Tali mai Taitai o le Ekalesia
O Auala e Valaaulia ai le Agaga Paia
Saunia e Peresitene Henry B. Eyring
Fesoasoani Muamua i le Au Peresitene Sili
Mai se faigalotu a le Iunivesite o Polika Iaga–Idaho i le aso 25 o Ianuari, 2005.
O se tasi o auala ou te iloa ai o loo ou lagonaina le uunaiga a le Agaga Paia o le, ou te lagona se malamalama ma ou te fiafia. Pe a foliga mai e mamao ese le Agaga Paia mai ia te au, ou te lagona se pouliuli ma ou te le fiafia. Sa ou lagonaina lena maui atu ma le fana’e mai o le malamalama ma le fiafia i lo’u olaga, ma e faapena foi ia te oe.
Ou te fia lagonaina lena malamalama ma ou te fia fiafia. Ou te tau le faatali mo faafitauli ma tofotofoga ina ia ou manao ai i le fesoasoani a le Agaga Paia. E mafai ona ou filifili e manatua le tulaga na i ai lena mafutaga, ma soo se taimi ou te faia ai, ou te toe manao ai ma lo’u loto atoa i lena faamanuiaga.
A tatou mananao i le Agaga Paia ma le filemu o le mafaufau ma le olioli lea e o mai faatasi ai, ua tatou iloa le mea e fai. Tatou te aioi atu i le Atua mo lena mea i le faatuatua. E manaomia ai le tatalo o le faatuatua e aumaia ai le mafutaga a le Agaga Paia. O lena faatuatua e tatau ona faapea, o loo soifua le Atua le Tama, le Foafoa o mea uma, ma finagalo ia tatou maua le Agaga Paia ma finagalo e auina mai le Fesoasoani ia i tatou. E manaomia le faatuatua o Iesu o le Keriso, ma sa Ia togiolaina a tatou agasala ma motusia noataga o le oti. Faatasi ai ma lena faatuatua tatou te o atu ai i lo tatou Tama i le faaaloalo ma le talitonuga o le a tali mai o Ia. Faatasi ai ma lena faatuatua tatou te faaiu ai a tatou tatalo i le suafa o Iesu Keriso i le avea ai ma Ona soo moni, mautinoa o lo tatou salamo moni, o lo tatou papatisoga e Ana auauna, ma a tatou auaunaga faamaoni i Lana galuega ua faamamaina ai i tatou, ma tatou mama ma agavaa ai i le faamanuiaga ua tatou sailia, o le mafutaga a le Agaga Paia.