e mafai ona iloa atu vaalele uma i le taimi e tasi, ma tuuina mai ni faatonuga taua e taiala ai le faigamalaga. O le usiusitai i le fautuaga na tuuina mai o le a fesoasoani e te uli mamao ese ai mai ni tulaga e ono lamatia ai.
Saunia e Lele
I se uiga faaleagaga, e tatau ona tatou felelei. O i tatou o fanau a lo tatou Tama Faalelagi, ma e finagalo o Ia ia tatou taunuu i tulaga maualuluga faaleagaga. I le avea ai ma Ana fanau, e tatau ona tatou aapa mo le lagi aua faatasi ai ma Lana fesoasoani, e mafai ai i taimi uma ona tatou felelei atu i mea maualuluga fou.