Pōpoaki ʻa e Faiako ʻAʻahí
Fakapapau mo e Fuakava ʻo e Lakanga Fakataulaʻeikí
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke ke vahevahé. ʻE teuteuʻi fēfē ʻe he mahino e taumuʻa ʻo e Fineʻofá ʻa e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
Ko e lahi ange ʻene mahino kiate kitautolu kakai fefiné ʻa e kaunga fakafoʻituitui kiate kitautolu e fakapapau mo e fuakava ʻo e lakanga fakataulaʻeikí, ko e lahi ange ia ʻetau pukepuke ʻa fufula e ngaahi tāpuaki mo e ngaahi talaʻofa ʻo e lakanga fakataulaʻeikí.
Naʻe pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻE lava ke maʻu ʻe kinautolu kotoa kuo nau fai e fuakava toputapu mo e ʻEikí pea fakaʻapaʻapaʻi e ngaahi fuakava ko iá ha fakahā fakatāutaha, ke faitāpuekina ʻi he tauhi mai ʻa e kau ʻāngeló, ke fefolofolai mo e ʻOtuá, ke maʻu ʻa e kakato ʻo e ongoongoleleí, pea ko hono tumutumú, ke hoko ko ha kau ʻea-hoko fakataha mo Sīsū Kalaisi, ki he meʻa kotoa ʻoku ʻa ʻetau Tamaí.”1
ʻOku fakatou kaunga ʻa e ngaahi tāpuaki mo e ngaahi talaʻofa ʻo e fakapapau mo e fuakava ʻo e lakanga fakataulaʻeikí kia tangata mo fafine. Na‘e pehē ʻe Sisitā Seli L. Tiu, ko ha tokoni kimuʻa ʻi he Kau Palesitenisī Lahi ʻo e Fineʻofá, “‘Ko hono kakato ʻo e lakanga fakataula‘eiki ʻi he ngaahi ouau ma‘olunga taha ʻo e fale ‘o e ʻEikí ‘e toki lava ke maʻu fakataha pē ‘e ha tangata mo ha fefine.”2
Kuo fakahoko mai ʻe Sisitā Linitā K. Pētoni, ko e Palesiteni Lahi ʻo e Fineʻofá ʻa e fakaafe ko ʻení, “‘Oku ou fakaafeʻi koe ke ke ako ma‘uloto ʻa e fakapapau mo e fuakava ‘o e lakanga fakataulaʻeikií, ‘a ia ʻe lava ke ma‘u ʻi he Tokāteline mo e Ngaahi Fuakava 84:33–44. ʻI hono fai iá, ʻoku ou palōmesi atu ʻe fakalahi ʻe he Laumālie Māʻoniʻoní hoʻo mahino ki he lakanga fakataulaʻeikí pea ueʻi fakalaumālie mo langaki hake koe ʻi ha ngaahi founga lelei.3
Naʻe fakataumuʻa e ngaahi fakahinohino ʻa Siosefa Sāmita ki he Fine‘ofá ke teuteuʻi ʻa e kakai fefiné ke nau “ha‘u ʻi he ma‘u ʻo e ngaahi faingamālie & ngaahi tapuaki & mo e ngaahi me‘afoaki ʻo e lakanga fakataula‘eiki.” ʻE fakahoko ʻeni ʻo fou he ngaahi ouau ʻo e temipalé.
“Ko e ngaahi ouau fakatemipalé [ko ha] ngaahi ouau lakanga fakataulaʻeiki, ka [‘oku] ʻikai ke nau foaki ‘a e ngaahi lakanga faka-Siasi ʻi he tangata pe fefine. [ʻʻOku fakakakato ʻe he ngaahi ouau ko ‘ení] ʻa e talaʻofa ‘a e ʻEikí ki hono kakaí—tangata mo e fefine—ʻe ‘fakakoloaʻi ‘aki ʻa e mālohi mei ‘olungaʻ [T&F 38:32]. “4
Ngaahi Potu Folofola mo e Fakamatala Makehe
Tokāteline mo e Ngaahi Fuakava 84:19–40; 121:45–46; reliefsociety.lds.org
Tuí Fāmilí Fakafiemālié