Puipuia o le Faatuatuaga
Saunia e Elder Jörg Klebingat
O le Fitugafulu
E manaomia e le Alii ni tagata e naunau ma mafai ona lotomaulalo ae e puipuia mausali Keriso ma le malo o le Atua.
Ata mai le Getty Images
I le muai olaga, sa ia i tatou le faitalia, mana e mafaufau tonu ai ma le atamai. O iina sa “valaauina ma saunia [ai i tatou] … e tusa ma le muai silafia o le Atua” ma sa tatou i ai muamua “i le tulaga e tasi” ma o tatou uso ma tuafafine (Alema 13:3, 5). Sa maua uma [e tagata] avanoa e tuputupu ae ai ma aoaoina.
Ae ui i lea, o le tau fai maua tutusa o aoaoga a se aiga alofa faalelagi, sa lei maua ai se naunautaiga laugatasia ia i tatou—o fanau agaga a le Tama Faalelagi— ia faalogo, aoao, ma usitai. O le faaaogaina o lo tatou faitalia, e pei ona tatou faia i le taimi nei, sa eseese ai le maualuga o lo tatou faalogo ma le fiafia ma le manatu i ai. Sa taumafai ma le naunautai nisi o i tatou e aoao ma usitai. Faatasi ai ma le oo mai o le taua i le lagi, sa tatou sauni ai e o ese mai lo tatou aiga i le muai olaga. Sa aoao mai ma luitauina upumoni; sa tuuina mai ma tauemuina molimau, ma sa faia e agaga taitasi i le muai olaga le filifiliga pe puipuia po o le taumamao mai le fuafuaga a le Tama.
Leai se Faavaeluatai
Mulimuli ane, o le solomuli ma le le mautonu i le tulaga o le faavaeluatai sa lea o se filifiliga lea i lenei feteenaiga. Pe o i ai foi i le taimi nei. O i tatou na faaauupegaina i le faatuatua i le Togiola a Iesu Keriso i le lumanai, o i latou na faamalolosiina e molimau e uiga i Lana matafaioi paia, o i latou ua i ai le malamalama faaleagaga ma le lototele e faaaoga ai i le puipuiga o Lona suafa paia na tau i laina pito i luma o lenei taua o upu. Na aoao mai Ioane e faapea, o na agaga totoa, ma isi, ua manumalo ia Lusifelo “ona o le toto a le tamai mamoe, ma le upu a la latou mau (Faaaliga 12:11; faaopoopo le faamamafa).
Ioe, o le folafolaga o se Faaola ma se Ketesemane ma se Kalevaria na pisia i le toto, na manumalo i le taua i le muai olaga. Ae o lo tatou lototele ma le molimau i le muai olaga, lo tatou naunautai e faamalamalama, finauina, ma faatauanau isi agaga, na fesoasoani foi e faatautai le tai fanae o mea sese mai le salalau atu e aunoa ma se faatuieseina!
O le faamaeaina manuia o le taua i le muai olaga e puipui o Ia, ua avea ai i tatou ma molimau i Lona suafa paia. E moni lava, o le faamaonia o i tatou i le taua ma faapea ona faamautinoa ai i o tatou loto ma le lototele, lea na fetalai mulimuli ane ai le Alii e uiga ia i tatou—o tagata o le aiga o Isaraelu—“O outou o au molimau” (Isaia 43:10). Sei o tatou fesili ifo ia i tatou lava: Pe o moni lava lenei tautinoga e uiga ia i tatou i aso nei?
