Pōpoaki ʻa e Kau Palesitenisī ʻUluakí
Ko e ʻAmanaki Leleiʻanga ʻo e ʻOfa ʻa e Fāmili Taʻengatá
Fai ʻe Palesiteni Henry B. Eyring
Tokoni ʻUluaki ʻi he Kau Palesitenisī ʻUluakí
ʻI he ngaahi meʻaʻofa kotoa kuo teuteu ʻe heʻetau Tamai Hēvani ʻofá maʻa ʻEne fānaú, ko e mahuʻinga tahá ko e moʻui taʻengatá (vakai, T&F 14:7). Ko e meʻaʻofa ko iá ke tau nofo mo hotau fāmilí ʻi he ʻao ʻo e ʻOtua ko e Tamaí mo Hono ʻAlo ʻOfaʻangá ʻo laui kuonga. Ko e nāunau fakasilesitialé pē ʻa e māʻolunga taha ʻi he ngaahi nāunau ʻo e ʻOtuá, ʻe hoko atu ai ʻa e ngaahi haʻi ʻofa ʻo e moʻui fakafāmilí.
ʻOku tau ʻamanaki lelei kotoa atu ki he fiefia ʻo e nofo ʻi he ngaahi fāmili ʻofá. Ko ha ongo ia kuo teʻeki ke aʻusia ʻe ha niʻihi ʻo kitautolu—ko ha ongo ʻoku tau ʻilo ʻoku malava ka kuo teʻeki ai ke tau fakatokangaʻi. Mahalo kuo tau ʻosi sio ai ʻi he moʻui ʻa ha niʻihi kehe. Pea mo ha niʻihi kehe ʻiate kitautolu, ʻa e fotu ngali moʻoni mo mahuʻinga ange e ʻofa fakafāmilí ʻi he taimi kuo fakamāvaeʻi ai ʻe he maté kitautolu mei ha fānau, mei ha faʻē, ha tamai, ha tokoua, ha tuofefine, pe ha kui ʻofa mo ʻofeina.
Kuo tau ʻosi ongoʻi kotoa e ʻunaloto ke tau toe lava ʻi ha ʻaho ʻo ongoʻi e ʻofa ʻa e mēmipa ko ia ʻo e fāmilí ʻoku tau ʻofa aí pea ʻoku tau ʻunaloto ʻeni ke toe feʻiloaki mo ia.
ʻOku ʻafioʻi heʻetau Tamai Hēvani ʻofá ʻa hotau lotó. Ko ʻEne taumuʻá ke foaki mai e fiefiá kiate kitautolu (vakai, 2 Nīfai 2:25). Pea ko ia naʻá Ne foaki mai ʻa Hono ʻAló ko ha meʻaʻofa ke hokohoko atu ʻa e fiefia ʻo e feohi fakafāmilí ʻo laui kuonga. Te tau toetuʻu koeʻuhí kuo veteange ʻe he Fakamoʻuí ʻa e ngaahi haʻi ʻo e maté. Tuʻunga ʻi Heʻene fakalelei maʻa ʻetau ngaahi angahalá, te tau lava ai, ʻi heʻetau tuí mo e fakatomalá, ke moʻui taau mo e nāunau fakasilesitialé, ʻa ia ʻoku fakatahaʻi ai ʻa e ngaahi fāmilí ʻi he ʻofá ʻo laui kuonga.
Naʻe fekauʻi mai ʻe he Fakamoʻuí ʻa e Palōfita ko ʻIlaisiaá kia Siosefa Sāmita ke fakafoki mai ʻa e ngaahi kī ʻo e lakanga fakataulaʻeikí (vakai, T&F 110). Naʻe ʻomi fakataha ʻa e ngaahi kī ko iá mo e mālohi ʻo e silá, ko hono foaki ʻo e meʻaʻofa mahuʻinga taha ʻa e ʻOtuá ki Heʻene fānaú—ko e moʻui taʻengata ʻi he ngaahi fāmili kuo fakamaʻu fakataha ke laui kuongá.
