Ko e Fakakaukau kia Sīsuú
ʻOku nofo e tokotaha naʻá ne fai e talanoá ʻi Kalefōnia, USA.
Naʻe fiefia ʻa Mia. Ko hono fuofua taimi ʻeni ʻi he lotú! Naʻe fakamatala ange ʻe he ongo faifekaú ki hono fāmilí fekauʻaki mo e lotú. Na‘a nau fakakaukau ke nau omi.
Naʻe vakavakai takai ʻa Mia. Na‘á ne fakatokangaʻi ha tupenu hinehina ʻi he funga tēpilé. Naʻe ʻi ai ha meʻa ʻi lalo ʻi ai.
“Ko e hā e meʻa ʻi he lalo tupenú?” Ko e ʻeke ange ia ʻe Mia ki he taha ʻo e ongo faifekaú.
Naʻe malimali ʻa Sistā Henisoni. “Ko e sākalamēnití.”
Sākalamēniti Ko ha foʻi lea lahi ia. Ne fanongo atu ʻa Mia ki hono fakamatalaʻi ʻe he ongo faifekaú ki he Fineʻeikí mo e Tangataʻeikí. Ka na‘e ʻikai ke ne fakapapau‘i pe ko e hā.
Naʻe hivaʻi ʻe he taha kotoa ha foʻi hiva. Toʻo ʻe ha ongo tangata ʻa e tupenu hinehiná. Na‘e ʻi lalo ai ha ngaahi laulau mā! Naʻe siofi ʻe Mia ʻena pakipaki ʻa e maá ke īkí.
Naʻe fai ʻe ha tangata ha lotu ʻi he hili ʻo e hivá. Pea naʻe tufa ʻe ha kau tangata kehe ʻa e maá ki he taha kotoa.
Naʻe fanafana ange ʻa Sisitā Kāsia, “ʻOku tokoni ʻa e maá ke tau manatuʻi ʻa e sino ʻo Sīsuú.”
Na‘e toʻo ʻe Mia ha kiʻi konga mā. Naʻá ne sioloto ʻoku tuʻu ʻa Sīsū ʻi muʻa ʻiate ia.
Pea ne fai mo ha toe lotu ʻe taha. Naʻe tufa ʻe he kau tangatá ha laulau ʻoku ʻi ai ha fanga kiʻi ipu vai.
Ne toe fanafana atu ʻa Sistā Kāsia, “ʻOku tokoni ʻa e vaí ke tau manatuʻi e taʻataʻa ʻo Sīsuú.” “Naʻe pekia maʻatautolu he ʻokú Ne ʻofa ʻiate kitautolu.”
Naʻe toʻo ʻe Mia ha ipu vai. Naʻá ne fakakaukau ki he lahi e ʻofa ʻa Sīsū kiate iá. Na‘á ne ongoʻi ʻo hangē ʻokú Ne fāʻofua ange kiate iá.
Naʻe ʻoange kimui ʻe Sisitā Henisoni kia Mia ha kiʻi fakatātā ʻo Sīsū. “‘Oku tau kai ʻa e maá mo inu ‘a e vaí ke tau manatuʻi ʻa Sīsū mo palōmesi ke muimui kiate Ia.” Naʻe malimali leva. “Ko e hā haʻo fakakaukau ki he sākalamēnití?”
Ne sio ʻa Mia ki he fakatātā ʻo Sīsuú. Naʻá ne manatuʻi ʻa e ongo māfana naʻá ne maʻú. Naʻá ne malimali. ”Naʻe fakafiefia! ʻOku ou ʻofa ʻia Sīsū.”