Ngaahi Fakakaukau ki he Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Na‘a nau mamata kiate ia,” peesi 58: Hili haʻamou lau fakafāmili ʻa e fakamatalá, te mou lava ʻo aleaʻi ha ngaahi founga ke mou hoko ai ko ha kau fakamoʻoni ʻo Kalaisi neongo ʻoku ʻikai ke mou sio mata kiate Ia. Te mou ala fakakaukauʻi ha ngaahi meʻa ke ʻunu ʻo ofi ange ai ki he Fakamoʻuí hangē ko hano kumi ha ngaahi faingamālie ke tokoniʻi ʻa e kau kumi hūfanga ʻi homou koló, ako ki he moʻui ʻa e Fakamoʻuí he lolotonga ʻo e ako folofolá, tokangaʻi e fānau ʻa ha ongo mātuʻa ka na lava ʻo ō ki he temipalé, pe tokoni ki ha kaungāmeʻa ʻoku siʻi faingataʻaʻia. Te mou toe lava foki ʻo mamata ʻi he foʻi vitiō ʻoku ʻi he mormon.org/easter.
“Teuteu ki he Temipalé he ʻAho Kotoa Pē,” peesi 69: Mahalo te mou fakakaukau ke fakahoko ha “pō hisitōlia fakafāmili pe pō temipale” ʻi he efiafi fakafāmili ʻi ʻapí. Te mou lava ʻo ako ke fakahokohoko fakamotu‘alea e ngaahi hingoá mo kumi e ngaahi lekooti fakafāmilí pe aleaʻi hono mahuʻinga ʻo e ngaahi ouau fakatemipalé mo mamata ʻi he ngaahi tā ʻo e ʻū temipale he funga ʻo e māmaní. Kapau ʻoku mou nofo ofi ki ha temipale, te mou lava ʻo ʻeva ki he kelekele ʻo e temipalé mo aleaʻi ʻa e founga ʻe lava ai ʻe he temipalé ke ʻomi kitautolu ke tau ofi ange ki he Tamai Hēvaní mo tokoni ke tau ongoʻi ʻEne ʻofá.