Ngaahi Fehuʻi & Talí
“ʻOku ʻi ai haku kaungāmeʻa ʻokú ne ongoʻi hangē ʻoku ʻikai hano toe kaungāmeʻa ʻi he Siasí tuku kehe pē au. Ko e hā te u lava ʻo fai ke tokoni kiate iá?”
ʻI he tūkunga ko ʻení, mahalo ʻokú ne ongoʻi liʻekina, taʻelata, pe uesiangofua. Meʻamālié, ʻoku lahi ha ngaahi meʻa te ke lava ʻo fai ke poupouʻi ia koeʻuhí ko hoʻo anga fakakaungāmeʻá:
-
Tokoniʻi ia ke ne fakakaungāmeʻa mo e toʻu tupu kehé. Fakafeʻiloaki ia kiate kinautolu, fakakau ia ʻi hoʻomou pōtalanoá, mo fokotuʻu ha ngaahi ʻekitivitī maʻá e toʻu tupu ʻi homou uōtí ke nau maheni lelei ange. ʻIkai ngata aí, te ke lava ʻo talanoa mo hoʻomou Palesiteni ʻo e Finemuí ke ne lava ʻo tokoni mo e kau taki kehé.
-
Tokoniʻi ia ke ne ʻiloʻi hono mahuʻinga fakalangí. Te ke lava ʻo talaange ha niʻihi ʻo e ngaahi lelei ʻokú ke ʻilo ʻokú ne maʻú.
-
Tokoniʻi ia ke ne manatuʻi e ofa ʻa e Fakamoʻuí mo hoʻo ʻofá. Naʻe folofola ʻa e Fakamoʻuí, “Ko au ko e tauhi [sipi] lelei, … pea [ʻoku ou ʻiloʻi ʻa ia ʻoku ʻaʻakú, mo ʻilo au ʻe kinautolu]” (Sione 10:14). ʻO aʻu ai pē kapau te ne ongoʻi ʻoku ʻikai mahino ki ha taha, ʻe ʻafioʻi totonu ʻe he ʻEikí hono lotó. Lotua ia, pea ʻikai ko ia pē ka ke fakahaaʻi hoʻo ʻofa kiate iá ʻaki hano fakakau ia ʻi he ngaahi ʻekitivitií mo talanoa ki ai ʻi he lotú.
-
Fokotuʻu ange ke tafoki ki he folofolá mo e lotú ke fakamālohia hono vā fetuʻutaki mo e Tamai Hēvaní mo Sīsū Kalaisí.
-
Ko e mahuʻinga tahá, poupouʻi ia ke maʻulotu maʻu pē, neongo kapau ʻe faingataʻa ki ai. Fakamanatu ki ai hono mahuʻinga e maʻu ʻo e sākalamēnití mo e ako e ongoongoleleí ʻi he ngaahi houalotu ʻa e Siasí.
Kapau ʻoku ʻikai ngāue vave hoʻo ngaahi fakakaukaú, kei ʻalu pē ki ai koeʻuhí ko ho kaungāmeʻá mo poupouʻi ia ke ne fai ʻa e ngaahi meʻa totonú.
ʻAi ke Mou Mālohi Ange Fakataha
Poupouʻi mo tokoniʻi ia ke talanoa mo e toʻu tupu kehé. ʻOku tau mālohi fakafoʻituitui, ka ʻoku tau mālohi ange ʻi heʻetau kau fakatahá. Talaange ki ho kaungāmeʻá te ne malava lelei ange ʻo tokoni ke tupulaki e puleʻanga ʻo e ʻOtuá kapau ʻe tokolahi ange hono ngaahi kaungāmeʻa te nau fakamaama iá, hoko ko e tokoni ʻi heʻene moʻuí, mo tokoniʻi ia ke ne ʻofa ʻia Sīsū Kalaisi mo ʻEne ongoongoleleí!
Sikāleti M., taʻu 16, Vahefonua Kōsiní, Silei
Fakaafeʻi ia ki he Ngaahi ʻEkitivitií
Naʻá ku ongoʻi tuēnoa ʻi heʻeku kau ki he Siasí, neongo naʻe feinga e toʻu tupu ʻe niʻihi ke mau feohi. Naʻá ku ʻalu ki he ngaahi ʻekitivitī ʻa e Mutualé mo kau lahi ange ʻi heʻenau pōtalanoá. Naʻá ku fanongo kiate kinautolu mo u tokoni. Naʻá ku malimali kiate kinautolu mo fakahaaʻi ʻeku mahuʻingaʻia ʻiate kinautolú. Ko ʻeku faleʻí ke ke tokoni ki ho kaungāmeʻá ke feohi. Tokoniʻi ia ke kau ʻi ha ʻekitivitī pē ʻa e Siasí, pea ʻe kamata leva ke fiefia ʻi he feohi mo ha ngaahi kaungāmeʻa tokolahi.
