Aua le Taalo i le Afi!
Saunia e Jean B. Bingham
Peresitene Aoao o le Aualofa
“Tausi poloaiga! O i ai le malu; ma le filemu” (Tusipese a Tamaiti, 68).
A o o’u tuputupu ae, o se tasi o au galuega o le susunu lea o le otaota. Ou te aoina mai le otatoa mai le fale. Ou te tuua i totonu o se paelo uamea lapoa e i tuafale. Ona ona tutuina lea o se laau afitusi ma togi i totonu o le paelo.
I se tasi aso sa ese le savili, ma sa le mafai ona ola le afitusi. Sa ou filifili loa e fai se sulu i nusipepa. Sa ou mafaufau e faapea, o lea faiga o le a umi ai le mumu o le sulu e tutu ai le afi o le otatoa. Sa ou manatuaina sa le o se mea atamai le taalo i le afi, ae sa ou le amanaiaina le lagona o le lapataiga. Sa ou taaia faalaumiumi ni nusipepa, tutu i le afitusi, ma togi loa i totonu o le paelo.
Whoosh! O le savili malosi na mafua ai ona mumusaesae le nusipepa, ma na vave lava ona mu ai le otaota. Na misi le lelea o apeafi mumu tele mai o’u foliga. O le mea na laki ai sa faaponi i tua lo’u lauulu. Ae o lo’u koke sa pei o ni fasifilo pupuu ma malo! Na leai ni o’u laumata, faapena foi i o’u fulufulumata. Sa vave tele le tupu o le mea!
O lena mea sa ou aoao mai ai se lesona: afai e te taalo i mea matautia, e mafai ona e lavea ai! O o tatou matua ma le Agaga Paia e lapataia i tatou e aloese mai mea matautia e pei o ponokalafi ma fualaau faasaina. Afai tatou te filifili e aua le amanaia lapataiga, e i ai o latou taunuuga.
Ou te faafetai ona sa toe tutupu lo’u lauulu i le aluga o le taimi. E faapena le salamo. A tatou faia ni filifiliga sese, e mafai ona tatou filifili e sui. E mafai ona faamagaloina i tatou ona o le Togiola a Iesu Keriso. E tusa lava pe o le a lo tatou talavou po o le matutua, e i ai lava iina e le aunoa le Faaola e fesoasoani ia i tatou. E mafai ona tatou toe lagonaina le toafilemu, e pei lava ona i ai i le aso sa tatou papatiso ai.
Na tuuina mai e le Tama Faalelagi ia i tatou poloaiga ona e alofa o Ia ia i tatou. E finagalo o Ia e puipui ma fesoasoani ia i tatou. Oka se matagofie o meaalofa ua tuuina mai e le Tama Faalelagi ma Lona Alo o Iesu Keriso ia i tatou!