O La Tatou Taua i le Taimi Nei
O loo sasao i aso nei se feteenaiga i mafaufau, loto, ma agaga o fanau a lo tatou Tama, a o tulimatai atu o le Afio Mai Faalua o Iesu Keriso. E ui o le toatele [o tagata] i le lalolagi o loo fiailoa moni aoaoga o le Ekalesia, ae o se ava o loo faateteleina pea i le va o le amioleaga ma le amiotonu, ua tavavae ai se lalolagi ua saoasaoa le fai ifo o amioga lelei mai upumoni o le talalelei toefuataiina. Pe a tuuaia le Au Paia le atoatoa ae o loo taumafai [ia atoatoa], o e o loo saili mo le malamalama, ona o le mulimuli i le pouliuli, pe a folafola mai o le agalelei o o latou faamoemoega ma galuega e oona, (tagai i le Isaia 5:20), pe o se mea ea la e ofo ai le tusitusilima faatauemu agai atu i le Ekalesia toefuataiina a le Alii ma Ana auauna faamaoni? (tagai i le 1 Nifae 8:27).
Na aoao mai Peresitene Thomas S. Monson: “Ua tatou ola i se taimi ua siosiomia ai i tatou e le tele o mea ua faamoemoe e faatosina atu ai i tatou i ala ia e mafai ona tau atu ai i lo tatou faafanoga. Ina ia aloese mai i ia ala, e manaomia se naunautaiga ma se lototele.”
O le avea ma tagata auai e faatemutemu ma faataetaealuga [i le Ekalesia], ua le lava lea i lenei feteenaiga o aso e gata ai! Sa faaauau le saunoaga a Peresitene Monson: “A o tatou ola ai mai lea aso i lea aso, e toetoe lava a muai iloaina o le a luitauina lo tatou faatuatua. … Pe i ai ea so tatou lototele a’ia’i e tutu mausali ai mo o tatou talitonuga, e tusa lava pe afai o le faia o lea mea e tatau ai ona tatou tutu na o i tatou?”1
E ui i le malomaloa tumau e sau mai i le fale tele ma le ateatea (tagai 1 Nifae 8:26–27), pe o tatou naunau ea e savavali ma tutumau i le ala e seasea ona uia?2 Pe o tatou naunau ma mafai ona auai i talanoaga faaaloalo ma i latou e i ai fesili faamaoni? E aunoa ma le liliu atu i finauga, pe o mafai ea ona tatou naunau e faamanino atu ma puipuia aoaoga o le Ekalesia toefuataiina a Iesu Keriso?
O le fautuaina o i tatou ia tatou tetee atu e aunoa ma le le fiafia, na aoao mai ai Elder Dallin H. Oaks o le Korama a Aposetolo e Toasefululua, “E tusa lava pe tatou te saili atu ia agamalu … , e le tatau lava ona tatou fetuunaia pe faavaivaia lo tatou tuuto i upumoni ua tatou malamalama i ai.”3
Ia Lototoa
Sei o tatou mafaufau toto’a i le valaaulia a Peresitene Monson: “O le taimi lava tatou te maua ai se molimau, o lo tatou tiute la o le faasoa atu o lena molimau i isi. … Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi.”4
E le otometi ona avea se tagata ma se molimau lototoa o Keriso ma Lana Ekalesia toefuataiina i le na o le avea ma se tagata auai o le Ekalesia. Na aoao mai i tatou e le Alii ina ia faasusulu atu lo tatou malamalama e ala i le ola i le talalelei, peitai e i ai ni nai tagata o le ekalesia ua faalilolilo lo latou auai i le ekalesia e ala i le tuu o a latou lamepa i lalo o le mea e fua ai saito. O nisi e i ai taimi e tali ai i fesili o le talalelei ae popoe e molimau atu ma valaaulia. Ae o isi e vaavaai moni mo ni avanoa e faasoa atu ai le talalelei ma faia lena mea ma le naunautai. E toafia i tatou e mataala, totoa ma e e puipuia le faatuatuaga?
