O Fanau Uma a le Atua
E alala le tusitala i Iuta, ISA.
“O se malumalu a le lotu Puta,” o le tala lea a tina. “O le lotu lea a Yéyé.”
“Matou te ta’utino atu ua ia i matou le aiā tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aiā tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai” (Mataupu Faavae o le Faatuatua 1:11).
Sa fiafia lava Iren i le asiasi atu i Taiuani. Sa avea o ia e lona tamamatua, o Yéyé, faatasi ma lona tuafafine laitiiti o Ila, i le pa manu ma i se tietiega vaa i se tamai motu. Sa latou o atu i ni togalaau mananaia na tumu i laau o le mago ma oketi. Ma sa latou asiasi atu i se mauga lea na taumafai ai manuki e gaoi a latou meaai! Sa fefe Ila i manuki, ae sa manatu Iren, sa matagofie tele i latou.
Sa manao Yéyé e aoao Iren ma Ila e uiga i le mea na o mai ai lo latou aiga. Sa ia ave i laua e feiloai i tagata uma o le latou aiga ma i faleaiga e faataitai ai i meaai fou. Sa faataitai e Iren le faaaogaina o fasilaau e aai ai. Sa faasolo ina lelei tele ai o ia.
I se tasi aso na avea ai e Yéyé ia Iren, Ila, ma o laua matua i se nofoaga faapitoa. O se fale tele lava, e i ai ni faitotoa tetele na matalatala ma se fola laupapa iila. Ae latou te lei o atu i totonu, sa talai ese seevae o Iren ma lona aiga. “O se nofoaga lenei e tatau ona e migao ai,” o le tala lea a tina. “E pei lava o le tatou falesa.”
“O se falesa le mea lenei?” Na fesili atu ai Iren. E mautinoa lava sa le pei o falesa sa ia vaai muamua i ai. O le taualuga felanulanuai o le fale sa tavi’o agai i luga ona pito. Sa savavali filemu mai i faitotoa tagata sa oofu i ni ofutalaloa lanu moana paauli.
“E tai faapena,” na fai atu ai tina. “O se malumalu a le lotu Puta. Ae e le faaipoipo pe faamau ai ni tagata ii, e pei o a tatou malumalu. O se falelotu mo le ekalesia a Yéyé. E sau o ia iinei e aoao ai i aoaoga a Puta ma fesoasoani i tagata.”
Na faaopoopo mai tamā, “E te manatua le mafuie i Taiuani lea sa tatou vaai i ai i luga o talafou i le masina talu ai? Sa fesoasoani i ai Yéyé ma isi volenitia o le malumalu lenei ina ua uma le mafuie.”
“O a a latou mea sa fai?” na fesili ai Ila.
“Ou te manatu sa latou avatu vai i tagata ma tapena le gasu,” o le tala lea a Tama. “Sa latou fesoasoani foi i tagata na leai ni fale e sue se nofoaga e nonofo ai.”
“Oi sole,” na fai mai ai Iren. Sa ataata atu o ia ia Yéyé. “E foliga mai o se galuega tele lena mea!”
Ina ua latou o atu i totonu o le malumalu, sa matauina e Iren le filemu ma toafilemu sa i ai. Sa ia tilotilo solo ma vaaia ai se faatagata laupapa tele. Sa tutu Ila ma Iren ma sioa i ai.
“O Puta le la?” O le fesili lea a Ila.
Sa luelue le ulu o Tina.
Sa tautala faaSaina atu Yéyé ia Tama, faapipii faatasi ona lima, ma ifo faatolu i luma o le faatagata o Puta.
“O loo aoao mai e Yéyé ia i tatou le ala e faaali ai le faaaloalo mo Puta,” sa fai mai ai Tama, i si ona leo taumusumusu.
Sa faanunumi faatasi e Iren ona fulufulu mata. “E le o le … ?” Sa taumafai o ia e manatua se mea sa faalogo muamua i ai. “E le o le tapuai lena i tupua?”
“O tagata lotu Puta e le tapuai sao ia Puta,” na fai atu ai Tama. “O Puta sa avea ma se faiaoga maoae, ma latou te asiasi mai i lona faatusa e manatua ai mea sa ia aoaoina mai.”
“A ifo la tagata iinei, o loo latou faaali atu le faaaloalo—e tai pei o le lululima,” na musumusu atu ai Tina. “E ifo Yéyé e faaali ai le faaaloalo mo Puta ma mea sa ia aoaoina mai.”
Sa fusi mai e Tina Iren ma Ila. “Ma e te lua iloa la?”
“O le a?” Na fesili ai Ila.
“O fanau uma lava nei a le Atua. E alofa o Ia ia i latou. E fiafia o Ia i mea o loo latou faia e fesoasoani ai i le tasi ma le isi.”
Sa tilotilo atu Iren ia Yéyé ma isi tagata uma o loo nofonofo filemu. Sa ia lagonaina le mafanafana ma le fiafia i lona loto ma iloa e moni le mea na fai mai ai Tina. Sa fai e Iren se tatalo puupuu i le Tama Faalelagi: “Faafetai lava mo le fesoasoani mai ia te au e feiloai i isi Au fanau.”