Aoao Atu i le Ala a le Faaola
Alofa ma le Keke Sukalati: O Le A Se Mea E te Tuuina Atu e Toe Aumai ai i Latou?
Saunia e Devin G. Durrant
Fesoasoani Muamua i le Au Peresitene Aoao o le Aoga Sa
Sa lotovaivai Sister Babata Sonnenberg. I le avea ai ma se tina talavou o se fanau teine e toalima e i lalo ifo o le valu tausaga le matutua, sa faateia o ia i le valaauina e faiaoga i le vasega 16 i le 17 tausaga le matutua o le Aoga Sa i lana uarota. I le mavae ai o ni masina i lona valaauga, sa ia iloa ai na le fetaui lava le auai ma sa masani ona tau leai ni tamaiti o le vasega. I se tasi o Aso Sa, sa na o le toatasi se alii na sau i le vasega. Nai lo o le aoaoina o le toatasi lea, sa tuufaatasi loa lana vasega ma se isi vasega. Sa sauni o ia e togi le solo. Peitai, a o mafaufau loloto ma tatalo e uiga i lona tulaga faanoanoa, sa oo mai se musumusuga, ma sa oo ai se suiga i lona loto.
Taumafaiga Fai Faatasi
O lona toalua o Teni, sa avea ma taitai misiona a le uarota. Sa musuia i laua e toalua e tuufaatasi a laua taumafaiga e aapa atu ai i le autalavou o le uarota. O le a ia faia se keke sukalati, ma o le a ia valaaulia tagata talavou o le uarota e o mai i lo latou fale i afiafi o Aso Sa taitasi e ai le keke ma talanoa i tapenaga mo le misiona. A o aai le tupulaga i lona keke, e valaaulia e Sister Sonnenberg i latou i lana vasega o le Aoga Sa.
O se taunuuga o lenei valaaulia “suamalie,” na agai i luga le auai i le vasega o le Aoga Sa. Peitai ane, sa le maluelue mai lava se tasi o alii talavou, o Naite, i valaaulia faifai pea. Sa manatu Sister Sonnenberg o le a leiloa atu se tasi o ana mamoe. O lana tali atu i lena lagona o le “alu ma saili i le na leiloa, seia [ona] maua” (Luka 15:4).” O lea la, nai lo le fiu ia Naite, sa faia ai se Sister Sonnenberg se fuafuaga.
Asiasiga i Aiga
I se afiafi o se tasi o Aso Sa, sa alu atu ai o ia i le fale o Naite. Sa ia maua atu o ia i le fale faatasi ai ma se isi tagata o lana vasega, o le sa lei auai atu i lena aso. Sa ia fai atu ia i laua uma, sa ia misia i laua i le vasega ma faaauau ai ona aoao i laua i le lesona i le taimi lava lea iina. Sa ootia le tamā o Naite, o le sa lei leva atu ona faamalolo o se epikopo o le uarota, i le finafinau o lenei faiaoga. Sa ia auina atu se feau tusitusia i lana tane na faitauina faapea: “Teni, faamolemole faafetai atu i lou faletua mo au. Sa musuia [lona] sau iinei ma aoao ai Naite ma Makei.”
E ui i lea, o le Aso Sa na sosoo ai, sa toe filifili foi Naite e le sau i le Aoga Sa. O lea na toe alu atu ai Sister Sonnenberg i lona aiga e faia ai se talanoaga o le talalelei faatasi ma ia. Sa iloa e Naite e ono tupu lena mea, o lea na alu ai i le fale o sana uo e lafi ai. Sa maua o ia e Sister Sonnenberg i se fale e le mamao mai i lona fale ma faasoa atu i ai le lesona iina.
Mulimuli ane, sa tonu ai ia Naite e toe foi atu i lana vasega i le Aoga Sa.
O Le A le Mea Na Aoga?
Aisea na toe foi mai ai Naite?
Pe ona o le keke sukalati na tufa atu e Sister Sonnenberg i lona fale?
Pe ona o asiasiga sa alu atu ai i le fale o Naite (ma le fale o le tuaoi) e sue o ia?
Pe ona o faamalosiauga mai uo ma aiga e alu i le lotu?
Pe ona o le alofa sa ia lagonaina mai ia Sister Sonnenberg, lona faiaoga o le Aoga Sa?
O le tali, atonu o mea uma lava na o loo ta’ua i luga. Mo nei mafuaaga uma ma isi, sa amata ai ona auai soo atu Naite, faatasi ma ana uo i le Aoga Sa.