Tui O., taʻu 17, ʻApaia, Naisīlia
Fakakau Ia
Te u feinga ke tokoni ʻo fakakau ho kaungāmeʻá ʻi he pōtalanoa mo e ngaahi ʻekitivitī mo e toʻu tupu kehe ʻi he lotú. ʻE lava ʻo tokoni ke talanoa mo ha ngaahi kaungāmeʻa lelei kehe kau ki he ongo ʻa e kaungāmeʻa ko ʻení. ʻE ala ʻomi ʻe he kole tokoni ke nau fakakau iá, ke fakatokangaʻi ʻe he ngaahi kaungāmeʻa kehé e ngaahi fie maʻu ʻa e kaungāmeʻa ko ʻení pea mo tokoni ke nau manatuʻi ke angaʻofa ange mo fakakau ia he pōtalanoá mo e ngaahi ʻekitivitií.
Trevor C. taʻu 14, ʻAitahō, USA
Talaange Hoʻo Mahuʻingaʻia ʻIate Iá
Naʻá ku maʻu e ongo tatau ʻi he taimi naʻá ku hiki ai ki he uooti foʻoú. ʻOku faingataʻa ʻa e tuʻunga ko iá. ʻOku mahuʻinga ke talaange ki ho kaungāmeʻá ʻene makehé, hono mahuʻinga kiate koé, pea mo e ngaahi lelei ʻokú ne maʻú koeʻuhí ke ne maʻu ha lotofalala pea ʻoku ʻikai fie maʻu ke ilifia. ʻOku tau mahuʻinga kātoa. Poupouʻi ia ke talanoa mo ha taki, lotu, mo lau e folofolá ke ne ʻiloʻi ʻoku ʻikai tuēnoa.
Sharon G. taʻu 14, Iukatani, Mekisikou
Mateuteu ke ke Tokoni
Te ke lava ʻo tokoniʻi ia ke mahino ki ai ko e kau mēmipa kotoa kitautolu ʻo e fāmili ʻo e ʻOtuá, ko e tuofāfine mo e ngaahi tuongaʻane, pea ʻoku fie maʻu ke ne fakahaaʻi ha ʻofa pea feohi mo e taha kotoa. ʻIkai ngata aí, ʻai ke ne ʻiloʻi, ʻoku tau mateuteu maʻu pē ke fetokoniʻaki mo fefakamālohiaʻaki ʻi hotau fāmili fakalaumālie tokolahi ko ʻení. ʻOku tau maʻu kotoa ʻa e taumuʻa tatau ʻoku tau feinga ki aí. ʻOku ʻikai ke tau teitei tuēnoa ʻi he ongoongoleleí.
Sisitā ʻAna Kaikolotova, Misiona Lūsia Mosikoú
Fakafanongo ki he Fakahinohino ʻa e ʻEikí
Hūfia ia mo kole ki he Tamai Hēvaní ke tokoniʻi koe ke ke ʻiloʻi e founga te ke lava ai ʻo tokoniʻi iá. Talanoa mo ho kau takí pea feinga ke fakakau ia ʻi he pōtalanoa mo e tamaiki fefine kehe ʻi he lotú. Hokohoko atu pē hoʻo kaungāmeʻa mo iá mo fai hoʻo lelei taha te ke lavá, pea ʻe tokoni atu ʻa e ʻEikí ke ke ʻilo e founga ke tokoniʻi ai iá.
ʻAnesitāsia B., taʻu 18, ʻIutā, USA
Fakahoko ha Paati
Te ke lava pe te ne lava ʻo tokangaʻi ha paati ko ha kakai tokosiʻi pē mei he lotú. ʻOku lelei ange ʻa e feinga ke ʻiloʻi e niʻihi kehé ʻi he taimi ʻoku tokosiʻi aí.
Trais H., taʻu 13, ʻAitahō, USA
Talaange ki Ai ʻOku ʻIkai ke Ne Teitei Tuēnoa
ʻUluakí te tau lotua maʻá e finemui ko iá mo fakaafeʻi ia ki he ʻekitivitī pe ngāue tokoni kotoa pē koʻeuhí ke ne lava ʻo ongoʻi ko ha konga ia ʻo e kulupú. ʻOua naʻa tau tuku ha taha ke tō! Uá, te tau fakahā ki ai ʻoku ʻikai ke ne teitei tuēnoa ʻi ha taimi, ʻoku ʻiate kitautolu maʻu pē ʻa e Tamai Hēvaní ʻokú Ne ʻofa lahi mo taʻengata ʻiate kitautolu. Te tau fakamanatu ki ai ʻa e kupuʻi lea mei hotau palōfitá: “Te mou tuʻu ʻi ha ʻaho ʻo vakai atu ki homou taimi faingataʻaʻiá, pea te mou ʻiloʻi naʻá Ne ʻi homou tafaʻakí maʻu ai pē” (Tōmasi S. Monisoni, “ʻOku ʻIkai ʻAupito ke Tau Tuēnoa,” Liahona, Nōvema 2013, 124).
Ienifea S., taʻu 18, mo Fenanitō P., taʻu 18, Takualemipou, ʻUlukuai.