Leʻo ʻo e Kau Māʻoniʻoni ʻi he Ngaahi ʻAho Kimui Ní
Kātaki ʻo ʻOua Te ke Tā e Foʻi Hiva ko Iá
Tā fakatātā ʻa Bradley H. Clark
Naʻá ku nofo mo hoku fāmilí ʻi ha taimi kimuʻa ʻi Velakulusi ʻi Mekisikou, ʻo ako ai ʻeku fānaú he lautohi puleʻangá. ʻI he pongipongi kotoa pē lolotonga ʻeku tokoni ke teuteu ʻeku fānaú ki he akó, ʻoku mau fanongo ki he letioó—ki he kautaha letiō manakoa taha ʻi he koló—ki haʻanau polokalama lelei naʻe fakahoko ʻe ha talavou fakamatala letiō.
Na‘a mau kamata fanongo ki ha foʻi hiva mālie ‘aupito. Ko e taimi naʻá ku kamata ke fakafanongo lelei ange ki he fakaleá, naʻá ku fakatokangaʻi ko e meʻa naʻá ne leaʻakí, neongo naʻe ʻikai kapekape, ka naʻe fokotuʻu fakakaukau mo taʻetaau.
Na‘á ku fakahā mahino ange ki heʻeku kiʻi fānaú, “ʻOku ʻikai totonu ke tau fanongo ki he faʻahinga lea ko ʻení.” Mahalo naʻe ʻikai ke nau tokanga ki he fakalea ʻo e hivá, ka naʻe feʻunga ʻena tokangá ke nau ngūnguuʻi hono fasí.
Naʻa nau sio ki heʻeku tāmateʻi e ongo ʻo e meʻa fakaleʻolahí mo ʻeke mai pe ko e hā ʻeku meʻa ʻoku faí. “Te u fakahā ki he tangata fakamafola lea he letioó ke toʻo e foʻi hiva ko iá mei he polokalamá.” Naʻe fakalotolahiʻi au ʻe heʻenau ʻohovalé ke u fai mo ha toe meʻa lahi ange.
Naʻe ʻikai ke nau teitei tui pea pehē pē mo au, ka naʻá ku toʻo hake e telefoní ʻo tā ki he kautaha letioó. Naʻe ʻikai ke u ʻamanaki ʻe tali, ka naʻá ku ʻohovale, he ne tali mai ʻe he taha fakamafola tatau ne mau toki fanongo ki ai he polokalamá, ʻa ʻeku telefoní ʻi he meimei taimi pē ko iá.
Naʻá ku fakahoko ange naʻe ʻikai ke u fiemālie heʻeku fanongo ki he foʻi hiva ko iá, he ʻoku tokolahi ha ngaahi fāmili ʻoku nau fanongo ki he leitoó he taimi ko iá, ʻi he pongipongí. Na‘á ne ʻeke mai pe ko e hā haʻaku fokotuʻu ke fetongi ʻakí, ka ko hono ʻulungāngá naʻe fuʻu lelei peá u kole ange pē ke ʻoua muʻa te ne toe tā e foʻi hiva ko iá he lolotonga e taimi ʻoku ʻi ʻapi ai ʻa e fānaú.
Naʻe ʻikai ke u toe ʻiloʻi pe naʻe fakamafola ʻi he ʻeá ʻeku telefoní, ka naʻá ku fakamālō pē ʻi he fanongo ʻa e tokotaha fakamafolá. Pea ʻi he ngaahi ʻaho siʻi ne hokó, naʻá ku lava ʻo tala ne tali ʻeku kolé.
Na‘e fakapapauʻi mai ‘e he aʻusia ko iá ʻoku totonu ke tau loto-toʻa ‘i he taimi ʻoku tau pule ai ke fai ha fili mo fakahoko ʻa e meʻa ʻoku ʻaongá ke maluʻi ʻetau fānaú mei he ngaahi ivi tākiekina koví. ʻI heʻetau fai iá, ʻe lava ke hokohoko atu e hoko ʻa e Laumālie Māʻoniʻoní ko hotau takaua maʻu peé.