O Le Vaega na Totoe o le Tala
Sei ou faaopoopo atu la le vaega o totoe o le tala. Ona o lagona ma i ai ia Naite e uiga i lona faiaoga o le Aoga Sa, na te lei faamisia ai se avanoa e faatau ai ni sukalati mo ia, ina ua ia vaai ia te ia i le faletele o faleoloa. O Sister Sonnenberg, o le sa faaalia atu ia te ia le alofa faateleina, sa avea ma tagata na mauaina lona alofa.
Ma mulimuli ane, ia Setema 2015, na faauma ai e Naite lana talosaga mo se misiona ma o loo auauna atu nei i le Misiona a Misisipi Jackson.
O isi foi tagata o le vasega o e sa faafaigata ona auai i le Aoga Sa, sa filifili foi e auauna atu i ni misiona. E toalima alii talavou ma tamaitai talavou e toatolu o e na auai i le vasega o le Aoga Sa a Sister Sonnenberg mo le 16 i le 17-tausaga i le taimi na avea ai o ia ma faiaoga, ua auauna atu, pe o loo auauna atu i ni misiona, faapea ma nisi atonu o le a auauna atu.
Aapa Atu ia i Latou E Le O Auai Mai
O le vaega 1 “Alofa ia i Latou E te Aoaoina,” o le Aoao Atu i le Ala a le Faaola, o loo aofia ai se autu o se talanoaga ua faaautuina “Aapa Atu ia i Latou E Le O Auai Mai.” E faitauina faapenei le autu: “O le aapa atu i tagata o le ekalesia e le toaaga, e le na o se tiute a le faiaoga o aiga, se faiaoga asiasi, po o se taitai perisitua po o le ausilali—e mafai foi ona fesoasoani faiaoga i lenei galuega. O le aoao atu e sili atu nai loo le na o le faia o se lesona i le Aso Sa. E aofia ai le auauna atu ma le alofa ma fesoasoani i isi e maua faamanuiaga o le talalelei, ma o lenei fesoasoani e tele ina manaomia moni e se tagata e le toaga o le vasega. Tatou te manaomia uma le galulue faatasi e aapa atu ia i latou o loo tauivi, ma i le avea ai o se faiaoga e mafai ona e i ai i se tulaga tulaga faapitoa e fesoasoani atu ai.”1
Na iloa e Sister Sonnenberg le tulaga faapitoa sa i ai o ia e fesoasoani ai i tagata o lana vasega. Sa faamanuiaina o ia i se avanoa faalevaiaso e pai atu ai i o latou loto, ma sa naunau o ia e faia lena mea—pe o totonu o lona potuaoga, po o totonu o o latou aiga. E manino lava, atonu e le maua e faiaoga uma se tulaga e asiasi ai i aiga o i latou o e e le auai i le vasega i vaiaso taitasi, ia pe mafai foi i taimi uma, ae e mafai e i tatou uma ona faia se mea, e tusa lava pe itiiti, e faaali atu ai le alofa ia i latou o loo tatou vaaia. Manatua upu a le Perofeta o Alema: “O mea laiti ma faatauvaa e faataunuu ai mea tetele” (Alema 37:6).
Valaaulia ma le Alofa
O le vaega “Valaaulia ma le Alofa” o le autu o le talanoaga lenei o loo aofia ai le manatu lenei: “O vaaiga faamaoni o le alofa faa-Keriso ua i ai le mana maoae e faamalulu ai loto o tagata o le vasega o loo tauivi ma le talalelei. O le tele o taimi, e tau lava o le iloa e nei tagata taitoatasi e manaomia ma alofaina i latou.”2
O se taunuuga o taumafaiga a Sister Sonnenberg e aapa atu ia Naite, sa ia lagonaina le manaomia ma le alofaina. I le avea ai ma faifeautalai faamisiona, ua maua nei e Naite ma ana uo i le vasega le avanoa e fesoasoani ai i isi ia lagonaina lena lava alofa faa-Keriso. O se matuai faamanuiaga le mafai ona latou manatua ma mulimuli i le faataitaiga a lo latou faiaoga o le Aoga Sa.
Seia Oo Ina E Maua Le O Loo Leiloa
I le avea ai ma se Au Peresitene Aoao o le Aoga Sa, matou te faafetai atu i faiaoga o le Aoga Sa i le lalolagi atoa o e, i le tele o auala eseese, ua valaaulia ai tagata o le vasega e o mai ia Keriso. Matou te tatalo o le a faapea ona faamanuia outou e le Alii i a outou taumafaiga e alolofa ia i latou tou te aoaoina ma, ona o lena alofa, e “saili ai i le ua leiloa, seia oo ina [outou] maua”—e pei ona sa Ia faia i le taimi o Lana galuega i le olaga nei.