Ina ia taofimau ma toe maua le mausali i le taua o upu i aso nei, ua manaomia ai e le Alii ni tagata e naunautai ma mafai ona lotomaualalo ae puipuia ma le mausali Keriso, Ana perofeta ma aposetolo soifua, le Perofeta o Iosefa Samita, le Tusi a Mamona, ma tulaga faatonuina o le Ekalesia. Na te manaomia ni tagata e “saunia pea lava … e tali atu … ia i latou uma o e fesili … i le uiga o le faamoemoe o loo ia te i [latou]” (1 Peteru 3:15 Na te manaomia se ’au moni o le Au Paia o Aso e Gata Ai e naunau, i se agaga o le agamalu ma le alofa, e molimau atu e uiga i le upumoni pe a luitauina soo se vaega o le talalelei toefuataiina!
O Le Faataitaiga a le Taitaiau o Moronae
Afai e te lagona le le agavaa e avea o se puipui lototoa o le upumoni i o tatou aso, ua le na o oe. O le toatele o i tatou e i ai lagona ai faapena i nisi o tulaga. Ae o loo i ai se mea faigofie e mafai ona tatou faia e maua ai le gafatia ma le lagona mautinoa.
I le Tusi a Mamona, ua tatou aoao ai o le Taitaiau o Moronae sa “sauniunia mafaufau o tagata ia faamaoni i le Alii lo latou Atua” (Alema 48:7). Sa ia iloaina o le laina muamua o le puipuiga o se olaga e fausia i luga o se faavae o le usiusitai o le tagata lava ia. E le gata i lea, sa ia “faatutu ni olo laiti, … ma ati i luga faupuega eleele … , ma ati foi pa maa e sio faataamilo ai i latou” (fuaiupu 8). E le gata ina sa ia faia ni puipuiga iloga e tetee atu ai, ae sa ia faamalosia foi ma le atamai “o latou olotui sa sili ona vaivai” (fuaiupu 9). Sa matuai faamanuiaina tele ana puipuiga atamai lea sa faapea ona “matua ofo” ai ona fili, (Alema 49:5) ma faapea ona le mafai ai ona faataunuu a latou fuafuaga leaga.
Atonu e te fesili, “Mata e mafai e se tagata vaivai e pei o au ona avea ma se puipuiga lototoa o Keriso ma Lana talalelei toefuataiina?” O le lagonaina o lou vaivai e mafai ona faamalosia pe a e talia, na pau lava le mea e manaomia muamua e le Alii o “[lou] loto ma le mafaufau malie” (MF&F 64:34). O le faaeeina i se agaga o le lototele, o [tagata] “laiti ma faatauvaa” o le lalolagi, o Ana auauna ia e sili ona fiafia i ai. Ia manatua o “auala laiti lava,” e fiafia o Ia e “faamaasiasia ai e popoto” (tagai i le Alema 37:6, 7). Afai e te naunau e faasoa atu ma puipuia le talalelei toefuataiina ma ona taitai ma aoaoga faavae, atonu e te mafaufau i fautuaga nei.
1. Ia iloa o ai ma o le a le mea e puipui. O se fuafuaga mausali o le puipuiga o le faavae lea mo se osofaiga mautu. E ui e le mafai ona e puipuia lelei se mea e leai pe itiiti foi sou iloa e uiga i ai, e le mafai ona e puipuia pe afai e te matuai e le popole lava i ai. E pei lava o se auauna, e totogi e vaaia mamoe, o le a solomuli pe sola ese i le taimi muamua lava e aliali ae ai le faailoga o se faalavelave, o lea la, o le a le umi se taimi e te taofiofia ai lau itu o le puipuiga, vagana ua i ai sou talitonuga maumaututu faaleagaga e faapea, e amiotonu ma moni lou faamoemoega. Ina ia molimau atu ma puipuia Keriso ma Lana Ekalesia, e tatau ona e iloa o loo soifua o Ia ma o Lana Ekalesia toefuataiina lenei!
O i latou o e ua iloa ma ola i le talalelei, ua faatumulia i le malamalama ma se tautinoga malosi na amata mai i le agavaa ma aafiaga faaletagata lava ia. Ua sili atu ona latou saunia e molimau atu i le upumoni, nai lo o i latou o e ua na ona gauai atu ia iloa le auala e tuuina atu ai tali.
