Mateuteu ki he Meʻa Fakatuʻupakeé: Mofuiké mo e Ngaahi Foʻi Hiná

Ricardo Sosa, Sanita Lūsia, ʻĀsenitina

ʻĪmisi

earthquake wreckage

Tā fakatātā ʻa Allen Garns

Ko e taimi naʻá ku māhina ai pē ʻe hivá, ne tofanga ʻeku ongomātuʻá—ko ha ongomeʻa mali kei talavou, mo e fānau ʻe toko tolu pea kei feitamaʻi ʻa e taha—ʻi ha mofuike ʻi ʻĀsenitina naʻe 7.5 hono mālohí. Ko e taimi naʻe kamata ke holafa ai homau falé, ne puke kimautolu ʻe he tangataʻeikí mo e fineʻeikí pea mau lele. Hili ʻena vakaiʻi ke fakapapauʻi ʻoku mau MALÚ, naʻá na vakai takai ki he fakaʻauhá. Naʻe vakaiʻi leva ʻe he tangataʻeikí ʻa e maumaú mo e molé, ʻo ʻiloʻi ai he ʻikai ke mau maʻu ha vai maʻa mei he puleʻangá. Naʻe ʻikai foki ke ʻi ai ha vai feʻunga ke fufulu ʻaki e efu mei he ngaahi fale holó!

ʻI he ʻosi e lulu ʻa e mofuiké, naʻe lele ʻeku tamaí heʻene pasikalá ke vakai ʻene fineʻeikí, he naʻe nofo ofi mai pē. ʻI heʻene aʻu atu ki he fale holo ʻo ʻene fineʻeikí, naʻá ne lue ʻo takai ki mui naʻe tangutu ai ʻene fineʻeikí naʻe makohikohi siʻisiʻi pē.

Naʻe kole heʻeku kui fefiné ki heʻeku tamaí ke fakahaofi ha ngaahi meʻa mei he vevé, pea lolotonga ʻene fai iá, naʻá ne maʻu ha ongo demijhons (ngeʻesi hina sioʻata naʻe fakatau atu ai ha uaine kālani ʻe 5 ki he 15 [lita ʻe 20 ki he 60] ne ʻosi fakafonu ʻaki ha vai inu. Naʻe ʻikai ke mafahi.

Naʻe fakahinohino ʻe Palesiteni Sipenisā W. Kimipolo (1895–1985) e Kāingalotú he funga māmaní, ʻi ha ngaahi māhina siʻi kimuʻa he mofuiké, ke tokonaki ha meʻakai mo ha vai. Naʻe fakafanongo pē ʻeku kui fefiné, ko ha tokotaha toki ului. Naʻa mau lava ʻo feau e fie maʻu homau fāmilí ʻi ha ngaahi ʻaho siʻi, mei he ongo foʻi hiná ni, kae ʻoua kuo aʻu mai e tokoni fakatuʻupakeé.

Naʻe hoko e sīpinga ko ʻeni ʻo e talangofua ʻa ʻeku kui fefiné ko ha fakamoʻoni ki heʻeku tamaí, ʻa ia naʻá ne ului kimui ange ki he ongoongoleleí. Kuo ʻosi silaʻi homau fāmilí ʻi he temipalé. ʻOku ou fakamālō lahi ki he tui mo e talangofua ʻa ʻeku kui fefiné ki he ui ke mateuteú.