Ko ha meʻaʻofa ia ʻe ala ʻekea ʻe he fānau kotoa pē ʻa e ʻOtuá ʻoku haʻu ki he māmaní. Naʻe fakasītuʻaʻi ʻe ha vahetolu ʻe taha ʻo ʻEne fānau fakalaumālié ʻa ʻEne foakí ʻi he maama fakalaumālié. Tuʻunga ʻi he ʻikai maʻu ha tui feʻungá mo ʻenau angatuʻu fakahāhaá, naʻa nau fili ai ke ʻoua naʻa nau teitei fiefia ʻi he meʻaʻofa ʻa e Tamai Hēvaní ko e fāmili taʻengatá.
Ko kitautolu ko ē ne tau lavaʻi ʻa e sivi mahuʻinga ʻi he maama fakalaumālié mo taau ke maʻu ʻa e meʻaʻofa ʻo e sino fakamatelié, ʻoku kei ʻatautolu pē ke fakahoko ʻa e fili maʻongoʻonga ʻo e moʻui taʻengatá, Kapau ʻoku tau monūʻia ke ʻilo ʻa e ongoongolelei kuo fakafoki maí, te tau lava ʻo fili ke fakahoko mo tauhi ʻa e ngaahi fuakava mo e ʻOtuá ʻa ia ʻokú ne fakafeʻungaʻi kitautolu ki he moʻui taʻengatá. ʻI heʻetau kātaki ʻi he faivelenga ko iá, ʻe fakapapauʻi mai ʻe he Laumālie Māʻoniʻoní ʻetau ʻamanakí mo e falala ʻoku tau ʻi he hala ki he moʻui taʻengatá, ke nofo ko e ngaahi fāmili ʻo laui kuonga ʻi he nāunau fakasilesitialé.
ʻE hangē ʻa e fiefia taʻengata ko iá ki ha niʻihi, ko ha nofo-i-lelengá pe ʻamanaki taʻehokó. Mahalo ne fai ʻe he mātuʻá, fānaú, ngaahi tokouá mo e tuofāfiné ha ngaahi fili hangē ʻokú ne fakataʻeʻaongaʻi kinautolu mei he moʻui taʻengatá. Mahalo naʻa aʻu pē ki haʻo fifili pe kuó ke ʻosi feʻunga koā tuʻunga ʻi he Fakalelei ʻa Sīsū Kalaisí.
Naʻe akonaki mai ʻe ha palōfita ʻa e ʻOtuá kiate au ʻo u maʻu ai ha nonga. Naʻá ku manavasiʻi naʻa hoko e ngaahi fili ʻa e niʻihi kehé ke taʻemalava ai ke nofo fakataha homau fāmilí ʻo taʻengata. Naʻá ne pehē, “ʻOkú ke hohaʻa ki he palopalema hala. Moʻui taau pē mo e nāunau fakasilesitialé, pea ʻe toe fakaʻofoʻofa ange ʻa e faʻunga ʻo e fāmilí ʻi he meʻa ʻokú ke lava ʻo mafakakaukauʻí.”
ʻOku ou fakamoʻoni atu kiate kinautolu kotoa ʻoku hanga ʻe heʻenau aʻusia fakatāutahá pe nofomalí mo e fānaú—pe hala ha mali pe fānaú—ʻo fakaʻuliʻulilātai ʻenau ʻamanakí: ʻOku ʻafioʻi mo ʻofa e Tamai Hēvaní ʻiate kimoutolu ko ʻEne fānau fakalaumālie. Lolotonga hoʻomou nofo mo Ia pea mo Hono ʻAlo ʻOfaʻangá ʻi he maama fakalaumālié, naʻá Na fakatoka ki homou lotó ʻa e ʻamanaki lelei ʻoku mou maʻu ki he moʻui taʻengatá. Te mou lava he taimí ni ʻo ongoʻi pea te mou ongoʻi ʻi he maama ka hoko maí ʻa e ʻofa fakafāmili ʻoku finangalo hoʻomou Tamaí mo Hono ʻAlo ʻOfaʻangá ke mou maʻú, ʻi he mālohi ʻo e ngāue ʻa e Fakalelei ʻa Sīsū Kalaisí pea mo e fakahinohino ʻa e Laumālie Māʻoniʻoní.
ʻOku ou fakamoʻoni ko e taimi te mou moʻui taau ai mo e nāunau fakasilesitialé, ʻe ʻamoutolu ʻa e talaʻofa fakaepalōfitá “ʻe fakaʻofoʻofa ange ʻa e faʻunga ʻo e fāmilí ʻi he meʻa ʻoku [mou] lava ʻo mafakakaukauʻí.”