2. Iloilo au olo. Mulimuli i le faataitaiga a Taitaiau Moronae. Ia iloilo ma le faamaoni malosiaga ma vaivaiga o ou malamalamaaga i le talalelei. Pe o e faia se faataitaiga lelei e ala i le ola i se olaga faa-Keriso? E mafai ona e maua tali i fesili e ala i le suesueina o tusitusiga paia? E te fiafia e tuu atu lau molimau? E mafai ona e tali i fesili e faatatau i aoaoga faavae ma aoaoga a le Ekalesia, e oo lava i nisi o fesili e faigata atu ona faamalamalama, e ala i le faaaogaina o tusitusiga paia? Pe ua e saunia e faapea atu, “Ou te le iloa, ae o le a ou sueina,” po o le faasino atu o tagata i nofoaga e mafai ona latou maua ai tali? Mata o le suesue ma le filiga o le a fesoasoani e te maua ai le mautinoa ma le lototele o loo e sailia?5
3. Faamalolosi au olo. Faatasi ai ma se iloiloga o au “olo” faaleaoaoga faavae ua i ou luma, amata se suesuega faifaipea ma umi, faatasi ai ma se manulauti ia avea mea vaivai ma mea malolosi ia te oe (tagai i le Eteru 12:27). Tali atu i le augani a Mose, “Ou te manao lava ia fai ma perofeta le nuu uma o Ieova, ma ia foaiina atu e Ieova lona Agaga ia te i latou!” (Numera 11: 29). Ia faalelava le Alii i le talosaga atu e faapea, mo taumafaiga laiti uma i aso taitasi, o le a Ia faupueina le eleele i luga o au pa puipui.
Ia faitau pea lava pea ma le agaga tatalo i tusitusiga paia. Aua le tau o le mimiti o tala masani i se aputi mitivai. Ia taumafa i ai. Mafaufau e tusitusi ma teu ia faamatalaga suesue o aoaoga faavae ma faaauau pea ona faaopoopo atu i ai. Mo autu taitasi, mafaufau e faailoa ona tauloto lea o ni nai mau i le faasologa talafeagai e lagolago ai ou manatu ma aoaoga. Na aoao mai Elder Richard G. Scott (1928–2015) o le Korama a Aposetolo e Toasefululua, “Pe a faaaogaina mau e pei ona finagalo ai le Alii ina ia faamaumauina, o loo i ai se mana taua lea e le mafai ona faailoa atu pe a toe faaupuina.”6
Mafaufau e tauloto ni nai upusii mai perofeta ma aposetolo. E masani lava ona mafai e le Agaga Paia ona “faamanatu …ia te outou” na o mea e te tuuina muamua iina (tagai i le Ioane 14:26). O le malamalama faaleaoaoga faavae e taulai moni atu ia Keriso, faatasi ai ma “le pelu o [lona] Agaga” (MF&F 27:18) o le puipuiga silisili lea ma le auupega osofai lea o loo ia te oe.
4. Faataitai! Ua uunaia faifeautalai faamisiona a le Ekalesia e faataitai-ona-faatino ina ia saunia ai mo tulaga latou te ono oo i ai. Ona e ono talosagaina oe e puipui le Ekalesia pe faamatala ona aoaoga faavae i taimi po o nofoaga e lei mafaufauina, mafaufau e mulimuli i faataitaiga a faifeautalai e ala i le saunia o oe lava faaleagaga ao lei e faia se talanoaga masani lava (tagai Mose 3:5, 7). Ia faataitai-le-faatinoga ae e te lei oo i tulaga lea e te aoaoina pe puipuia ai tulaga faatonuina o le talalelei. Pe na o oe pe faatasi ma aiga po o uo, ia fai ni fesili e faatatau i ai ona tali lea! A oo ina faateleina lou saunia, o le a e “faasolo malolosi ma atili malolosi” i lou talitonuga i le avea ai ma se molimau a Keriso (tagai i le Helamana 3:35). Amata i tali puupuu ma faigofie. O le a talafeagai i le tele lava o tulaga. Ae e mafai foi ona e faamalosia atili atu au puipuiga e ala i le suesueina o mau e faatatau i ai, ma faafesootai ai ni aoaoga faavae eseese.
