Seia Tatou Toe Feiloai
O Le Tusi a Mamona: O Se Vavega Moni Lava
Mai le “Sa o se Vavega Lava!” Ensign, Nov. 1977, 11–13.
Mai le faavaa i le faavaa, o le Tusi a Mamona o se faaaliga, o se faaliliuga musuia, o le galuega a le Atua ae le o se tagata lava.
Lanu i tua atu mai le Getty Images
Ou te … molimau atu i le paia o le valaauga a le Perofeta o Iosefa Samita ma … tautino atu lo’u faatuatua i le vaega lea na faaliliuina ma lomiaina ai le Tusi a Mamona. …
I le aso 22 o Setema 1823, i talane o Palamaira, Niu Ioka, sa faaali mai ai e se agelu a le Atua le nofoaga [o papatusi] i se taulealea [e sefulufitu tausaga] lona matua e igoa ia Iosefa Samita. …
… Sei o tatou mafaufau mo sina taimi le faaliliuga sao o lenei faamaumauga. Fai mai Iosefa Samita sa ia faia e ala i le meaalofa ma le mana o le Atua. … O le le aoaoina e pei ona sa i ai o ia i lena vaitaimi o lona olaga, e leai se isi lava auala na mafai ona ia faia ai. …
… E mafai [la] faapefea ona fai mai le au faitio o Iosefa Samita, a o talavou, sa atamai tele, o lea e mafai po o le a mafai ona ia aumaia ma le iloa lelei o fuaitau mai le Tusi Paia ma faia ma le poto ia foliga ai sa o ni vaega o tusiga o le Tusi a Mamona?
Na fai mai lona tina, o le taimi popofou lena o lona olaga, sa lei uma ona ia faitauina le Tusi Paia. E mafai la faapefea ona ia filifilia ma le faaeteete ni fuaitau filifilia ma tuu ma le talafeagai ma le poto i totonu o le Tusi a Mamona?
O le lei faitauina atoa o le Tusi Paia i le talutalufou o lona talavou, [ma] sa lei lava sona malamalama e faia ai se galuega o faasa’oga faapena, e tusa lava pe sa tomai i le tusitusi po o le [faia o] faasa’oga, sa leai se tasi o ia tomai sa ia te ia i lena taimi talutalufou o lona olaga.
[Ae] o le Tusi a Mamona o se tusi faitau ma se galuega maoae faalelotu, ma e matuai mamao lava ma faamoemoega loloto po o gafatia a soo se taulealea faifaatoaga. …
Mo se faataitaiga, faitau nisi o lauga matagofie a le Faaola o loo i lena tusi. Ia matau, o loo sii mai e le Alii perofeta o le Tusi Paia. Pe tatau la ona tatou faapea, na i ai ia Iosefa Samita e lei aoaoina le lototoa po o le tomai e toetusi ai lauga a le Faaola ma tuu i ai fuaitau o le [Tusi Paia], ma le manatu e faaleleia atili ai fetalaiga a Iesu?
… Sa lei satia e [Iosefa Samita] … le galuega a Mamona, o lauga a Iesu, le puipuiga ofoofogia a Apinati, po o tusitusiga a Malaki po o Isaia. O lana [matafaioi] patino o le faaliliu upu, sa le o se faatonu po o se fatutala; pe sa o ia foi o se gaoi e kopiina galuega a se isi tagata. …
Mai le faavaa i le faavaa, o le Tusi a Mamona o se faaaliga, o se faaliliuga musuia, o le galuega a le Atua ae le o se tagata lava. Mai le faavaa i le faavaa e moni lava.