ចម្លើយមកពីថ្នាក់ដឹកនាំសាសនាចក្រ
របៀប ស្វែងរកភាពសុខសាន្តពិតប្រាកដ
ដកស្រង់ចេញពីសុន្ទរកថានៅក្នុងសន្និសីទទូទៅខែ មេសា ឆ្នាំ ២០១៣ ។
សេចក្តីប្រាថ្នាដ៏សុចរិតនៃមនុស្សល្អគ្រប់ទីកន្លែងនឹងបាន ហើយនឹងក្លាយទៅជាក្ដីសុខសាន្តក្នុងពិភពលោកនេះ ។ យើងមិនត្រូវបោះបង់ចោលចំពោះការសម្រេចគោលដៅនេះឡើយ ។ ប៉ុន្តែប្រធាន យ៉ូសែប អេហ្វ ស៊្មីធ ( ១៨៣៨–១៩១៨ ) បានបង្រៀនថា « វិញ្ញាណនៃក្ដីសុខសាន្ត និងក្ដីស្រឡាញ់នឹងមិនកើតមានក្នុងពិភពលោកនេះបានឡើយ…ដរាបណាមនុស្សលោកទទួលសេចក្ដីពិត និងសារលិខិតរបស់ព្រះ…ហើយទទួលស្គាល់ព្រះចេស្ដា និងសិទ្ធិអំណាចរបស់ទ្រង់ដែលមកពីព្រះ » ។
យើងសង្ឃឹម ហើយអធិស្ឋានដោយស្មោះសម្រាប់ក្ដីសុខសាន្តជាសកល តែវាជាតួនាទីយើងក្នុងនាមជាបុគ្គល និងគ្រួសារដើម្បីយើងសម្រេចបាននូវក្ដីសុខសាន្តនេះដែលវាជា រង្វាន់នៃក្ដីសុចរិតដែលបានសន្យា ។ ក្ដីសុខសាន្តនេះជាអំណោយមួយដែលបានសន្យាអំពីបេសកកម្ម និងការពលិកម្មធួនរបស់ព្រះអង្គសង្គ្រោះ ។
ក្ដីសុខសាន្តពុំមែនគ្រាន់តែជាការមានសុវត្ថិភាព ហើយគ្មានសង្គ្រាម ការរំលោភបំពាន វិបត្តិ និងជម្លោះនោះទេ ។ ក្ដីសុខសាន្តកើតចេញពី ការដឹងថាព្រះអង្គសង្គ្រោះជ្រាបថាយើងជានរណា ហើយដឹងថាយើង មានសេចក្តីជំនឿលើទ្រង់ ស្រឡាញ់ទ្រង់ និង គោរពបញ្ញត្តិទ្រង់ ហើយពិសេសទោះនៅក្នុងគ្រានៃការសាកល្បង និងសោកនាដកម្មដ៏រន្ធត់នៃជីវិតក្តី ( សូមមើល គ. និង ស. ១២១:៧–៨ ) ។
« ខ្ញុំរកក្តីសុខឯណា ? ឯណាក្តីរីករាយ ពេលអ្វីៗទៀតមិនអាចឲ្យខ្ញុំបានជា ? » ( « ខ្ញុំរកក្តីសុខឯណា ? » ទំនុកតម្កើង លេខ ៦៩ ) ។ ចម្លើយគឺព្រះអង្គសង្គ្រោះ ទ្រង់ជាប្រភព ហើយជាព្រះនៃក្ដីសុខសាន្ត ។ ទ្រង់ជា « ម្ចាស់នៃមេត្រីភាព » ( អេសាយ ៩:៦ ) ។
ការបន្ទាបខ្លួនយើង ចំពោះព្រះ ការអធិស្ឋាន ជានិច្ច ការប្រែចិត្ត ពីអំពើបាប ការចូលទៅក្នុងទឹកនៃ បុណ្យជ្រមុជទឹក ដោយមាន ចិត្តសង្រេង និង វិញ្ញាណទន់ទាប និង ការក្លាយជាសិស្សដ៏ពិត នៃព្រះយេស៊ូវគ្រីស្ទ ជាគំរូដ៏ប្រពៃនៃក្ដីសុចរិតដែលត្រូវបានផ្ដល់រង្វាន់ឲ្យដោយក្ដីសុខសាន្តជានិរន្តរ៍ ។
សាសនាចក្រជាទីជ្រកកោនមួយដែលពួកអ្នកដើរតាមព្រះគ្រីស្ទទទួលបានក្ដីសុខសាន្ត ។ មានមនុស្សវ័យក្មេងមួយចំនួនក្នុងពិភពលោកនេះនិយាយថា ពួកគេជាមនុស្សបរិសុទ្ធ តែមិនជឿសាសនាឡើយ ។ ការមានអារម្មណ៍បរិសុទ្ធជាជំហានចាប់ផ្ដើមមួយដ៏ល្អ ។ តែមានតែនៅក្នុងសាសនាចក្រប៉ុណ្ណោះដែលយើងត្រូវបាន រាប់អាន បង្រៀន និង ចិញ្ចឹមបីបាច់ដោយបន្ទូលល្អ នៃព្រះ ។ សំខាន់ជាងនេះទៀត នៅក្នុងសាសនាចក្រមាននូវសិទ្ធិអំណាចបព្វជិតភាពដែលផ្ដល់សម្រាប់ ពិធីការ និងសេចក្ដីសញ្ញាពិសិដ្ឋ ដើម្បីរួបរួមគ្រួសារ ហើយធ្វើឲ្យយើងម្នាក់ៗមានគុណសម្បត្តិគ្រប់គ្រាន់ដើម្បីត្រឡប់ទៅព្រះជាព្រះវរបិតា និងព្រះយេស៊ូវគ្រីស្ទវិញក្នុងនគរសេឡេស្ទាល ។ ពិធីបរិសុទ្ធទាំងនេះ នាំមកនូវសេចក្ដីសុខសាន្ដ ដោយសារវាជាសេចក្ដីសញ្ញាជាមួយនឹងព្រះអម្ចាស់ ។
ព្រះវិហារបរិសុទ្ធជាទីដែលពិធីបរិសុទ្ធពិសិដ្ឋទាំងនេះធ្វើឡើង ហើយក៏ជាប្រភពមួយនៃទីជម្រកដ៏សុខសាន្តពីពិភពលោកនេះផងដែរ ។ អស់អ្នកដែល ទៅលេងបរិវេណព្រះវិហារបរិសុទ្ធ ឬចូលរួមក្នុងការសម្ពោធព្រះវិហារបរិសុទ្ធក៏មានអារម្មណ៍នៃក្ដីសុខសាន្តនេះដែរ ។
ព្រះអង្គសង្គ្រោះជាប្រភពនៃក្ដីសុខសាន្តពិត ។ ដោយសារដង្វាយធួនរបស់ព្រះអង្គសង្គ្រោះ និងព្រះគុណទ្រង់ ទោះជាស្ថិតក្នុងការសាកល្បងនៃជីវិតក្ដី ក៏ការរស់នៅសុចរិតនឹងទទួលបានរង្វាន់នៃក្ដីសុខសាន្តផ្ទាល់ខ្លួន ( សូមមើល យ៉ូហាន ១៤:២៦–២៧, ១៦:៣៣ ) ។