5. Saili ni avanoa. O lou saunia ai nei o oe lava, ia tatalo mo ni avanoa e faasoa atu ai ma le lotomaualalo ae ia to’a ma, pe a manaomia, ia puipui le talalelei. Ia manatua o le, “lotovaivaie le o le leai o se tomai ae o le leai o se lototele.”7 Tatalo ina ia lava lou alofa i fanau a le Tama Faalelagi i totonu ma fafo o le Ekalesia, e faasoa atu ma puipui ai tulaga faatonuina o le talalelei. Tatalo ina ia e le lilifa atu i le le amanaiaina po o le talia tauaso o aoaoga faavae e nunumi ia te oe, ae ia e galue ma le faatuatua ia Keriso e faatoilalo ai lena nunumi.
Ia manatua e oo lava foi i se tamaitiiti, e mafai ona avea o se puipui o Keriso i le malaetaalo, e ala i le tuuina atu o se molimau faatauvaa; e le faapea e tatau lava ona e atamai i le talalelei ia avea ai ma se molimau o le upumoni; e le faapea e tatau lava ona e iloa tali uma; e le afaina le faapea atu i nisi o taimi, “ou te le iloa” po o le “o nei mea lilo e lei faailoa atoatoa mai ia ia te au i le taimi nei; o lea o le a ou taofia ai”(Alema 37:11). O le le “ma i le talalelei a Keriso” (Roma 1:16) e sili atu nai lo na o le le amanaiaina po o le onosaia o pepelo ma le mimiloina o upumoni; o lona uiga o le iloaina ma le puipuia o aoaoga faavae! O le mea lea, afai tatou te le tautatala, ia le ona o le matau, ae ona o loo tatou mulimuli i se uunaiga (mo se faataitaiga, tagai i le, Alema 30:29).
Tu Atu o se Molimau Mataala
A o faaauau ona e puipuia le talalelei a Iesu Keriso, o le “faatuatua, faamoemoe, alofa mama ma le alofa, ma le manatu tasi i le mamalu o le Atua, e agavaa ai [outou] mo le galuega” (MF&F 4:5). Ia tatou manatua o Keriso na agamalu ae lei vaivai lava—sa Ia valaaulia ae sa aoaia foi, ma sa Ia fetalai mai foi “O le e i ai le agaga o le finauga ua le mai ia te au o ia” (3 Nifae 11:29).
A o faaauau pea e se lalolagi amioleaga le solia o tulaga faatonuina o le amiolelei ma aoaoga faavae a le Atua, ua faalagolago mai Keriso e oo lava i se aupito itiiti o le Au Paia, ia avea ma ni molimau ola o Lona suafa.
Ua faamanatu mai ia i tatou e Peresitene Gordon B. Hinckley (1910–2008) “e le lava le na o le lelei. E tatau ona tatou lelei mo se mea. E tatau ona tatou saofaga atu le lelei i le lalolagi. E tatau ona avea le lalolagi o se nofoaga lelei atu mo lou i ai. … I lenei lalolagi ua matuai tumu i faafitauli, ua le aunoa ona faamatauina i luitau pogisa ma le leaga, e mafai ma e tatau ona e tulai i luga ae o le vaivai, i luga ae o le le manatu popole. E mafai ona e aafia ai ma tautala atu ma se leo malosi mo le mea sao.”8
Afai e te manao e avea oe ma molimau o le talalelei toefuataiina, ia auai faatasi i le autau o molimau o aso e gata ai, e ala i le faasusuluina tele atu o lou malamalama! Tau ina ia avea lou ola i le talalelei ma lau puipuiga o lena lava talalelei, o se ataata o le loloto o lou liua ia Iesu Keriso.